ລັດວິສາຫະກິດລາວບໍລິການສິນຄ້າຜ່ານແດນ ລັດຖະບານ ຖືຮຸ້ນ 51% ແລະ ບໍລິສັດໂລຈິດສຕິກ ລາວ ຈໍາກັດ ຖືຮຸ້ນ 49%.

ວັນທີ 20 ມິຖຸນາ 2022 ລັດວິສາຫະກິດລາວບໍລິການສິນຄ້າຜ່ານແດນ (ລລບສ) ລະຫວ່າງ ກະຊວງການເງິນ ແລະ ບໍລິສັດສິດທິໂລຈິດສຕິກ ລາວ ຈໍາກັດ ເຊັນສັນຍາຊື້-ຂາຍຮຸ້ນ ແລະ ເຊັນສັນຍາຮ່ວມຮຸ້ນ ໂດຍການຮ່ວມລົງນາມ ລະຫວ່າງ ທ່ານ ສອນເພັດ ອິນທະວົງ ຫົວໜ້າກົມປະຕິຮູບລັດວິສາຫະກິດ ແລະ ການປະກັນໄພ ກະຊວງການເງິນ ແລະ ທ່ານ ວຽງຄອນ ສິດທິໄຊ ຜູ້ອໍານວຍການບໍລິສັດ ສິິດທິໂລຈິດສຕິກລາວ ຈໍາກັດ, ມີ ທ່ານ ພູດົງ ສຸຂະວົງ ຜູ້ອໍານວຍການໃຫຍ່ ລັດວິສາຫະກິດລາວບໍລິການສິນຄ້າຜ່ານແດນ ແລະ ທ່ານຮອງປະທານບໍລິສັດ ປີໂຕຣລ້ຽມເທຣດດິ້ງ ລາວມະຫາຊົນ ຮ່ວມເຊັນເປັນສັກຂີພິຍານ ໂດຍມີ ທ່ານ ບຸນປອນ ວັນນະຈິດ ຮອງລັດຖະມົນຕີກະຊວງການເງິນ ແລະ ພາກສ່ວນກ່ຽວຂ້ອງ ເຂົ້າຮ່ວມ, ໃນນັ້ນ, ກະຊວງການເງິນໃນນາມຕາງໜ້າລັດຖະບານ ຖືຮຸ້ນ 51% ແລະ ບໍລິສັດ ໂລຈິດສຕິກ ລາວ ຈໍາກັດ ຖືຮຸ້ນ 49%.

ການເຊັນສັນຍາຄັ້ງນີ້, ທັງສອງຝ່າຍຕົກລົງເປັນເອກະພາບໃນການກໍານົດເນື້ອໃນ ແລະ ເງື່ອນໄຂວ່າດ້ວຍຮ່ວມຮຸ້ນຢູ່ໃນ ລັດວິສາຫະກິດລາວບໍລິການສິນຄ້າຜ່ານແດນ ໂດຍປະຕິບັດຕາມນະໂຍບາຍຂອງພັກ ແລະ ລັດຖະບານລາວ ກ່ຽວກັບການສົ່ງເສີມການຮ່ວມມືລະຫວ່າງພາກລັດ ແລະ ເອກະຊົນ ເພື່ອຮ່ວມກັນພັດທະນາດໍາເນີນທຸລະກິດ ລະບົບສາງ ລວມທັງການຄຸ້ມຄອງບໍລິຫານການດໍາເນີນງານ ແລະ ດ້ານການເງິນຂອງລັດວິສາຫະກິດລາວບໍລິການສິນຄ້າຜ່ານແດນ ໃຫ້ມີຄວາມເຂັ້ມແຂງ, ສາມາດເຊື່ອມໂຍງກັບພາກພື້ນ ແລະ ສາກົນ;

ສອງຝ່າຍໄດ້ຕົກລົງເປັນເອກະພາບກັນວ່າ ການເຊັນສັນຍາສະບັບນີ້ ເຮັດໃຫ້ຜູ້ຮັບໂອນຮຸ້ນ ກໍຄື ບໍລິສັດ ສິດທິໂລຈິດສຕິກ ລາວ ຈໍາກັດ ເປັນຜູ້ຖືຮຸ້ນໃນລັດວິສາຫະກິດ ລາວບໍລິການສິນຄ້າຜ່ານແດນ 49% ແລະ ໃຫ້ຜູ້ຮັບໂອນກາຍເປັນຜູ້ຖືຮຸ້ນຂອງ ລັດວິສາຫະກິດລາວ ບໍລິການສິນຄ້າຜ່ານແດນ ເຊິ່ງມີສິດເຂົ້າຮ່ວມໃນການຄຸ້ມຄອງ ແລະ ບໍລິ ຫານລັດວິສາຫະກິດລາວ ບໍລິການສິນຄ້າຜ່ານແດນ ຕາມຫລັກການ, ລະບຽບການ ແລະ ຂັ້ນຕອນທີ່ໄດ້ກໍານົດໄວ້ໃນກົດໝາຍທີ່ກ່ຽວຂ້ອງຂອງ ສປປ ລາວ, ສັນຍາຮ່ວມຮຸ້ນ ແລະ ລະບຽບພາຍໃນຂອງ ລັດວິສາຫະກິດລາວ ບໍລິການສິນຄ້າຜ່ານແດນ ລວມທັງຫລັກການປະຕິບັດທົ່ວໄປໃນການຄຸ້ມຄອງບໍລິຫານ.