ປິດສາກ 5 ປີ 2 ແຊ໊ມ, ອາເຊນອລ ຖະແຫລງ ລາກາແຊັດ ຫມົດສັນຍາກັບທີມ
ອາເຊນອລ ຢືນຢັນດາວຍິງຊາວຝຣັ່ງກຽມອຳລາທີມຫລັງຫມົດສັນຍາເດືອນນີ້ ປິດສາກ 5 ປີ 2 ແຊ໊ມ ພ້ອມເຜີຍສະຖານີຕໍ່ຈາກພຣີເມຍລີກ.
ອາເຊນອລ ທີມອັນດັບ 5 ພຣີເມຍລີກ ອັງກິດ ລະດູການ 2021-22 ປະກາດເລື່ອງການຫມົດສັນຍາຂອງອາເລັກຊອງ ລາກາແຊັດ ກອງຫນ້າຊາວຝຣັ່ງ ອາຍຸ 31 ປີ ເຊິ່ງລາວສາມາດຍ້າຍທີມໄດ້ແບບບໍ່ມີຄ່າຕົວຫລັງຈາກວັນທີ 30 ມິຖຸນານີ້ ພ້ອມຂອບໃຈທີ່ຊ່ວຍອາເຊນອລ ຄວ້າແຊ໊ມ 2 ລາຍການໃນລະຫວ່າງປີ 2017-2022 ປະກອບດ້ວຍ ແຊ໊ມຄອມມິວນິຕີ ຊິລ ປີ 2017 ແລະ ແຊ໊ມເອຟເອ ຄັບ 2019-20.
ສ່ວນ ຜູ້ຈັດການທີມ ມິເກລ ອາເຕຕາ ກ່າວເຖິງ ລາກາແຊັດ ວ່າ : ‘‘ ລາວເປັນນັກເຕະທີ່ດີເດ່ັນສຳລັບເຮົາ ລາວເປັນຜູ້ນຳທີ່ແທ້ຈິງ ທັງໃນ ແລະ ນອກສະຫນາມ ແລະ ມອບອິດທິພົນທີ່ສຳຄັນຫລາຍຕໍ່ບັນດານັກເຕະຮຸ່ນນ້ອງຂອງເຮົາ ຄວາມມຸ້ງຫມັ້ນຂອງລາວ ທີ່ມີຕໍ່ເຮົານັ້ນສຸດຍອດ ແລະ ເຮົາຫວັງວ່າລາວ ແລະ ຄອບຄົວຈະປະສົບຄວາມສຳເລັດ ແລະ ມີຄວາມສຸກ ’’.
ສຳລັບ ລາກາແຊັດ ຍິງໄປທັງຫມົດ 71 ປະຕູ ຈາກ 206 ນັດ ໃນການຫລິ້ນໃຫ້ ອາເຊນອລ ກໍ່ກ່າວຄຳອຳລາວ່າ : ‘‘ ຂ້ອຍມີຄວາມສຸກ ຫລາຍ ທີ່ໄດ້ຫລິ້ນໃຫ້ກັບ ອາເຊນອລ ມາ 5 ປີ ແຕ່ຂ້ອຍຈະຍັງຕິດຕໍ່ກັບຫມູ່ຮ່ວມທີມ, ຄູເຝິກ ແລະ ສະໂມສອນແຫ່ງນີ້ຕໍ່ໄປ ຂ້ອຍ ສະຫນັບສະຫນູນ ອາເຊນອລ ມາຕັ້ງແຕ່ເປັນເດັກນ້ອຍ ດັ່ງນັ້ນ ມັນຈະແຈ້ງວ່າຂ້ອຍຈະສະໜັບສະໜູນພວກເຂົາຕໍ່ໄປ ຂ້ອຍຮູ້ວ່າຂ້ອຍມີໂອກາດທີ່ຈະໄດ້ກັບມາທີ່ສະຫນາມແຫ່ງເຊ່ັນດຽວກັນ ’’.
ອາເລັກຊອງ ລາກາແຊັດ ມີຂ່າວວ່າກຽມຍ້າຍກັບໄປຍັງໂອລິມປິກ ລີຢົງ ທີມດັງຂອງເລີກເອິງ ຝຣັ່ງ ອະດີດຕົ້ນສັງກັດທີ່ລາວເຄີຍ ຮັບໃຊ້ກ່ອນມາຮ່ວມງານກັບ ອາເຊນອລ ເມື່ອ 5 ປີກ່ອນ.
