ອາເມລິກາກຽມຈັດສັນວັກຊີນປ້ອງກັນພະຍາດໝາກສຸກລີງ ເກືອບ 300.000 ໂດສ ໃຫ້ຂະແໜງສາທາລະນະສຸກ ເລັ່ງຊ່ວຍເຫລືອກຸ່ມສ່ຽງສູງ
ອາເມລິກາກຽມຈັດສັນວັກຊີນປ້ອງກັນພະຍາດໝາກສຸກລີງເກືອບ 300.000 ໂດສ ໃຫ້ໜ່ວຍງານສາທາລະນະສຸກໃນປະເທດໃນມໍ່ໆນີ້ ເພື່ອສະກັດການແພ່ລະບາດຂອງພະຍາດ ແລະ ເລັ່ງຊ່ວຍເຫລືອຜູ້ທີ່ຢູ່ໃນກຸ່ມສ່ຽງສູງ.
ອາເມລິກາຈະນຳເອົາວັກຊີນ Jynneos ຈຳນວນ 56.000 ໂດສຈາກສາງສຳຮອງທາງຍຸດທະສາດມາໃຊ້ໃນທັນທີ ກ່ອນຈະຈັດສັນເພີ່ມອີກ 240.000 ໂດສໃນອາທິດຕໍ່ໜ້າ. ສ່ວນໃນລະດູໃບໄມ້ຫລົ່ນນັ້ນຈະມີການນຳໃຊ້ວັກຊີນ 1,6 ລ້ານໂດສທົ່ວປະເທດ.
ສູນຄວບຄຸມ ແລະ ປ້ອງກັນພະຍາດ (CDC) ແນະນຳໃຫ້ຜູ້ທີ່ໄດ້ຮັບການຢືນຢັນ ຫລື ສັນນິຖານວ່າມີຄວາມສ່ຽງຕໍ່ພະຍາດໝາກສຸກລີງເຂົ້າຮັບການສັກວັກຊີນ ໂດຍຄວນເລັ່ງສັກພາຍໃນ 2 ອາທິດຫລັງຈາກໄດ້ຮັບເຊື້ອ ຍິ່ງໄວຈະຍິ່ງດີທີ່ສຸດ.
ວັກຊີນ Jynneos ເປັນວັກຊີນຊະນິດ 2 ໂດສທີ່ໄດ້ຮັບການອະນຸມັດຈາກສຳນັກງານຄະນະກຳມະການອາຫານ ແລະ ຢາ (FDA) ຂອງອາເມລິກາ ໃຫ້ນຳໃຊ້ໃນກຸ່ມຜູ້ທີ່ມີອາຍຸ 18 ປີຂຶ້ນໄປ ເຊິ່ງມີຄວາມສ່ຽງສູງວ່າອາດຈະປ່ວຍດ້ວຍພະຍາດໝາກສຸກລີງ, ແຕ່ເນື່ອງຈາກວັກຊີນດັ່ງກ່າວມີຈຳນວນບໍ່ຫລາຍ. ສະນັ້ນ ທາງການຈຶ່ງຈະຈັດສົ່ງໄປໃນພື້ນທີ່ທີ່ມີອັດຕາການແພ່ລະບາດສູງກ່ອນ.
ປັດຈຸບັນ, ອາເມລິກາພົບຜູ້ຕິດເຊື້ອພະຍາດໝາກສຸກລີງທີ່ໄດ້ຮັບການຢືນຢັນແລ້ວ 306 ຄົນໃນ 27 ລັດ ແລະ ນະຄອນຫລວງວໍຊິງຕັນ ໂດຍພົບການລະບາດສູງສຸດໃນແຄລິຟໍເນຍ, ອິລລິນອຍ ແລະ ນິວຢອກ, ແຕ່ເຄາະດີທີ່ຍັງບໍ່ມີລາຍງານຜູ້ເສຍຊີວິດຈາກເຊື້ອດັ່ງກ່າວ ໂດຍຜູ້ຕິດເຊື້ອສ່ວນຫລາຍສາມາດຫາຍດີຈາກອາການໄດ້ໃນເວລາປະມານ 2-4 ອາທິດ.
ສຳລັບການແພ່ລະບາດຮອບປັດຈຸບັນ ທົ່ວໂລກມີລາຍງານພົບຜູ້ຕິດເຊື້ອໝາກສຸກລີງແລ້ວ 4.700 ກວ່າຄົນໃນ 49 ປະເທດ ແລະ ມີຜູ້ເສຍຊີວິດ 1 ຄົນໃນໄນຈີເຣຍ ໂດຍພົບການແພ່ລະບາດໃນປະເທດເອີຣົບສູງສຸດ ຄິດເປັນອັດຕາ 84% ຂອງການແພ່ລະບາດທົ່ວໂລກ. ເຖິງຢ່າງໃດກໍຕາມ, ອົງການອະນາໄມໂລກ (WHO) ລະບຸວ່າ: ປັດຈຸບັນພະຍາດໝາກສຸກລີງຍັງບໍ່ຈັດເປັນພາວະສຸກເສີນດ້ານສຸຂະພາບທົ່ວໂລກ, ແຕ່ຕ້ອງເຝົ້າຕິດຕາມຢ່າງໃກ້ຊິດ.
ອ້າງອີງ:
- https://www.washingtontimes.com/news/2022/jun/28/white-house-rolls-out-monkeypox-strategy-with-test/
- https://www.cnbc.com/2022/06/28/us-to-deploy-nearly-300000-monkeypox-vaccine-doses-to-fight-outbreak.html
