ເອຊີ ມິລານ ເປີດຕົວ ໂອຣິກີ ຢ່າງເປັນທາງການ ເຊັນສັນຍາ 4 ປີ

ເອຊີ ມິລານ ປະກາດຄວ້າ ດີວອກ ໂອຣິກີ ກອງຫນ້າທີມຊາດເບລຢ້ຽມຢ່າງເປັນທາງການ ຫລັງຫມົດສັນຍາກັບ ລີເວີພູລ ຮອງແຊ໊ມ ພຣີເມຍລີກ ອັງກິດ ຍ້າຍມາຮ່ວມງານແບບບໍ່ມີຄ່າຕົວ ໂດຍເຊັນສັນຍາ 4 ປີ ຈົນເຖິງລະດູການ 2026 ແລະຈະເຂົ້າມາລ່າຕາຫນ່າງຮ່ວມທີມກັບ ໂອລີວີເຢ ຊີຣູ ດາວຍິງທີມຊາດຝຣັ່ງ ອະດີດຜູ້ຫລິ້ນໃນອາເຊນອລ.

ສຳລັບ ດີວອກ ໂອຣິກີ ຍ້າຍຈາກ ລີລ ມາຢູ່ກັບ ລີເວີພູລ ເມື່ອປີ 2015 ລົງສະຫນາມ 175 ນັດ ຍິງໄດ້ 41 ປະຕູ 18 ແອສຊິສ ຊ່ວຍໃຫ້ ລີເວີພູລ ໄດ້ແຊ໊ມ 6 ລາຍການ ທັງພຣີເມຍລີກ ເຊິ່ງເປັນການປົດລັອກແຊ໊ມລີກສູງສຸດຂອງອັງກິດໃນຮອບ 30 ປີ, ເອຟເອ ຄັພ, ລີກຄັພ, ຢູຟາ ແຊ໊ມປຽນລີ, ຢູຟາ ຊຸບເປີຄັພ ແລະ ແຊ໊ມສະໂມສອນໂລກ ລວມເຖິງເຂົ້າຮອບຊີງຊະນະເລີດ ຢູໂຣປາລີກ ລະດູການ 2015-16.