ສອງນາຍົກລັດຖະມົນຕີລາວ ແລະ ກຳປູເຈຍ ເຫັນດີແກ້ໄຂບັນຫາຊາຍແດນຮ່ວມກັນດ້ວຍສັນຕິ

ສອງນາຍົກລັດຖະມົນຕີລາວ ແລະ ກຳປູເຈຍ ເຫັນດີແກ້ໄຂບັນຫາຊາຍແດນຮ່ວມກັນດ້ວຍສັນຕິ - advert banner 728 90 728x90 - ສອງນາຍົກລັດຖະມົນຕີລາວ ແລະ ກຳປູເຈຍ ເຫັນດີແກ້ໄຂບັນຫາຊາຍແດນຮ່ວມກັນດ້ວຍສັນຕິ

ໃນວັນທີ 12 ສິງຫານີ້, ສົມເດັດ ອັກຄະມະຫາ ເສນາບໍດີ ເຕໂຈ ຮຸນເຊນ ນາຍົກລັດຖະມົນຕີແຫ່ງລາຊະອານາຈັກກຳປູເຈຍ ພ້ອມດ້ວຍຄະນະຜູ້ແທນຂັ້ນສູງຂອງກຳປູເຈຍ, ໄດ້ມາຢ້ຽມຢາມ ແລະ ເຮັດວຽກຢູ່ ສປປ ລາວ ເພື່ອປຶກສາຫາລືຊອກຊ່ອງທາງແກ້ໄຂບັນຫາຊາຍແດນລະຫວ່າງສອງປະເທດທີ່ກຳລັງເຄັ່ງຮ້ອນ.

ສອງນາຍົກລັດຖະມົນຕີລາວ ແລະ ກຳປູເຈຍ ເຫັນດີແກ້ໄຂບັນຫາຊາຍແດນຮ່ວມກັນດ້ວຍສັນຕິ - new3 - ສອງນາຍົກລັດຖະມົນຕີລາວ ແລະ ກຳປູເຈຍ ເຫັນດີແກ້ໄຂບັນຫາຊາຍແດນຮ່ວມກັນດ້ວຍສັນຕິ

ໃນໂອກາດນີ້, ສົມເດັດ ຮຸນເຊນ ໄດ້ພົບປະສອງຝ່າຍກັບທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ ທີ່ຫ້ອງວ່າການສຳນັກງານນາຍົກລັດຖະມົນຕີ ໂດຍສອງຝ່າຍໄດ້ປຶກສາຫາລືກ່ຽວກັບແນວທາງແກ້ໄຂບັນຫາຊາຍແດນຮ່ວມກັນຢູ່ລະຫວ່າງແຂວງອັດຕະປືຂອງລາວ ແລະ ແຂວງຊຽງແຕຣງຂອງກຳປູເຈຍຢ່າງກົງໄປກົງມາ ຖານມິດຕະພາບ, ບ້ານພີ່ເມືອງນ້ອງ, ການພົວພັນຮ່ວມມືທີ່ດີ ແລະ ມີມູນເຊື້ອອັນດີງາມນຳກັນ.

ພາຍຫລັງສຳເລັດການພົບປະ, ສອງນາຍົກລັດຖະມົນຕີລາວ ແລະ ກຳປູເຈຍ ໄດ້ຖະແຫລ່ງຂ່າວຮ່ວມຕໍ່ສື່ມວນຊົນກ່ຽວກັບຜົນຂອງການປຶກສາຫາລືຮ່ວມກັນໃນຄັ້ງນີ້, ຊຶ່ງສອງຝ່າຍໄດ້ຕົກລົງເຫັນດີຈະແກ້ໄຂບັນຫາຊາຍແດນຮ່ວມກັນດ້ວຍຄວາມເອົາໃຈໃສ່ ແລະ ຢ່າງສັນຕິ ເພື່ອບໍ່ໃຫ້ເກີດການປະທະກັນທາງດ້ານກຳລັງ, ພ້ອມທັງເປັນການຮັກສາສັນຕິພາບ, ສະຖຽນລະພາບ, ສ້າງຄວາມໄວ້ເນື້ອເຊື່ອໃຈ ແລະ ເພື່ອຜົນປະໂຫຍດລວມຂອງສອງປະເທດ ກໍຄືປະຊາຊົນສອງຊາດລາວ-ກຳປູເຈຍ ທີ່ຢູ່ລຽບຕາມຊາຍແດນ. ໃນນັ້ນ, ຝ່າຍລາວເຫັນດີຈະຖອນກຳລັງທະຫານທີ່ບໍ່ທັນຖອນໝົດ ພາຍຫລັງທີ່ສົມເດັດ ຮຸນເຊນ ໄດ້ສັ່ງໃຫ້ຢຸດໃນການສ້າງເສັ້ນທາງເຂົ້າໄປເຂດນັ້ນ ໃຫ້ຖອນອອກໝົດຈາກບໍລິເວນຊາຍແດນທີ່ຍັງຄົງຄ້າງໃຫ້ກັບຄືນກົມກອງ ແລະ ທີ່ຕັ້ງເດີມບໍ່ໃຫ້ກາຍຕອນເຊົ້າຂອງວັນທີ 13 ສິງຫາ 2017. ສ່ວນຝ່າຍກຳປູເຈຍ ກໍເຫັນດີຈະຖອນກອງກຳລັງທະຫານທີ່ໄປສະສົມໄວ້ໃນເຂດນັ້ນກັບຄືນກົມກອງ ເພື່ອເຮັດໃຫ້ສະຖານະການຄວາມເຄັ່ງຕຶງກ້າວເຂົ້າສູ່ຄວາມເປັນປົກກະຕິ ເພື່ອສ້າງຄວາມໝັ້ນໃຈໃຫ້ແກ່ປະຊາຊົນທັງສອງປະເທດ ແລະ ຈະບໍ່ໃຫ້ເກີດເຫດການທີ່ບໍ່ເພິ່ງປາຖະໜາ.

ສອງນາຍົກລັດຖະມົນຕີລາວ ແລະ ກຳປູເຈຍ ເຫັນດີແກ້ໄຂບັນຫາຊາຍແດນຮ່ວມກັນດ້ວຍສັນຕິ - lattana 1 - ສອງນາຍົກລັດຖະມົນຕີລາວ ແລະ ກຳປູເຈຍ ເຫັນດີແກ້ໄຂບັນຫາຊາຍແດນຮ່ວມກັນດ້ວຍສັນຕິ

ພ້ອມນັ້ນ, ສອງຝ່າຍຍັງໄດ້ເຫັນດີເປັນເອກະພາບມອບໃຫ້ກະຊວງການຕ່າງປະເທດ ກໍຄືຄະນະກຳມະການຊາຍແດນຮ່ວມລາວ-ກຳປູເຈຍ, ກໍາປູເຈຍ-ລາວ ສືບຕໍ່ພົບປະປຶກສາຫາລື ແລະ ເຈລະຈາແກ້ໄຂຈຸດຊາຍແດນທີ່ຍັງຄົງຄ້າງ ແລະ ບໍ່ໄດ້ປັກຫລັກໝາຍຊາຍແດນຮ່ວມກັນໃຫ້ສຳເລັດໂດຍໄວເທົ່າທີ່ຈະໄວໄດ້, ໂດຍອີງໃສ່ຜົນສຳເລັດທີ່ຜ່ານມາ ແລະ ອີງຕາມເອກະສານ ແລະ ຫລັກການທີ່ກ່ຽວຂ້ອງທີ່ສອງຝ່າຍໄດ້ຮັບຮອງເອົາຮ່ວມກັນແລ້ວ, ລວມທັງສົນທິສັນຍາ ແລະ ແຜນທີ່ຂອງສອງປະເທດທີ່ມີໃນປັດຈຸບັນເປັນພື້ນຖານໃນການປຶກສາຫາລືໃນຂັ້ນຕໍ່ໄປ, ທັງນີ້ກໍເພື່ອສ້າງຊາຍແດນໃຫ້ເປັນຊາຍແດນແຫ່ງສັນຕິພາບ, ມິດຕະພາບ, ການຮ່ວມມື ແລະ ການພັດທະນາ ແລະ ເຮັດໃຫ້ການປັກຫລັກໝາຍຊາຍແດນລະຫວ່າງລາວ-ກຳປູເຈຍກາຍເປັນມໍລະດົກສືບທອດໄວ້ໃຫ້ລູກຫລານສອງປະເທດ. ນອກຈາກນັ້ນ, ສອງຝ່າຍໄດ້ຕົກລົງເຫັນດີຈະສືບຕໍ່ສ້າງເງື່ອນໄຂໃຫ້ມີການປຶກສາຫາລື ແລະ ແລກປ່ຽນຄຳຄິດຄຳເຫັນນຳກັນຢ່າງເປັນປົກກະຕິເພື່ອຮ່ວມກັນແກ້ໄຂບັນຫາລະຫວ່າງສອງປະເທດ.

ໃນໂອກາດຢ້ຽມຢາມ ສປປ ລາວ ຄັ້ງນີ້, ສົມເດັດ ຮຸນເຊນ ຍັງໄດ້ເຂົ້າຢ້ຽມຂ່ຳນັບທ່ານ ບຸນຍັງ ວໍລະຈິດ ເລຂາທິການໃຫຍ່, ປະທານປະເທດ ແຫ່ງ ສປປ ລາວ ທີ່ຫ້ອງວ່າການສູນກາງພັກ. ໃນໂອກາດນີ້, ສົມເດັດ ຮຸນເຊນ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ໄດ້ນຳເອົາຄວາມຢື້ຢາມຖາມຂ່າວຈາກເຈົ້າຊີວິດ ໂນໂຣດົມ ສີຫາໂມນີ ເຖິງພະນະທ່ານປະທານປະເທດແຫ່ງ ສປປ ລາວ. ໃນໂອກາດດຽວກັນ, ທ່ານ ບຸນຍັງ ວໍລະຈິດ ກໍໄດ້ສະແດງຄວາມຊົມເຊີຍຕໍ່ຜົນການພົບປະຂອງສອງນາຍົກລັດຖະມົນຕີລາວ-ກຳປູເຈຍ ທີ່ໄດ້ແກ້ໄຂບັນຫາຮ່ວມກັນຢ່າງທັນການ.

error: Content is protected !!