ຊຽງໄຮ້ຫລຸດຜ່ອນມາດຕະການ ຫລັງລັອກດາວມາ 2 ເດືອນ ເຜີຍຄວບຄຸມການລະບາດໄດ້ແລ້ວ
ຊາວຊຽງໄຮ້ໄດ້ຮັບອິດສະຫລະພາບອີກ ເມື່ອທາງການປະກາດຫລຸດຜ່ອນມາດຕະການ 1 ມິຖຸນານີ້ ສິ້ນສຸດການລັອກດາວຍາວນານ 2 ເດືອນ.
ວັນທີ 31 ພຶດສະພາ 2022, ສຳນັກຂ່າວເອພີ (AP) ລາຍງານວ່າ: ທາງການຊຽງໄຮ້ກຽມກັບມາເປີດເມືອງອີກໃນວັນທີ 1 ມິຖຸນານີ້ ຫລັງຈາກບັງຄັບໃຊ້ມາດຕະການລັອກດາວເພື່ອຄວບຄຸມການລະບາດຂອງພະຍາດໂຄວິດ-19 ມາເປັນເວລາ 2 ເດືອນ, ແຕ່ຍັງສັ່ງຫ້າມບໍ່ໃຫ້ປະຊາຊົນກວ່າເຄິ່ງລ້ານອອກຈາກເຮືອນ.
ທ່ານ ຊົງ ໝິງ ຮອງເຈົ້າຄອງຊຽງໄຮ້ ຢືນຢັນວ່າ: ຊຽງໄຮ້ຄວບຄຸມການລະບາດຂອງເຊື້ອໄວຣັສໄດ້ຢ່າງມີປະສິດທິພາບແລ້ວ ເຮັດໃຫ້ສາມາດເລີ່ມຂະບວນການທີ່ຈະເຮັດໃຫ້ປະຊາຊົນກັບມາເຮັດວຽກ ແລະ ໃຊ້ຊີວິດໄດ້ອີກ.
ໂດຍໃນວັນທີ 1 ມິຖຸນານີ້ ລົດປະຈຳທາງ, ລົດໄຟໃຕ້ດິນ ແລະ ເຮືອເຟີຣີຈະເລີ່ມເປີດໃຫ້ບໍລິການ, ເຊັ່ນດຽວກັບລະບົບລາງທີ່ເຊື່ອມກັບເມືອງອື່ນໆໃນຈີນ. ຂະນະທີ່ແທັກຊີ, ບໍລິການເອີ້ນລົດ ແລະ ການເດີນທາງດ້ວຍລົດຍົນສ່ວນຕົວ ຈະໄດ້ຮັບອະນຸຍາດໃຫ້ເຂົ້າສະເພາະຖະໜົນໃນພື້ນທີ່ສ່ຽງຕໍ່າເທົ່ານັ້ນ.
ດ້ານຫ້າງສັບພະສິນຄ້າ, ຊຸບເປີມາເກັດ, ຮ້ານສະດວກຊື້ ແລະ ຮ້ານຂາຍຢາ ຈະອະນຸຍາດໃຫ້ເປີດໄດ້ໂດຍມີຜູ້ເຂົ້າໃຊ້ບໍລິການບໍ່ເກີນ 75% ຂອງຈຳນວນສູງສຸດທີ່ໃຫ້ບໍລິການໄດ້, ສ່ວນໂຮງຮຽນຈະເປີດຮຽນບາງສ່ວນຂຶ້ນກັບຄວາມສະໝັກໃຈຂອງນັກຮຽນ ໂດຍສ່ວນທີ່ຍັງບໍ່ເປີດໃຫ້ບໍລິການ ຄືໂຮງຮູບເງົາ, ຄາລາໂອເກະ ແລະ ສູນອອກກຳລັງກາຍ.
ເຖິງຢ່າງໃດກໍຕາມ, ຍັງມີປະຊາກອນສ່ວນໜຶ່ງຍັງບໍ່ສາມາດອອກຈາກເຮືອນໄດ້ ປະກອບມີຜູ້ທີ່ຢູ່ໃນພື້ນທີ່ລັອກດາວ 190.000 ຄົນ ແລະ ອີກ 450.000 ຄົນທີ່ຍັງຢູ່ໃນພື້ນທີ່ຄວບຄຸມ ຫລັງຈາກມີການກວດພົບຜູ້ຕິດເຊື້ອໃນພື້ນທີ່ດັ່ງກ່າວ.
ສ່ວນຜູ້ທີ່ອອກຈາກເຮືອນໄດ້ ຍັງຕ້ອງເຂົ້າຮັບການກວດເຊື້ອໃນທຸກໆ 2-3 ວັນ ເພື່ອຈະສາມາດກວດພົບເຊື້ອໄດ້ແຕ່ຫົວທີ່ ຖ້າເກີດການລະບາດຂຶ້ນມາອີກ.
ຫລ້າສຸດຈຳນວນຜູ້ຕິດເຊື້ອໃໝ່ໃນຊຽງໄຮ້ໃນວັນທີ 30 ພຶດສະພາ ຫລຸດລົງເຫລືອພຽງ 31 ຄົນ ຈາກທີ່ເຄີຍຂຶ້ນໄປສູງເຖິງ 20.000 ຄົນຕໍ່ວັນໃນເດືອນເມສາ.
ອ້າງອີງ:
https://apnews.com/…/covid-health-education-beijing…
https://www.bloomberg.com/…/shanghai-takes-biggest…
