ອັງກິດເລີ່ມທົດລອງ ໃຫ້ເຮັດວຽກ 4 ວັນ/ອາທິດ

ນັບແຕ່ວັນທີ 6 ມິຖຸນາເປັນຕົ້ນມາ ພະນັກງານຫລາຍພັນຄົນຈາກບໍລິສັດປະມານ 70 ແຫ່ງໃນອັງກິດ ໄດ້ເລີ່ມຕົ້ນເຮັດວຽກ 4 ວັນຕໍ່ອາທິດ. ນີ້ເປັນໂຄງການທົດລອງຍາວ 6 ເດືອນ ທີ່ຈັດຂຶ້ນໂດຍກຸ່ມຮຽກຮ້ອງໃຫ້ບໍລິສັດຕ່າງໆ ໃຫ້ພະນັກງານເຮັດວຽກໜ້ອຍລົງ ແຕ່ໃຫ້ເງິນເດືອນຄືເກົ່າ.

ລະຫວ່າງໂຄງການນີ້ ພະນັກງານທຸກຄົນຈະເຮັດວຽກພຽງ 80% ຂອງຈຳນວນຊົ່ວໂມງທັງໝົດທີ່ເຄີຍເຮັດຕໍ່ອາທິດ ແຕ່ຈະໄດ້ເງິນເດືອນຄືເກົ່າຢູ່ ເປົ້າໝາຍຄືຈະເບິ່ງວ່າພວກເຂົາສາມາດເຮັດວຽກໄດ້ຢ່າງມີປະສິດທິພາບຫລາຍກວ່າເກົ່າ ຫລື ບໍ່.

ບໍ່ສະເພາະແຕ່ອັງກິດ ເພາະແອັສປາຍ ແລະ ສກັອດແລນ ກໍມີແຜນຈະທົດລອງການເຮັດວຽກ 4 ວັນຕໍ່ອາທິດ ໂດຍບໍ່ຫລຸດເງິນເດືອນພາຍໃນປີນີ້ເຊັ່ນກັນ.