ມາເລເຊຍ ມອບວັກຊິນປ້ອງກັນໂຄວິດ-19 ຈໍານວນ 500.000 ໂດສ ໃຫ້ແກ່ ສປປ ລາວ

ຂປລ. ໃນວັນທີ 20 ມິຖຸນາ 2002 ນີ້, ສປປ ລາວ ໄດ້ຮັບວັກຊິນປ້ອງກັນພະຍາດໂຄວິດ-19 ຍີ່ຫໍ້ ຊີໂນຟາມ ຈາກລັດຖະບານແຫ່ງ ມາເລເຊຍ ຈຳນວນ 500.000 ໂດສ ຊຶ່ງວັກຊິນຈຳນວນດັ່ງກ່າວ ໄດ້ຂົນສົ່ງມາຮອດສະໜາມບິນສາກົນວັດໄຕ ແລະ ໄດ້ມີພິທີມອບ-ຮັບຢາວັກຊິນ ຢູ່ສະໝາມບິນດັ່ງກ່າວ ຕາງໜ້າມອບໂດຍ ທ່ານ ໂມດ ໄອນີ ອາຕັນ (Mohd Aini Atan) ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ມາເລເຊຍ ປະຈຳ ສປປ ລາວ ແລະ ຕາງໜ້າຮັບໂດຍ ທ່ານ ໄພວັນ ແກ້ວປະເສີດ ຮອງລັດຖະມົນຕີກະຊວງສາທາລະນະສຸກ, ພ້ອມດ້ວຍພະນັກງານທັງສອງຝ່າຍເຂົ້າຮ່ວມ.

ການຊ່ວຍເຫຼືອດ້ານວັກຊິນ ຈາກລັດຖະບານມາເລເຊຍ ໃຫ້ແກ່ ລັດຖະບານ ແຫ່ງ ສປປ ລາວ ຄັ້ງນີ້ແມ່ນເປັນຄັ້ງທີ 2, ມາເຖິງປັດຈຸບັນ ສປປ ລາວ ໄດ້ຮັບການຊ່ວຍເຫຼືອດ້ານວັກຊິນ ຈາກລັດຖະບານມາເລເຊຍ ຈໍານວນ 780.400 ໂດສ ຊຶ່ງເປັນການປະກອບສ່ວນຢ່າງໃຫຍ່ຫຼວງເຂົ້າໃນການຊຸກຍູ້ໃຫ້ປະເທດລາວ ດຳເນີນນະໂຍບາຍພູມຄຸ້ມກັນແຫ່ງຊາດ ແລະ ສາມາດບັນລຸການສັກວັກຊິນ ໃຫ້ແກ່ພົນລະເມືອງລາວ ໃຫ້ໄດ້ 80% ໃນປີ 2022 ກໍຄື ການເພີ່ມທະວີການສ້າງພູມຄຸ້ມກັນໃຫ້ປະຊາຊົນລາວ ເພື່ອເສີມສ້າງຄວາມເຂັ້ມແຂງໃນການປ້ອງກັນການແຜ່ລະຍາດຂອງ ພະຍາດໂຄວິດ-19 ຢູ່ໃນ ສປປ ລາວ.