ສິງກະໂປພົບຜູ້ຕິດເຊື້ອໝາກສຸກລີງຄົນທຳອິດ ເປັນຊາວອັງກິດອາຍຸ 42 ປີ ສ.ເກົາຫລີ ພົບກໍລະນີສົງໄສ 2 ຄົນ
ສາທາລະນະສຸກສິງກະໂປກວດພົບຜູ້ຕິດເຊື້ອພະຍາດໝາກສຸກລີງເປັນຄົນທຳອິດ ເດີນທາງເຂົ້າ-ອອກປະເທດນັບແຕ່ກາງເດືອນມິຖຸນາ ມີຜູ້ສຳຜັດໃກ້ຊິດ 13 ຄົນ.
ກະຊວງສາທາລະນະສຸກສິງກະໂປອອກຖະແຫລງການໃນຄືນວັນທີ 21 ມິຖຸນາ 2022 ວ່າ: ມີການກວດພົບຜູ້ຕິດເຊື້ອພະຍາດໝາກສຸກລີງ 1 ຄົນ ຖືເປັນຄົນທຳອິດຂອງປະເທດ ແລະ ຄົນທຳອິດຂອງພາກພື້ນອາຊີຕາເວັນອອກສຽງໃຕ້ ທີ່ມີການກວດພົບຜູ້ຕິດເຊື້ອທີ່ເດີນທາງມາຈາກນອກທະວີບອາຟຣິກາ.
ຜູ້ຕິດເຊື້ອຄົນນີ້ເປັນຊາຍຊາວອັງກິດ ອາຍຸ 42 ປີ ອາຊີບພະນັກງານຕ້ອນຮັບໃນເຮືອບິນຂອງສາຍການບິນແຫ່ງໜຶ່ງ ເຂົ້າມາໃນປະເທດຄັ້ງທຳອິດໃນວັນທີ 15-17 ມິຖຸນາ ແລະ ບິນກັບເຂົ້າມາອີກໃນວັນທີ 19 ມິຖຸນາ ກ່ອນຈະກວດພົບເຊື້ອໝາກສຸກລີງໃນວັນທີ 20 ມິຖຸນາຜ່ານມາ.
ປັດຈຸບັນ ຜູ້ຕິດເຊື້ອຄົນນີ້ໄດ້ເຂົ້າຮັບການປິ່ນປົວຢູ່ສູນຄວບຄຸມພະຍາດຕິດຕໍ່ແຫ່ງຊາດຂອງສິງກະໂປ (NCID). ຫລ້າສຸດຍັງມີອາການຄົງທີ່ ໂດຍເຈົ້າໜ້າທີ່ໄດ້ສອບສວນພະຍາດ ແລະ ກວດພົບຜູ້ສຳຜັດໃກ້ຊິດແລ້ວ 13 ຄົນ ທັງໝົດຈະຕ້ອງເຂົ້າຮັບການກັກຕົວເປັນເວລາ 21 ວັນຕາມາດຕະການຕໍ່ໄປ.
ກ່ອນໜ້ານີ້ເມື່ອປີ 2019 ສິງກະໂປເຄີຍກວດພົບຜູ້ຕິດເຊື້ອພະຍາດໝາກສຸກລີງ 1 ຄົນ ເປັນຊາຍຊາວໄນຈີເຣຍອາຍຸ 38 ປີ ໃນຕອນນັ້ນມີຜູ້ສຳຜັດໃກ້ຊິດທັງໝົດ 22 ຄົນ ໂດຍຫລັງຈາກທັງໝົດເຂົ້າຮັບການກັກຕົວເປັນເວລາ 21 ວັນແລ້ວ ກໍໄດ້ຮັບການຢືນຢັນວ່າບໍ່ມີອາການຂອງພະຍາດແຕ່ຢ່າງໃດ.
ຫລ້າສຸດວັນທີ 22 ມິຖຸນາ, ສ.ເກົາຫລີ ມີລາຍງານການພົບຜູ້ຕິດເຊື້ອທີ່ສົງໄສວ່າອາດເປັນພະຍາດໝາກສຸກລີງ 2 ຄົນ ຄົນທຳອິດເປັນຊາວຕ່າງປະເທດທີ່ເດີນທາງເຂົ້າມາເມື່ອວັນທີ 20 ມິຖຸນາ ແລະ ອີກຄົນໜຶ່ງເປັນຊາວ ສ.ເກົາຫລີ ທີ່ເດີນທາງກັບມາຈາກເຢຍລະມັນໃນວັນທີ 21 ມິຖຸນາ. ປັດຈຸບັນ ທັງສອງໄດ້ຖືກກັກຕົວໄວ້ລໍຖ້າຜົນກວດຢືນຢັນ.
ອ້າງອີງ:
https://www.straitstimes.com/…/spore-confirms-imported…
https://www.channelnewsasia.com/…/monkeypox-singapore…
https://en.yna.co.kr/view/AEN20220622000252315?section=national/national
