ເບນເຊມາ ຄວ້າລາງວັນນັກເຕະດີເດັ່ນ ຢູຟາ ແຊ໊ມປຽນ ລີກ

ຄາຣິມ ເບນເຊມາ ໄດ້ຮັບເລືອກໃຫ້ຄວ້າລາງວັນນັກເຕະດີເດ່ັນແຫ່ງການແຂ່ງຂັນ ຢູຟາ ແຊ໊ມປຽນ ລີກ ລະດູການ 2021-22 ຂະນະທີ່ ລີໂອເນລ ເມສຊີ ອອກມາສະຫນັບສະຫນູນໃຫ້ຄວ້າ ບັນລົງດໍ ນຳອີກ.

ຄາຣິມ ເບນເຊມາ ກອງຫນ້າທີມຊາດຝຣັ່ງ ຂອງສະໂມສອນ ຣຽວ ມາດຣິດ ແຫ່ງສະເປນ ໄດ້ຮັບເລືອກໃຫ້ຄວ້າລາງວັນນັກ ເຕະດີເດັ່ນແຫ່ງຢູຟາ ແຊ໊ມປຽນ ລີກ ລະດູການ 2021-22 ຫລັງເປັນກຳລັງສຳຄັນນຳທີມຄວ້າແຊ໊ມໄດ້ສຳເລັດ.

ໂດຍ ເບນເຊມາ ລົງເຕະໃນແຊ໊ມປຽນ ລີກ ລະດູການນີ້ໄປ 12 ນັດ ຍິງໄດ້ເຖິງ 15 ປະຕູ ເຊິ່ງໃນຈຳນວນນີ້ມີປະຕູສຳຄັນທັງການຍິງ ແຮັດທຣິກໃສ່ ປາຣີສ ແຊັງ ແຊັກແມັງ, ຍິງລວມ 4 ປະຕູໃສ່ ເຊລຊີ ແລະ ຍິງລວມ 3 ປະຕູໃສ່ ແມນເຊສເຕີ ຊິຕີ ອັນມີຜົນຕໍ່ການ ຜ່ານເຂົ້າຮອບທັງຫມົດ.

ຫລັງຈາກນັດຊີງຊະນະເລີດທີ່ ຣຽວ ມາດຣິດ ຊະນະລີເວີພູລ ຈາກອັງກິດ 1-0 ເຮັດໃຫ້ສະໂມສອນຄວ້າແຊ໊ມປຽນລີກເປັນສະໄຫມທີ 14  ແລະ ເປັນຄັ້ງທີ 5 ໃນອາຊີບນັກເຕະຂອງ ເບນເຊມາ ອາຍຸ 34 ປີນຳອີກ.