ທະນາຄານໂລກ ຄາດຄະເນວ່າເສດຖະກິດໄທ ຈະຂະຫຍາຍຕົວ 2,9 %
ບົດລາຍງານ ການຕິດຕາມ ເສດຖະກິດ ຂອງໄທ (Thailand Economic Monitor) ຊຶ່ງເຜີຍແຜ່ ໂດຍທະນາຄານໂລກ ວັນທີ 30 ມິຖຸນາ 2022 ນີ້ ຄາດການວ່າ: ເສດຖະກິດ ຂອງໄທໃນປີ 2022 ນີ້ຈະຂະຫຍາຍຕົວ 2,9% ເມື່ອທຽບໃສ່ປີຕໍ່ປີເນື່ອງຈາກ ໄດ້ຮັບແຮງໜູນຈາກ ການບໍລິການ ພາກເອກະຊົນ ແລະ ການຟື້ນໂຕ ຂອງການທ່ອງທ່ຽວ.
ໄທ ເປັນປະເທດ ເສດຖະກິດໃຫຍ່ ອັນດັບ2 ຂອງ ອາຊີຕາເວັນອອກສຽງໃຕ້ (ອາຊຽນ) ຈະມີທ່າອ່ຽງປັບຕົວດີຂຶ້ນ ໃນໄລຍະເຄິ່ງຫລັງຂອງປີນີ້ ແລະ ຄາດວ່າເສດຖະກິດຂອງໄທຈະຂະຫຍາຍຕົວ ເພີ່ມຂຶ້ນເຖິງ 4,3% ໃນປີ2023.
ຂະນະທີ່ອັດຕາ ເງິນເຟີ້ທົ່ວໄປປີນີ້ (headline inflation) ຈະເພີ່ມຂຶ້ນ 5,2% ເມື່ອທຽບໃສ່ປີຕໍ່ປີ ແລະ ອັດຕາເງິນເຟີ້ ພື້ນຖານ (core inflation) ຊຶ່ງບໍ່ນັບລວມລາຄາ ອາຫານ ແລະ ພະລັງງານຈະເພີ່ມຂຶ້ນລະດັບ2,3%.
ອັດເງິນເຟີ້ພາກບໍລິໂພກຂອງໄທ ໃນເດືອນພຶດສະພາເພີ່ມຂຶ້ນ7,1% ເມື່ອທຽບໃສ່ ປີຕໍ່ປີຖືເປັນລະດັບສູງສຸດນັບຕັ້ງແຕ່ເດືອນກໍລະກົດ 2008 ເນື່ອງຈາກລາຄາ ພະລັງງານ ແລະ ອາຫານເພີ່ມສູງຂຶ້ນ.
ນອກນີ້ຈຳນວນ ນັກທ່ອງທ່ຽວເດີນທາງ ມາໄທຈະເພີ່ມຂຶ້ນ 6 ລ້ານ ເທື່ອຄົນ ໃນປີນີ້ ເພີ່ມຂຶ້ນ ປະມານ 400.000 ເທື່ອຄົນ ໃນປີ2021 ແລະ ເພີ່ມຂຶ້ນ 24 ລ້ານເທື່ອຄົນ ຈົນຮອດ ປີ2024.
