ແຟນບານ ເອຕຽນ ຮັບບໍ່ໄດ້ທີມຕົກຊັ້ນ ລີກ ເອິງ ລົງບຸກສະຫນາມຍິງພຸໃສ່ນັກເຕະ

ແຟນບານ ແຊັງ ເອຕຽນ ທີມໃນປະເທດຝຣັ່ງ ບໍ່ພໍໃຈຢ່າງແຮງ ຫລັງທີມຮັກຕົກຊັ້ນ ບຸກລົງສະຫນາມ ຍິງພຸ ຂວ້າງດອກໄມ້ໄຟ ສ້າງຄວາມວຸ້ນວາຍ ເຮັດໃຫ້ນັກເຕະຫນີເອົາຕົວລອດຢ້ານຖືກລູກຫລົງ.

ການແຂ່ງຂັນບານເຕະ ລີກເອິງ ຝຣັ່ງ ນັດເພລອອຟ ເລື່ອນຊັ້ນຕົກຊັ້ນ ນັດສອງ ແຊັງ ເອຕຽນ ເປີດບ້ານສະເຫມີ ໂອແຊ 1-1 ໃນເວລາ 90 ນາທີ ເຮັດໃຫ້ຜົນສອງນັດ ສະເຫມີກັນ 2-2 ແຕ່ເມື່ອຕໍ່ເວລາພິເສດ 120 ນາທີ ກໍຍັງຫາຜູ້ຊະນະບໍ່ໄດ້ ເຮັດໃຫ້ຕ້ອງຕັດສິນດ້ວຍການຍິງລູກໂທດ ແລະ ເປັນ ໂອແຊ ຍິງລູກໂທດແມ໊ນກວ່າ ຊະນະໄປ 5-4 ເລື່ອນຊັ້ນສູ່ລີກເອິງຄັ້ງທຳອິດໃນຮອບ 11 ປີ.

ຫລັງຈົບເກມ ແຟນບານ ແຊງ ເອຕຽນ ຈຳນວນຫມື່ນຄົນ ຕ່າງພາກັນແລ່ນລົງສະຫນາມ ພ້ອມຂວ້າງພຸ ແລະ ດອກໄມ້ໄຟ ດ້ວຍຄວາມບໍ່ພໍໃຈ ເນື່ອງຈາກພວກເຂົາຮັບບໍ່ໄດ້ທີ່ທີມຮັກຕ້ອງເສຍໄຊ ແລະ ຕົກສູ່ລີກຮອງຄັ້ງທຳອິດໃນຮອບ 22 ປີ ຕາມຫລັງ ເມັດ ແລະ ບອກໂດ ທີ່ຕົກຊັ້ນໄປກ່ອນຫນ້ານີ້ແລ້ວ ເຮັດໃຫ້ນັກເຕະທັງສອງທີມ ລວມເຖິງກຳມະການຕ້ອງຟ້າວແລ່ນຫນີຈາກການດັ່ງກ່າວ ເພາະຢ້ານຖືກລູກຫລົງ.