ລາວສະຫລອງວັນສ້າງຕັ້ງສື່ມວນຊົນ ແລະ ພີມຈໍາໜ່າຍຄົບຮອບ 67 ປີ

ລາວສະຫລອງວັນສ້າງຕັ້ງສື່ມວນຊົນ ແລະ ພີມຈໍາໜ່າຍຄົບຮອບ 67 ປີ - advert banner 728 90 728x90 - ລາວສະຫລອງວັນສ້າງຕັ້ງສື່ມວນຊົນ ແລະ ພີມຈໍາໜ່າຍຄົບຮອບ 67 ປີ

ພິທີສະເຫລີມສະຫລອງວັນສ້າງຕັ້ງສື່ມວນຊົນ ແລະ ພີມຈໍາໜ່າຍແຫ່ງຊາດຄົບຮອບ 67 ປີ (13 ສິງຫາ 1950-13 ສິງຫາ 2017) ໄດ້ຈັດຂຶ້ນໃນວັນທີ 11 ສິງຫານີ້ທີ່ນະຄອນຫລວງວຽງຈັນ, ໂດຍການເຂົ້າຮ່ວມຂອງທ່ານລັດຖະມົນຕີກະຊວງຖະແຫລງຂ່າວ, ວັດທະນາທໍາ ແລະ ທ່ອງທ່ຽວ ບໍ່ແສງຄໍາ ວົງດາລາ, ມີບັນດາຫົວໜ້າອົງການສື່ມວນຊົນ ແລະ ການພີມຈໍາໜ່າຍ, ອະດິດພະນັກງານອາວຸໂສ, ພ້ອມດ້ວຍນັກຂຽນ, ນັກຂ່າວ ແລະ ພາກສ່ວນກ່ຽວຂ້ອງເຂົ້າຮ່ວມເປັນຈໍານວນຫລາຍ.

ລາວສະຫລອງວັນສ້າງຕັ້ງສື່ມວນຊົນ ແລະ ພີມຈໍາໜ່າຍຄົບຮອບ 67 ປີ - new3 - ລາວສະຫລອງວັນສ້າງຕັ້ງສື່ມວນຊົນ ແລະ ພີມຈໍາໜ່າຍຄົບຮອບ 67 ປີ

ທ່ານ ສະຫວັນຄອນ ຣາຊມຸນຕຣີ ຮອງລັດຖະມົນຕີກະຊວງຖະແຫລງຂ່າວ, ວັດທະນາທໍາ ແລະ ທ່ອງທ່ຽວ, ປະທານສະມາຄົມນັກຂ່າວແຫ່ງ ສປປ ລາວ ໄດ້ລາຍງານການເຕີບໃຫຍ່ຂະຫຍາຍຕົວຂອງວຽກງານສື່ມວນຊົນ ແລະ ການພີມຈໍາໜ່າຍໃນຕະຫລອດໄລຍະ 67 ປີຜ່ານມາວ່າ: ປະທານ ໄກສອນ ພົມວິຫານ ຜູ້ນໍາທີ່ເຄົາລົບຮັກຂອງພວກເຮົາໄດ້ຊີ້ນໍາໃຫ້ສ້າງຕັ້ງໜັງສືພີມແນວລາວອິດສະຫລະສະບັບທໍາອິດຂຶ້ນໃນວັນທີ 13 ສິງຫາ 1950 ໂດຍແມ່ນທ່ານ ສີ ຊະນະ ສີສານ ເປັນຫົວໜ້າບັນນາທິການຜູ້ທໍາອິດ ແລະ ກາຍເປັນທີ່ມາຂອງວັນສື່ມວນຊົນ ແລະ ການພີມຈໍາໜ່າຍແຫ່ງຊາດມາຮອດປັດຈຸບັນ ແລະ ແມ່ນເຄື່ອງມືອັນແຫລມຄົມກະບອກສຽງຂອງພັກ ແລະ ລັດຖະບານໃນການໂຄສະນາເຜີຍແຜ່ແນວທາງນະໂຍບາຍຂອງພັກ ແລະ ລະບຽບກົດໝາຍຂອງລັດ ແລະ ທັງເປັນເວທີສົ່ງເສີມປະຊາທິປະໄຕຂອງປະຊາຊົນບັນດາເຜົ່າໄດ້ດີຕະຫລອດມາ, ປັດຈຸບັນທົ່ວປະເທດມີສື່ສິ່ງພີມທັງໝົດ 144 ສະບັບ, ໃນນັ້ນໜັງສືພີມມີ 29 ສະບັບ,​ ເປັນລາຍວັນມີ 11 ສະບັບ, ວາລະສານ 111 ສະບັບ ແລະ ໃບຂ່າວ 4 ສະບັບ, ວິທະຍຸກະຈາຍສຽງມີ 63 ສະຖານີ, ຢູ່ສູນກາງ 11 ສະຖານີ ແລະ ທ້ອງຖິ່ນ 52 ສະຖານີ ແລະ ສາມາດກະຈາຍສຽງກວມຫລາຍກວ່າ 95% ຂອງພື້ນທີ່ທົ່ວປະເທດ, ໂທລະພາບມີ 37 ສະຖານີ, ຢູ່ສູນກາງ 9 ສະຖານີ, ທ້ອງຖິ່ນ 28 ສະຖານີ, ສາມາດອອກອາກາດພາບ-ສຽງທາງພາກພື້ນດິນກວມປະມານ 80% ແລະ ຜ່ານດາວທຽມກວມ 100% ຂອງພື້ນທີ່ທົ່ວປະເທດ, ພ້ອມມີລະບົບໂທລະໂຄ່ງທີ່ຕິດຕັ້ງສໍາເລັດແລ້ວຢູ່ 4.835 ບ້ານຂອງຈໍານວນ 8.662 ບ້ານໃນທົ່ວປະເທດ, ອັນໄດ້ປະກອບສ່ວນກະຈາຍພາບ, ສຽງ, ຂ່າວ, ແຈ້ງການ, ຄໍາສັ່ງ, ນິຕິກໍາອື່ນໆ ແລະ ສາລະໜ້າຮູ້ທີ່ມີປະໂຫຍດຕ່າງໆໄປຮອດໄປເຖິງປະຊາຊົນໃນເຂດຊົນນະບົດຫ່າງໄກສອກຫລີກໄດ້ຮັບຮູ້ ແລະ ເຂົ້າໃຈແຈ້ງຕໍ່ແນວທາງນະໂຍບາຍຂອງພັກ, ລະບຽບກົດໝາຍຂອງລັດ ກໍຄືການພັດທະນາເສດຖະກິດ-ສັງຄົມຂອງຊາດດີຂຶ້ນເທື່ອລະກ້າວ.  ສໍາລັບວຽກງານການພີມຈໍາໜ່າຍເຫັນວ່າທົ່ວປະເທດມີໂຮງພີມທັງໝົດ 103 ແຫ່ງ (ໂຮງພີມລັດ 7 ແຫ່ງ), ມີສໍານັກພີມ 20 ແຫ່ງ (ຂອງລັດ 2 ແຫ່ງ), ບໍລິສັດແປພາສາ 15 ແຫ່ງ, ບໍລິສັດອອກແບບໂຄສະນາ 12 ແຫ່ງ, ຮ້ານຈໍາໜ່າຍປື້ມ ແລະ ສິ່ງພີມຕ່າງໆ 16 ແຫ່ງ, ຫ້ອງອ່ານມີ 1.305 ຫ້ອງ, ຕູ້ສະມຸດເຄື່ອນທີ່ 8.153 ຕູ້, ຖົງສະໝຸດເຄື່ອນທີ່ 8.585 ຖົງ, ລົດສະໝຸດເຄື່ອນທີ່ 5 ຄັນ ແລະ ເຮືອນສະໝຸດເຄື່ອນທີ່ 2 ລໍາເພື່ອໃຫ້ບໍລິການສັງຄົມ ກໍຄືຜູ້ອ່ານໄດ້ຢ່າງກວ້າງຂວາງ ແລະ ທັງໝົດນັ້ນໄດ້ຢັ້ງຢືນໃຫ້ເຫັນວ່າພື້ນຖານໂຄງລ່າງວຽກງານສື່ມວນຊົນ ແລະ ການພີມຈໍາໜ່າຍໄດ້ຮັບການພັດທະນາທາງດ້ານຮູບແບບສີສັນ, ເນື້ອຫາສາລະມີຄວາມຫລາກຫລາຍນັບທັງທາງດ້ານປະລິມານ ແລະ ຄຸນນະພາບໄປສູ່ຄວາມທັນສະໄໝຂື້ນເທື່ອລະກ້າວ, ທັງສາມາດຕອບໂຕ້ຖອຍທໍານອງບິດເບືອນຄວາມຈິງ ກໍຄືກົນອຸບາຍຫັນປ່ຽນໂດຍສັນຕິຂອງອິດທິກໍາລັງປໍລະປັກທີ່ຫວັງມ້າງເພທໍາລາຍປະເທດເຮົາ.

ໃນໂອກາດນີ້, ທ່ານລັດຖະມົນຕີ ບໍ່ແສງຄໍາ ວົງດາລາ ກໍໄດ້ໃຫ້ກຽດໂອ້ລົມໃຫ້ທິດຊີ້ນໍາໃນການເຄື່ອນໄຫວວຽກງານສື່ມວນຊົນ ແລະ ການພີມຈໍາໜ່າຍໃນຕໍ່ໜ້າ, ຊຶ່ງກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຜົນງານທີ່ອົງການສື່ມວນຊົນ ແລະ ການພີມຈໍາໜ່າຍຍາດມາໄດ້ໃນໄລຍະຜ່ານມາ ທີ່ເຫັນວ່າມີການຂະຫຍາຍຕົວເຕີບໃຫຍ່ຂຶ້ນທັງໃນດ້ານປະລິມານ ແລະ ຄຸນນະພາບເທື່ອລະກ້າວ, ພ້ອມທັງຍົກໃຫ້ເຫັນວ່າປັດຈຸບັນປະເທດພວກເຮົາໄດ້ເປັນສະມາຊິກອາຊຽນ, ຊຶ່ງຈະເຮັດໃຫ້ພວກເຮົາສາມາດຍາດແຍ່ງໂອກາດໃນຫລາຍດ້ານ ເປັນຕົ້ນ: ດ້ານເສດຖະກິດ, ການຄ້າ, ການລົງທຶນ, ວັດທະນາທໍາ ແລະ ສັງຄົມ ກໍຄືວຽກງານສື່ມວນຊົນ ແລະ ການພີມຈໍາໜ່າຍ ທີ່ຈະສາມາດເຊື່ອມໂຍງກັບບັນດາປະເທດສະມາຊິກອາຊຽນເພື່ອຍາດແຍ່ງເອົາບົດຮຽນ ແລະ ເຕັກນິກອັນດີເພື່ອມາປັບປຸງພັດທະນາວຽກງານສື່ມວນຊົນ ແລະ ການພີມຈໍາໜ່າຍໃຫ້ນັບມື້ດີຂຶ້ນ, ພ້ອມທັງຮູ້ຫັນເອົາເງື່ອນໄຂ ແລະ ຄວາມກ້າວໜ້າຂອງເຕັກໂນໂລຊີດ້ານຂໍ້ມູນຂ່າວສານເພື່ອກະຈາຍຂໍ້ມູນຂ່າວສານການພັດທະນາປະເທດພາຍໃຕ້ແນວທາງນະໂຍບາຍຂອງພັກ ແລະ ລະບຽບກົດໝາຍຂອງລັດ ລວມເຖິງວັດທະນາທໍາຮີດຄອງປະເພນີອັນດີງາມຂອງຊາດອອກສູ່ສາຍຕາຊາວໂລກ ແລະ ຢາກເຮັດໄດ້ຄືແນວນັ້ນ, ກ່ອນອື່ນພວກເຮົາຕ້ອງພ້ອມກັນແກ້ໄຂສິ່ງບັນດາທ້າທາຍຕ່າງໆ ເປັນຕົ້ນ: ດ້ານລະບົບເຕັກໂນໂລຊີ, ຄວາມຮູ້ຄວາມສາມາດຂອງບຸກຄະລາກອນສື່ມວນຊົນ ແລະ ການພີມຈໍາໜ່າຍຂອງປະເທດເຮົາທີ່ເຫັນວ່າ ຍັງຫລຸດໂຕນກັບບັນດາປະເທດໃນພາກພື້ນ, ຂະນະດຽວກັນດ້ານທຶນຮອນກໍຍັງບໍ່ທັນເຂັ້ມແຂງ, ອິດທິພົນບົດບາດຂອງສື່ມວນຊົນເຮົາຕໍ່ເວທີພາກພື້ນ ແລະ ສາກົນກໍຍັງບໍ່ທັນສູງ, ນອກນີ້ການກະທົບຈາກສື່ສັງຄົມອອນລາຍກໍແມ່ນສິ່ງທ້າທາຍຕໍ່ວຽກງານສື່ຂອງພວກເຮົາ ຊຶ່ງບໍ່ພຽງມີມາດຕະການຮັບມືເທົ່ານັ້ນ, ແຕ່ພວກເຮົາຕ້ອງໄດ້ມີວິທີຄຸ້ມຄອງທີ່ດີອີກດ້ວຍ ແລະ ທັງໝົດນັ້ນມັນຮຽກຮ້ອງໃຫ້ພວກເຮົາຕ້ອງໄດ້ສຸມໃສ່ການພັດທະນາບຸກຄະລາກອນເປັນຕົ້ນຕໍ, ໂດຍສະເພາະແມ່ນການເພີ່ມທະວີສຶກສາອົບຮົມທາງດ້ານການເມືອງແນວຄິດໃຫ້ແກ່ພະນັກງານສື່ມວນຊົນ ແລະ ການພີມຈໍາໜ່າຍຢ່າງໜັກແໜ້ນ ເພື່ອຮັບປະກັນໃຫ້ການເຊີດຊູພາລະບົດບາດຂອງສື່ມວນຊົນເຮົາທີ່ເປັນກະບອກສຽງຂອງພັກ ແລະ ລັດ, ເປັນເວທີເສີມສ້າງສາຍພູກພັນລະຫວ່າງພັກ-ລັດ ແລະ ປະຊາຊົນໃຫ້ແໜ້ນແຟ້ນກົມກຽວ, ທັງຮັບປະກັນໃຫ້ການເຄື່ອນໄຫວວຽກງານຂອງສື່ ແລະ ການພີມຈໍາໜ່າຍຸຸ ຖືກຕ້ອງຕາມແນວທາງນະໂຍບາຍຂອງພັກ ແລະ ມີຄວາມຮັບພິຊອບຕໍ່ໜ້າທີ່ການເມືອງສູງກວ່າເກົ່າ.

+ສື່ມວນຊົນຈາກບັນດາປະເທດອາຊີ-ອາຊີຕາເວັນອອກ ສຽງໃຕ້ໄປທັດສະນະສຶກສາທີ່ນະຄອນຄຸນໝິງ ສປ ຈີນ

error: Content is protected !!