ເມົາລົດ ເກີດຈາກຫຍັງ ປ້ອງກັນ ແລະ ແກ້ໄດ້ຫລືບໍ່ ?

ອາການເມົາລົດ ເມົາເຮືອ ເມົາເຮືອບິນ ອາດເປັນບັນຫາອຸກໃຈຂອງໃຜຫລາຍຄົນ ໂດຍສະເພາະຜູ້ທີ່ຕ້ອງເດີນທາງເປັນປະຈຳ ໂດຍມັກເກີດຂຶ້ນເມື່ອໂດຍສານຍານພາຫະນະທີ່ມີການແກ່ວງໂຕຂະນະເຄື່ອນທີ່ເປັນເວລາດົນ ສົ່ງຜົນໃຫ້ຮູ້ສຶກວິນຫົວ ປຸ້ນທ້ອງ ປວດຮາກ ຫລື ອາດຈະຮາກຮ່ວມນຳ ເຊິ່ງອາການດັ່ງກ່າວສາມາດປ້ອງກັນ ແລະ ຫລຸດຜ່ອນໄດ້ ໂດຍການປັບປ່ຽນພຶດຕິກຳບາງຢ່າງລະຫ່ວາງການເດີນທາງ ແລະ ອາດໃຊ້ຢາແກ້ເມົາລົດ (ຢາແກ້ວິນ) ຕາມຄຳແນະນຳຂອງແພດ.

• ອາການເມົາລົດເປັນແນວໃດ ? ເປັນອາການທີ່ເກີດຂຶ້ນສະເພາະບຸກຄົນ ດັ່ງນັ້ນ ຂະນະໂດຍສານຍານພາຫະນະໃດໆກໍຕາມ ຈຶ່ງມີທັງງຄົນທີ່ມີອາການເມົາລົດ ແລະ ຄົນທີ່ບໍ່ມີອາການ ເຊິ່ງສັນຍານທີ່ບົ່ງບອກວ່າກຳລັງຈະເມົາລົດ ໄດ້ແກ່ :

1. ວິນຫົວ.
2. ຮູ້ສຶກບໍ່ສະບາຍທທ້ອງ, ປຸ້ນທ້ອງ, ປວດຮາກ ແລະ ຮາກ.
3. ບໍ່ຢາກອາຫານ.
4. ມີເຫື່ອອອກ.
5. ເດັກນ້ອຍທີ່ເມົາລົດອາດຈະໜ້າເຫລືອງຈືດ,​ ຢູ່ບໍ່ສະບາຍໂຕ, ຫາວນອນ ຫລື ຮ້ອງໄຫ້ຮ່ວມນຳ.

• ອາການເມົາລົດເກີດຂຶ້ນໄດ້ແນວໃດ ? ອາການເມົາລົດ ເມົາເຮືອ ຫລື ເມົາເຮືອບິນ ເກີດຂຶ້ນເມື່ອປະສາດຮັບຮູ້ການເຄື່ອນໄຫວຂອງຫູຊັ້ນໃນເຮັດວຽກບໍ່ປະສານກັບຮູບທີ່ດວງຕາເບິ່ງເຫັນ ສະໝອງຈຶ່ງໄດ້ຮັບສັນຍານທີ່ຂັດແຍ່ງກັນ ຈົນມີອາການເມົາລົດຕາມມາ ໂດຍອາດເກີດຈາກການໂດຍສານລົດທີ່ແກ່ວງໄປແກ່ວງມາ, ບໍ່ນິ້ງ ຫລື ຂົນເທິງຖະໜົນທີ່ຄົດໂຄ້ງດົນເກີນໄປ, ການນັ່ງເຮືອທີ່ໂຍກໄປໂຍກມາຕາມຄື້ນນຳ້, ການໂດຍສານເຮືອບິນ ຫລື ແມ່ນແຕ່ລະຫວ່າງຫລິ້ນເຄື່ອງຫລິ້ນຢູ່ສວນສະໜຸກຕ່າງໆ ເຊັ່ນ : ລົດໄຟເຫາະ, ຊິງຊ້າສະຫວັນ ກໍອາດເຮັດໃຫ້ມີອາການໄດ້ຄືກັນ.
• ທັງນີ້ບຸກຄົນໃນກຸ່ມຕໍ່ໄປນີ້ອາດສ່ຽງເກີດອາການເມົາລົດໄດ້ຫລາຍກ່ວາຄົນທົ່ວໄປ :

1. ຜູ້ທີ່ມີປະສາດຮັບຮູ້ການເຄື່ອນໄຫວໄວ.
2. ແມ່ຍິງທີ່ກຳລັງເປັນປະຈຳເດືອນ, ຖືພາ ຫລື ຢູ່ໃນໄລຍະຮັບການບຳບັດດ້ວຍຮໍໂມນ.
3. ຜູ້ປ່ວຍໄມເກຣນ.
4. ເດັກນ້ອຍອາຍຸ 2 – 12 ປີ.
5. ຜູ້ທີ່ກຳລັງໃຊ້ຢາບາງຊະນິດດ ເຊັັ່ນ : ຢາປົວພະຍາດຫອບຫືດ, ຢາຕ້ານອາການຊຶມເສົ້າ, ຢາໄອບູໂປຣເຟນ, ຢານາພຣັອກເຊນ ເປັນຕົ້ນ.
6. ຜູ້ທີ່ມີພຶດຕິກຳໃຊ້ສານເສບຕິດ.

• ຫລຸດຜ່ອນອາການເມົາລົດໄດ້ແນວໃດ ? ອາການເມົາລົດ ເມົາເຮືອ ຫລື ເມົາເຮືອບິນ ສາມາດປ້ອງກັນ ແລະ ຫລຸດຜ່ອນອາການໄດ້ດ້ວຍຕົນເອງ ພຽງປະຕິບັດຕາມຄຳແນະນຳດັ່ງຕໍ່ໄປນີ້ :

1. ຫາກນັ່ງລົດຄວນເລືືອກບ່ອນນັ່ງຢູ່ເບາະໜ້າ, ສ່ວນການໂດຍສານເຮືອ ຫລື ເຮືອບິນ ກໍຄວນເລືອກບ່ອນນັ່ງແຖວກາງລຳ ເພື່ອຫລຸດແຮງກະແທກ, ແຮງແກ່ວງ ຫລື ການໂຍກໄປມາຂອງຍານພາຫະນະ.
2. ຂະນະໂດຍສານລົດໃຫ້ແນມໄປທາງດ້ານໜ້າ ໂດຍໃຫ້ສາຍຕາຈົດຈ້ອງໄປຍັງຈຸດທີ່ຢຸດຢູ່ກັບບ່ອນ ເຊັ່ນ : ຕຶກສູງ, ເສັ້ນຂອບຟ້າ ເປັນຕົ້ນ.
3. ຫລີກເວັ້ນການຈ້ອງເບິ່ງສິ່ງທີ່ເຄື່ອນໄຫວໄດ້ ເຊັ່ນ : ລົດທີ່ກຳລັງແລ່ນຢູ່ເທິງຖະໜົນ ຫລື ເຮືອລຳອື່ນທີ່ແລ່ນຜ່ານໄປມາ.
4. ຫລັບຕາ ແລະ ກຳນົດລົມຫາຍໃຈເຂົ້າອອກເລິກໆ.
5. ຫາກຢູ່ໃນພາຫະນະສ່ວນໂຕ ອາດລົມກັບຄົນອື່ນທ ຫລື ຮ້ອງເພງເພື່ອດຶງຄວາມສົນໃຈໄປທາງອື່ນ.
6. ແວ່ຈອດລົດຕາມຈຸດຕ່າງງໆພັກລົດລະຫວ່າງທາງ ເພື່ອຜ່ອນຄາຍທ່າທາງການນັ່ງ, ພັກດື່ມນຳ້ ຫລື ສືບອາກາດພາຍນອກ.
7. ຫລຫີກເວັ້ນການອ່ານໜັງສື ຫລື ໃຊ້ອຸປະກອນອີເລັກໂຕຣນິກທຸກຊະນິດລະຫ່ວາງການເດີນທາງ.
8. ຫລີກເວັ້ນການກິນອາຫານຄາບໃຫຍ່ໆ ແລະະ ອາຫານທີ່ມີລົດຊາດເຂັ້ມຂຸ້ນ, ເຜັດຫລາຍ, ເຄັມຫລາຍ, ມັນຫລາຍ ລວມທັງເຄື່ອງດື່ມອານກໍຮໍ ແລະ ເຄື່ອງດື່ມທີ່ມີກາເຟອີນກ່ອນໂດຍສານຍານພາຫະນະໃດໆ.

• ແກ້ອາການເມົາລົດ ເມົາເຮືອ ຫລື ເມົາເຮືອບິນ : ນອກຈາກການປະຕິບັດຕາມຄຳແນະນຳຕ່າງໆໆ ຜູ້ທີ່ເມົາລົດເປັນປະຈຳຄວນກິນຢາແກ້ວິນ ຫລື ຢາແກ້ເມົາລົດ ຫລື ຕິດພາສເຕີຢາແກ້ເມົາລົດ ດັ່ງຕໍ່ໄປນີ້ :

1. ຢາຕ້ານຮິສຕາມີນ ເປັນຢາທີ່ມີສັບພະຄຸນຊ່ວຍປ້ອງກັນ ຫລື ຫລຸດຜ່ອນອາການເມົາລົດທີ່ນິຍົມໃຊ້ໃນປັດຈຸຸບັນ ເຊັ່ນ : ຢາໄຊໄຄລຊີນ, ຢາໄດເມນໄຮດຣິເນດ ເປັນຕົ້ນ, ແຕ່ຢາເຫລົ່ານີ້ອາດສົ່ງຜົນຂ້າງຄຽງເຮັດໃຫ້ຮູ້ສຶກງ່ວງນອນໄດ້.
2. ຢາໂຄໂປລາມີນ ມີສັບພະຄຸນຊ່ວຍຫລຸດຜ່ອນອາການເມົາລົດ ໂດຍໂຕຢາຈະຢູ່ໃນຮູບແບບຂອງພາສເຕີສຳລັບຕິດແປະລົງເທິງຜິວໜັງ ໃຊ້ຕິດແປະໄວ້ດ້ານຫລັງໃນຫູຕັ້ງແຕ່ກ່ອນເດີນທາງປະມານ 2 – 3 ຊົ່ວໂມງ.
3. ທັງນີ້ ຜູ້ໃຊ້ຢາຄວນປະຕິບັດຕາມຄຳແນະນຳຂອງແພດ ຫລື ຕາມສະຫລາກຢາຢ່າງເຄັ່ງຄັດ ລວມທັງປຶກສາແພດທຸກເທື່ອກ່ອນໃຫ້ເດັກກິນຢາຕຕ້ານຮີສຕາມີນ ຫລື ໃຊ້ພາສເຕີຢາໂຄໂປລາມີນ ເພາະເດັກອາດສ່ຽງໄດ້ຮັບຜົນຂ້າງຄຽງຈາກການໃຊ້ຢາຫລາຍກ່ວາຄົນໃນໄວອື່ນ.