ປກສ ເມືອງຄູນຄຳ ແຂວງຄຳມ່ວນ ໄລ່ຈັບໜຸ່ມຂົນສົ່ງຢາເສບຕິດ ພ້ອມຂອງກາງກັນຊາ 488 ກິໂລກຣາມ
ເຈົ້າໜ້າທີ່ຕໍາຫຼວດ ປກສ ເມືອງຄູນຄໍາ ແຂວງຄໍາມ່ວນ ໃຫ້ຮູ້ວ່າ: ໃນວັນທີ 5 ມິຖຸນາ 2022 ຜ່ານມາ ເຈົ້າໜ້າທີ່ຈະລາຈອນ ແລະ ໜ່ວຍງານຕ້ານ ແລະ ສະກັດກັ້ນຢາເສບຕິດ ປກສ ເມືອງຄູນຄໍາ ທີ່ປະຈໍາການຢູ່ປ້ອມຍາມໄດ້ວາງກໍາລັງສະກັດລົດກະບະໂຕ ໂຍຕ້າວີໂກ້ ສີຂາວ ໝາຍເລກທະບຽນ ຈຸລ 7778 ກໍ ແພງນະຄອນ ທີ່ເປັນລົດເປົ້າໝາຍການຂົນສົ່ງຢາເສບຕິດ ແຕ່ເຈົ້າຂອງລົດ ບໍ່ໃຫ້ຄວາມຮ່ວມມື ພ້ອມທັງເລັ່ງລົດດ້ວຍຄວາມໄວສູງ ເພື່ອເອົາຕົວຫຼົບໜີ.
ເມື່ອເປັນແນວນັ້ນ ເຈົ້າໜ້າທີ່ໄດ້ນໍາກໍາລັງຕິດຕາມໄປໄດ້ໄລຍະໜຶ່ງ ເຫັນລົດຄັນດັ່ງກ່າວຂີ່ກັບຄືນ ເຈົ້າໜ້າທີ່ກໍໄດ້ຕິດຕາມ ແລະ ພົບເຫັນລົດຄັນດັ່ງກ່າວຈອດຖິ້ມຢູ່ແຄມປ່າເຂດບ້ານຄູນເງິນ ເມືອງຄູນຄໍາ ເຈົ້າໜ້າທີ່ ຈຶ່ງເຂົ້າກັກຕົວຜູ້ຂັບຂີ່ພ້ອມ ເຂົ້າກວດຄົ້ນໃນເບື້ອງຕົ້ນແມ່ນບໍ່ພົບເຫັນເຄື່ອງຂອງກາງ.
ຜູ້ຂັບລົດຄັນດັ່ງກ່າວຊື່ ທ້າວ ຊ໋ອດກີ້ ອາຍຸ 27 ປີ ບ້ານທົ່ງຈະເລີນ ເມືອງ ຄໍາເກີດ ແຂວງບໍລິຄໍາໄຊ
ຫຼັງຈາກນັ້ນ, ເຈົ້າໜ້າທີ່ ຈຶ່ງໄດ້ຈັດວາງກໍາລັງອອກ ກວດຄົ້ນຫາເຄື່ອງຂອງກາງຢູ່ເຂດໃກ້ຄຽງຈຶ່ງພົບເຫັນຖົງ ສີດໍາຈໍານວນ 10 ເປົາ ຊຸກເຊື່ອງໄວ້ຢູ່ໃນປ່າແຄມຫ້ວຍທອນ ເຂດບ້ານນາພົງ ເມືອງປາກກະດິງ.
ຜ່ານການກວດຄົ້ນໃນກະເປົາ ພົບເຫັນກັນຊາແຫ້ງອັດແທ່ງ ນໍ້າໜັກ 488 ກິໂລກຣາມ, ເຈົ້າໜ້າທີ່ນໍາຂອງກາງ ແລະ ຜູ້ຖືກຫາມາດຳເນີນຄະດີຕາມລະບຽບກົດໝາຍ.
