ຮອງນາຍົກລັດຖະມົນຕີ ຕ້ອນຮັບການເຂົ້າຢ້ຽມຂໍ່ານັບຂອງ ຮອງລັດຖະມົນຕີຕ່າງປະເທດ ສະຫະລັດ ອາເມຣິກາ

ໃນວັນທີ 10 ມິຖຸນາ 2022, ທ່ານ ດຣ. ກິແກ້ວ ໄຂຄໍາພິທູນ, ຮອງນາຍົກລັດ ຖະມົນຕີ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ນ. ເວັນດີ ເຊີມານ, ຮອງລັດຖະມົນຕີຕ່າງປະເທດ ສະຫະລັດ ອາເມຣິກາ ພ້ອມດ້ວຍຄະນະ ທີ່ສໍານັກງານນາຍົກລັດຖະມົນຕີ ເນື່ອງໃນໂອກາດເດີນທາງມາຢ້ຽມຢາມເຮັດວຽກທາງການ ຢູ່ ສປປ ລາວ.

ໃນໂອກາດນີ້, ທ່ານ ດຣ. ກິແກ້ວ ໄຂຄໍາພິທູນ ໄດ້ສະແດງຄວາມຍິນດີຕ້ອນຮັບ, ຊົມເຊີຍ ແລະ ຕີລາຄາສູງຕໍ່ ການເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ ຂອງ ທ່ານ ນາງ ເວັນດີ ເຊີມານ ພ້ອມດ້ວຍຄະນະ ເຖິງວ່າຈະເປັນໄລຍະສັ້ນໆ ແຕ່ກໍມີຄວາມສໍາຄັນໃນການຮັດແໜ້ນ ແລະ ສົ່ງເສີມການພົວພັນຮ່ວມມື ລະຫວ່າງ ສປປ ລາວ ແລະ ສະຫະລັດ ອາເມຣິກາ ທີ່ມີມາໄດ້ 60 ກວ່າປີນັ້ນ ໃຫ້ນັບມື້ນັບຂະຫຍາຍຕົວເພີ່ມຂຶ້ນ.

ທ່ານ ຮອງນາຍົກລັດຖະມົນຕີ ໄດ້ຕີລາຄາສູງ ຕໍ່ຜົນສໍາເລັດ ແລະ ຄວາມຄືບໜ້າຂອງການຮ່ວມມື ລະຫວ່າງສອງປະເທດ ຕະຫຼອດໄລຍະທີ່ຜ່ານມາ ບົນພື້ນຖານການເປັນຄູ່ຮ່ວມແບບກວມລວມ ລາວ-ອາເມຣິກາ ໃນຂະແໜງການຕ່າງໆ ເຊັ່ນ ເສດຖະກິດ, ການຄ້າ, ສາທາລະນະສຸກ, ການສຶກສາ, ການຮ່ວມມືດ້ານມະນຸດສະທໍາໃນວຽກງານຂຸດຄົ້ນ ແລະ ຊອກຫາສິ່ງເສດເຫຼືອຂອງທະຫານອາເມຣິກາທີ່ຫາຍສາບສູນໃນປາງສົງຄາມຢູ່ລາວ, ການເກັບກູ້ລະເບີດບໍ່ທັນແຕກທີ່ຕົກຄ້າງຢູ່ ສປປ ລາວ ແລະ ອື່ນໆ.

ອັນເດັ່ນແມ່ນການຮ່ວມມືໃນການປ້ອງກັນ ແລະ ຄວບຄຸມການແຜ່ລະບາດຂອງພະຍາດ ໂຄວິດ-19 ເຊິ່ງ ລັດຖະບານ ແລະ ປະຊາຊົນ ສະຫະລັດ ອາເມຣິກາ ໄດ້ໃຫ້ການສະໜັບສະໜູນ ແລະ ຊ່ວຍເຫຼືອດ້ານທຶນຮອນ, ອຸປະກອນການແພດ ແລະ ຢາວັກຊິນຕ້ານໂຄວິດ-19 ແກ່ ສປປ ລາວ. ທ່ານ ຮອງນາຍົກລັດຖະມົນຕີ ຖືໂອກາດນີ້, ຕາງໜ້າໃຫ້ລັດຖະບານ ກໍ່ຄືປະຊາຊົນລາວ ສະແດງຄວາມຂອບໃຈເປັນຢ່າງສູງມາຍັງລັດຖະບານ ແລະ ປະຊາຊົນອາເມຣິກາ ທີ່ໄດ້ໃຫ້ການຊ່ວຍເຫຼືອແກ່ ສປປ ລາວ ໃນການຕ້ານ ແລະ ສະກັດກັ້ນການແຜ່ລະບາດຂອງພະຍາດ ໂຄວິດ-19 ແລະ ສະແດງຄວາມຫວັງວ່າ ລັດຖະບານ ກໍຄືປະຊາຊົນ ສະຫະລັດ ອາເມລິກາ ຈະສຶບຕໍ່ໃຫ້ການຊ່ວຍເຫຼືອແກ່ ສປປ ລາວ ໃນອານາຄົດ. ພ້ອມດຽວກັນນັ້ນ, ຍັງໄດ້ແຈ້ງໃຫ້ຊາບ ກ່ຽວກັບສະພາບການພັດທະນາເສດຖະກິດ-ສັງຄົມຢູ່ ສປປລາວ ໃນປະຈຸບັນ, ຈຸດສຸມຂອງລັດຖະບານ ແຕ່ນີ້ເຖີງ 2025, ວິໃສທັດ 2030 ແລະ ວາລະແຫ່ງຊາດ ໃນການແກ້ໄຂຄວາມຫຍູ້ງຍາກທາງດ້ານເສດຖະກິດ ແລະ ສັງຄົມ.

ທ່ານ ນາງ ເວັນດີ ເຊີມານ ກໍ່ໄດ້ສະແດງຄວາມຂອບໃຈມາຍັງ ທ່ານ ດຣ. ກິແກ້ວ ໄຂຄໍາພິທູນ, ຮອງນາຍົກລັດຖະມົນຕີ ທີ່ໄດ້ໃຫ້ກຽດຕ້ອນຮັບໃນຄັ້ງນີ້, ພ້ອມທັງແຈ້ງຈຸດປະສົງຂອງການເດີນທາງມາຢ້ຽມຢາມ ສປປ ລາວ ແມ່ນແນໃສ່ເສີມສ້າງການພົວພັນຮ່ວມມືສອງຝ່າຍໃຫ້ແຫນ້ນແຟ້ນ.

ທ່ານ ຮອງລັດຖະມົນຕີ ເວັນດີ ເຊີມານໄດ້ຕີລາຄາສູງການຮ່ວມມືສອງຝ່າຍ ໃນໄລຍະທີ່ຜ່ານມາ ແລະ ຢືນຢັນຈະສືບຕໍ່ການຮ່ວມມື, ສະໜັບສະໜູນ ແລະ ຊ່ວຍເຫຼືອ ສປປ ລາວ ໃນດ້ານຕ່າງໆ ເພື່ອເປັນການປະກອບສ່ວນເສີມຂະຫຍາຍການພົວພັນຮ່ວມມື ລະຫວ່າງສອງປະເທດ ໃນອະນາຄົດ.

ທ່ານ ນາງ ເວັນດີ ເຊີມານ ຍັງໄດ້ແຈ້ງວ່າ ລັດຖະບານ ອາເມຣິກາ ຈະເພີ່ມການຊ່ວຍເຫຼືອໃຫ້ແກ່ ສປປ ລາວ ໃນວຽກງານເກັບກູ້ລະເບີດບໍ່ທັນແຕກໃນປີ 2022 ລວມທັງແຜນການຈະສະໜອງ ວັກຊິນ ປ້ອງກັນ ໂຄວິດ-19 ສໍາລັບເດັກນ້ອຍ ຈໍານວນ 200.000 ຫຼອດ ໃນປີນີ້.

ໃນວັນດຽວກັນນີ້, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີຕ່າງປະເທດ ຍັງໄດ້ພົບປະເຮັດວຽກຮ່ວມກັບ ທ່ານ ນ. ເວັນດີ ເຊີມານ, ຮອງລັດຖະມົນຕີຕ່າງປະເທດ ສະຫະລັດ ອາເມຣິກາ ທີ່ກະຊວງການຕ່າງປະເທດ. ສອງຝ່າຍໄດ້ມີການປຶກສາຫາລືຫຼາຍບັນຫາທີ່ສໍາຄັນກ່ຽວກັບການພົວພັນຮ່ວມມື ລາວ-ອາເມຣິກາ ແນໃສ່ເສີມຂະຫຍາຍການພົວພັນຮ່ວມມືສອງຝ່າຍໃນຕໍ່ໜ້າ ແລະ ແລກປ່ຽນຄໍາເຫັນກ່ຽວກັບບັນຫາພົ້ນເດັ່ນຂອງພາກພື້ນ ແລະ ສາກົນ ທີ່ສອງຝ່າຍມີຄວາມສົນໃຈ.
ຂ່າວ;ພາບ: ກົມການຂ່າວ ກະຊວງການຕ່າງປະເທດ