ທະນາຄານໂລກ ຊ່ວຍເຫລືອແກ້ໄຂສະພາບຂາດສະບຽງອາຫານຢູ່ອາຟຣິກາ 2,3 ຕື້ໂດລາ

ວິທະຍຸກະຈາຍສຽງຫວຽດນາມລາຍງານວ່າ: ວັນທີ 22 ມິຖຸນາ 2022 ຜ່ານມາ, ທະນາຄານໂລກ (WB) ປະກາດວ່າໄດ້ຮັບຮອງເອົາໂຄງການທີ່ມີມູນຄ່າ 2,3 ຕື້ໂດລາ ເພື່ອຊ່ວຍບັນດາປະເທດ ອາຟຣິກາ ຕາເວັນອອກ ແລະ ອາຟຣິກາ ໃຕ້ ຕ້ານສະພາບການຂາດສະບຽງອາຫານ. ບ້ວງງົບປະມານນີ້ຈະຊ່ວຍເພີ່ມທະວີຄວາມສາມາດຟື້ນຟູຂອງລະບົບສະບຽງອາຫານໃນພາກພື້ນກໍ່ຄືຄວາມສາມາດແກ້ໄຂສະພາບຂາດສະບຽງອາຫານ ຊຶ່ງນັບມື້ນັບເພີ່ມຂຶ້ນ.

ທ່ານ ຮາເຟຊ ແກເນັມ ຮອງປະທານທະນາຄານໂລກ ຮັບຜິດຊອບເຂດ ອາຟຣິກາ ຕາເວັນອອກ ແລະ ອາຟຣິກາໃຕ້ ໃຫ້ຮູ້ວ່າ: ນີ້ແມ່ນການເຄື່ອນໄຫວຫລາຍຂົງເຂດທໍາອິດຂອງ WB ໃນພາກພື້ນເພື່ອແນໃສ່ຫລຸດຜ່ອນຈຳນວນປະຊາກອນທີ່ພວມກຳລັງປະເຊີນກັບໄພອຶດຫິວຢູ່ອາຟຣິກາ ຕາເວັນອອກ ແລະ ອາຟຣິກາໃຕ້. ປັດຈຸບັນ, ມີປະຊາກອນເກືອບ 30 ລ້ານຄົນ ຢູ່ມາດາກາສກ້າ ແລະ ເອທິໂອປີ ຕ້ອງປະເຊີນໜ້າກັບສະພາບຂາດຄວາມໝັ້ນຄົງດ້ານສະບຽງອາຫານຍ້ອນໄພແຫ້ງແລ້ງ ຊຶ່ງຈະແມ່ນຄາດໝາຍບຸລິມະສິດແຖວໜ້າຂອງໄລຍະທຳອິດຂອງໂຄງການ.