ນາໆຊາດທະຍອຍຊ່ວຍອັບການິດສະຖານ ບັນເທົາຄວາມເດືອດຮ້ອນຜູ້ປະສົບໄພແຜ່ນດິນໄຫວ
ການຊ່ວຍເຫລືອດ້ານມະນຸດສະທຳຈາກນາໆປະເທດ ທະຍອຍເຂົ້າສູ່ອັບການິດສະຖານ ເພື່ອມອບໃຫ້ປະຊາຊົນທີ່ເດືອດຮ້ອນຢ່າງໜັກ ຈາກເຫດແຜ່ນດິນໄຫວຄັ້ງໃຫຍ່ໃນອາທິດນີ້.
ວັນທີ 24 ມິຖຸນາ 2022, ສຳນັກຂ່າວຕ່າງປະເທດລາຍງານວ່າ: ຈາກເຫດແຜ່ນດິນໄຫວຮຸນແຮງ 6,1 ແມກນິຈູດ ໃນພາກຕາເວັນອອກຂອງອັບການິດສະຖານ ໃນວັນທີ 22 ມິຖຸນາຜ່ານມາ ສົ່ງຜົນໃຫ້ມີຜູ້ເສຍຊີວິດ 1.000 ກວ່າຄົນ ແລະ ໄດ້ຮັບບາດເຈັບອີກຫລາຍກວ່າ 2.000 ຄົນ ໂດຍສະເພາະຢູ່ແຂວງປັກຕິກາ ແລະ ແຂວງໂຄສ ຖືເປັນແຜ່ນດິນໄຫວຄັ້ງຮຸນແຮງທີ່ສຸດໃນຮອບ 20 ປີຂອງອັບການິດສະຖານ ນັບແຕ່ແຜ່ນດິນໄຫວໃນພູຮິນດູກູ ເດືອນມີນາ 2002 ມີຜູ້ເສຍຊີວິດປະມານ 1.100 ຄົນ.
ກະຊວງໄພພິບັດຂອງອັບການິດສະຖານລາຍງານເພີ່ມຕື່ມວ່າ: ເຮືອນ 10.000 ກວ່າຫລັງໄດ້ຮັບຄວາມເສຍຫາຍ. ຂະນະທີ່ກະຊວງສາທາລະນະສຸກຂອງອັບການິດສະຖານ ຂໍການຊ່ວຍເຫລືອຈາກປະຊາຄົມໂລກ ໃນດ້ານຢາ ແລະ ອຸປະກອນການແພດ ໂດຍອິນເດຍ, ປາກິດສະຖານ, ຍີ່ປຸ່ນ, ສ.ເກົາຫລີ, ອາເມລິກາ, ອາຣັບເອມິເຣດ (UAE) ແລະ ໄຕ້ຫວັນ ປະກາດກຽມມອບການຊ່ວຍເຫລືອດ້ານມະນຸດສະທຳໃຫ້ອັບການິດສະຖານ.
ຂະນະທີ່ລາຍງານຂອງສະຫະປະຊາຊາດ (UN) ລະບຸວ່າ: ໄດ້ຮັບການລະດົມທຶນສະໜັບສະໜູນຈາກນາໆປະເທດພຽງ 1 ໃນ 3 ຂອງທີ່ຕັ້ງເປົ້າໄວ້ 4.400 ລ້ານໂດລາສະຫະລັດ ເພື່ອຈັດສັນການຊ່ວຍເຫລືອດ້ານມະນຸດສະທຳໃຫ້ຊາວອັບການິດສະຖານໃນປີນີ້.
ອ້າງອີງ:
- https://www.theguardian.com/global-development/2022/jun/23/afghan-earthquake-survivors-dig-hand-rescuers-struggle-reach-area
- https://www.aljazeera.com/news/2022/6/23/afghanistan-earthquake-survivors-dig-by-hand-as-aid-is-delayed
