ຮສສ ພິຈາລະນາ ຮັບຮອງເອົາບົດສະຫລຸບ ແລະ ແຜນການປະຕິບັດຍຸດທະສາດປົກປ້ອງສັງຄົມ 2021-2025
ໃນວັນທີ 10 ມິຖຸນາ 2022 ນີ້ ກະຊວງແຮງງານ ແລະ ສະຫວັດດີການສັງ ຄົມ (ຮສສ) ຈັດກອງປະຊຸມ ຄະນະກຳມາທິການ ປົກປ້ອງສັງຄົມຂັ້ນສູນກາງ ຄັ້ງທີ 1 ເພື່ອພິຈາລະນາ, ປະກອບຄຳຄິດ ຄຳເຫັນ, ຮັບຮອງເອົາບົດສະຫລຸບ ແລະ ທິດທາງການປະຕິບັດຍຸດທະສາດປົກປ້ອງສັງຄົມແຕ່ປີ 2016-2020 ແລະ ແຜນການຈັດຕັ້ງປະຕິບັດ 2021-2025 ທັງນີ້, ກໍເພື່ອຄວາມເປັນເອກະພາບສູງ ແລະ ເປັນພື້ນຖານໃຫ້ແກ່ບັນດາກະ ຊວງ, ຂະແໜງການ ໄດ້ຜັນຂະຫຍາຍແຜນດັ່ງກ່າວເຂົ້າສູ່ແຜນຕົວຈິງຂອງຂະແໜງການ.
ທ່ານ ນາງ ໃບຄຳ ຂັດທິຍະ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ໄດ້ກ່າວວ່າ: ກອງປະຊຸມຄັ້ງນີ້ ໄດ້ພ້ອມກັນຄົ້ນຄວ້າພິຈາລະນາ, ປະກອບຄຳຄິດຄຳເຫັນ, ຮັບຮອງເອົາບົດສະຫລຸບ ແລະ ທິດທາງການປະຕິບັດຍຸດທະສາດປົກປ້ອງສັງຄົມແຕ່ປີ 2016-2020 ແລະ ແຜນການຈັດຕັ້ງປະຕິບັດ 2021-2025 ໂດຍເນື້ອໃນຍຸດທະສາດແຫ່ງຊາດສະບັບນີ້ ປະກອບມີ 3 ເປົ້າໝາຍຫລັກເຊັ່ນ: ການພັດທະນາ ແລະ ສ້າງຄວາມເຂັ້ມແຂງໃຫ້ລະບົບປະກັນສຸຂະພາບ; ພັດທະນາ ແລະ ສ້າງຄວາມເຂັ້ມແຂງໃຫ້ລະບົບປະກັນສັງຄົມ; ພັດທະນາ ແລະ ສ້າງຄວາມເຂັ້ມແຂງໃຫ້ລະບົບສະຫວັດດີການສັງຄົມ, ເຊິ່ງ 3 ຈຸດປະສົງຫລັກມີ 20 ກິດຈະກຳໃຫຍ່ ແລະ 59 ໜ້າວຽກທີ່ເປັນພື້ນຖານ ໃຫ້ແກ່ການປະກັນສັງຄົມ, ມີມາດຕະການປະຕິບັດ ແລະ ຄວາມຕ້ອງການງົບປະມານ ທີ່ໄດ້ຮັບການຮ່ວມມື ແລະ ສະໜັບສະໜູນຈາກອົງການຈັດຕັ້ງສາກົນ ແລະ ປະເທດເພື່ອນມິດ.
ໂອກາດນີ້, ທ່ານ ນາງ ໃບຄຳ ຂັດທິຍະ ໄດ້ຮຽກຮ້ອງມາຍັງຜູ້ເຂົ້າຮ່ວມ ພ້ອມກັນປະກອບຄຳຄິດຄຳເຫັນ ໃຫ້ຫລາກຫລາຍ ເພື່ອເປັນຂໍ້ມູນ ໃຫ້ກອງເລຂານຳເອົາໄປປັບປຸງ ໃຫ້ມີເນື້ອໃນມີຄວາມຊັດເຈນ ແລະ ສອດຄ່ອງກັບຄວາມຈຳເປັນຕົວຈິງຂອງ ສປປ ລາວ ພວກເຮົາ ແລະ ເພື່ອເຮັດໃຫ້ການຈັດຕັັ້ງປະຕິບັດເປົ້າໝາຍ ຍຸດທະສາດການປົກປ້ອງສັງຄົມແຫ່ງຊາດ ໄລຍະ 2021-2025 ບັນລຸຜົນສໍາເລັດຕາມແຜນການກໍານົດ ໂດຍມີບາງມາດຕະການທີ່ຈະຕ້ອງໄດ້ຈັດຕັັ້ງປະຕິບັດ ຄື: ພ້ອມກັນເອົາໃຈໃສ່ຈັດຕັ້ງເຊື່ອມຊຶມບັນດາເປົ້າໝາຍ, ແຜນວຽກຈຸດສຸມ ແລະ ບັນດາກິດຈະກຳ ຂອງຍຸດທະສາດ ໂດຍສະເພາະວຽກຈຸດສຸມ ໃນປີ 2023 ຢ່າງເລິກເຊິ່ງ ແລະ ກວ້າງຂວາງ, ສ້າງຄວາມຮັບຮູ້ ຄວາມເຂົ້າໃຈ ແລະ ມີຄວາມເປັນເອກະພາບ ໃນແຕ່ລະດ້ານ ໃຫ້ມີປະສິດທິຜົນ ຕາມທີ່ກໍານົດໄວ້; ເພີ່ມທະວີການປະສານງານ ແລະ ຊຸກຍູ້ບັນດາຂະແໜງການທີ່ກ່ຽວຂ້ອງ, ອົງການປົກຄອງທ້ອງຖິ່ນ, ບັນດາພາກສ່ວນເສດຖະກິດ ທັງພາກລັດ ແລະ ເອກະຊົນ ໃຫ້ມີສ່ວນຮ່ວມໃນການຈັດຕັັ້ງປະຕິບັດຍຸດທະສາດການປົກປ້ອງສັງຄົມແຫ່ງຊາດ ກໍຄື ທິດທາງແຜນການສະບັບນີ້ຢ່າງກວ້າງຂວາງ; ຄະນະກໍາມະການ ແລະ ກອງເລຂາຄະນະກໍາມະການ ເພື່ອການປົກປ້ອງສັງຄົມ ຕ້ອງເຊີດຊູຄວາມເປັນເຈົ້າການ ແລະ ຍົກສູງຄວາມຮັບຜິດຊອບໃນການເຊື່ອມຊຶມ, ຜັນຂະຫຍາຍ, ທິດທາງແຜນການ ໂດຍຜ່ານການປະເມີນຜົນ, ສະຫລຸບ ແລະ ລາຍງານວຽກ ທີ່ຕິດພັນກັບພາລະບົດບາດຂອງຂະແໜງການຕົນ ເປັນແຕ່ລະໄລຍະ; ຕ້ອງເປັນເຈົ້າການເຊື່ອມສານ ບັນດາໜ້າວຽກຈຸດສຸມ ແລະ ກິດຈະກໍາ ເຂົ້າແຜນພັດ ທະນາຂອງຕົນ ລວມທັງການຍາດແຍ່ງແຫ່ງທຶນຊ່ວຍເຫລືອ ແລະ ເຕັກນິກວິຊາການຈາກຕ່າງປະເທດ, ພາກພື້ນ ແລະ ສາກົນເພື່ອປະກອບສ່ວນເຂົ້າໃນການຈັດຕັັ້ງປະຕິບັດ ແລະ ລາຍງານໃຫ້ກອງເລຂາສັງລວມ ລາຍງານຄະນະກໍາມະການໃນແຕ່ລະໄລຍະ ໃຫ້ທັນການ.
