ນໍ້າມັນເຊື້ອໄຟພຽງພໍໃຊ້ພາຍໃນປະເທດ ເຫດຮ້າຍຕ່າງໆກໍໝົດໄປ
ຕະຫລອດໄລຍະ ເກືອບ 2 ເດືອນ ຄືຕັ້ງແຕ່ຕົ້ນເດືອນພຶດສະພາ ຫາ ທ້າຍເດືອນມິຖຸນາ ທົ່ງສັງຄົມລາວພົບວິກິດການຂາດແຄນນໍ້າມັນ, ປະຊາຊົນເດືອດຮ້ອນກັນທຸກຍ່ອມຫຍ້າ, ທຸກຂອກແຄແຈຮົ້ວເຕັມໄປດ້ວຍສຽງຈົ່ມວ່າ ຍ້ອນມີຄວາມຫຍຸ້ງຍາກໃນການຊື້ນໍ້າມັນ ເຖິງຂັ້ນເອີ່ຍວ່າ ຈະແພງກໍພໍສູ້ໄຫວ ແຕ່ບໍ່ມີນໍ້າມັນໃຫ້ໃສ່ຂໍຍອມ.
ໃນໄລຍະທີ່ຂາດແຄນນໍ້າມັນເຊື້ອນັ້ນ ພວກເຮົາໄດ້ເຫັນບັນຫາຕ່າງໆຢ່າງຫລາກຫລາຍ ເປັນຕົ້ນແມ່ນຄົນເຫັນແກ່ໂຕບາງຈຳພວກໄດ້ກັກຕຸນນໍ້າມັນ, ປໍ້ານໍ້າມັນຂາຍເກີນລາຄາ, ການຮ່າຍຕຸກຂາຍຊະຊາຍ, ບັນຫາຈະລາຈອນແອອັດຍ້ອນລຽນຄິວໃສ່ນໍ້າມັນ, ຊາວກະສິກອນບໍ່ມີນໍ້າມັນໃສ່ເຄື່ອງຈັກໃນໃນການຜະລິດກະສິກຳ, ເກີດມີການປັບໃໝໃສ່ໂທດກັນເກີດຂຶ້ນ ສ່ວນລັດຖະບານກໍຖືກປະຊາຊົນຈົ່ມວ່າ ແລະ ປະເທດຊາດກໍກາຍເປັນຂີ້ປາກເປັນຂ່າວເປັນຄາວໃຫ້ສັງຄົມຊາວໂລກຍ້ອນ.
ເຖິງຢ່າງໃດກໍຕາມ ພວກເຮົາໄດ້ເຫັນວ່າ ທາງພາກລັດເພິ່ນກໍບໍ່ໄດ້ນິ້ງຢູ່ນອນດາຍ ມີຄວາມຈິງໃຈຕໍ່ປະຊາຊົນ ໂດຍເຜີຍເຖິງສາເຫດຕົ້ນຕໍທີ່ຂາດແຄນນໍ້າມັນເຊັ່ນ ຂາດເງິນຕາຕ່າງປະເທດ, ຕົ້ນທຶນການນຳເຂົ້າສູງ ເຮັດໃຫ້ການນຳເຂົ້າຫລຸດລົງ ແລະ ອື່ນໆ ເຊິ່ງນັບວ່າເປັນເລື່ອງດີທີ່ພາກລັດພງກ້າອອກມາຍອມຮັບຕໍ່ບັນຫາ ແລະ ສັນຍາໃນການແກ້ໄຂ ດ້ວຍຄວາມຈິງໃຈສູງສຸດ.
ໃນວາລະກອງປະຊຸມສະໄໝສາມັນເທື່ອທີ 3 ຂອງສະແຫ່ງຊາດຊຸດທີ IX ນັ້ນ ທ່ານລັດຖະມົນຕີກະຊວງການເງິນອອກມາປະກາດຕໍ່ສັງຄົມລາວທົ່ວປະເທດ ພ້ອມໃຫ້ຄຳໝັ້ນສັນຍາ ເລື່ອງການນຳເຂົ້ານໍ້າມັນໃຫ້ພຽງພໍເລີ່ມແຕ່ວັນທີ 20 ມິຖຸນາ ເຖິງແມ່ນວ່າຄາດເຄື່ອນແດ່ອາທິດ1 ທົ່ວປະເທດກໍມີນໍ້າມັນຊົມໃຊ້ຢ່າງພພຽງແທ້ໆ ນັບວ່າລັດຖະບານເພິ່ນໄດ້ເຮັດແທ້ທຳຈິງ ເຮັດໃຫ້ປະຊາຊົນມີຄວາມຫວັງ ແລະ ມີຄວາມເຊື່ອໝັ້ນຕໍ່ການນຳພາພັກ-ລັດຖະບານ, ບັນຫາຄວາມຫຍຸ້ງຍາກຕ່າງໆທີ່ກ່າວມາທັງໝົດນັ້ນຄ່ອຍໆຈາງໄປໂດຍອັດຕະໂນມັດ ການຂາຍນໍ້າມັນໃສ່ຕຸກກໍບໍ່ມີແລ້ວ, ກັກຕຸນນໍ້າມັນກໍບໍ່ມີ, ປໍ້າແຕ່ລະປໍ້າ ບໍ່ວ່າປໍ້ານ້ອຍປໍ້າໃຫຍ່ກໍມີໃຫ້ບໍລິການ ປະຊົນສາມາດເລືອກໃສ່ນໍ້າມັນໄດ້ຕາມໃຈ ທຸກມື້ນີ້ເດັກປໍ້າບໍລິການໃສ່ນໍ້າມັນໃຫ້ລູກຄ້າຈົນນັ່ງເຫງົາຫລັບ.
ທ້າຍສຸດນີ້ ຂໍເອີ່ຍຊົມເຊີຍລັດຖະບານແບບເຕັມສົບເຕັມປາກ ແລະ ເຕັມໃຈ ທີ່ພັກລັດຖະບານໄດ້ຕັດສິນໃຈອັນເດັດຂາດແນ່ວແນ່ ແລະ ຖືກຕ້ອງ ໃນການແກ້ໄຂບັນຫາ, ເຫັນໄດ້ເຖິງຄວາມຫຍຸ້ງຍາກ ຂອງປະຊາຊົນ ແລະ ເຮັດເພື່ອປະເທດຊາດເພື່ອປະຊາຊົນຢ່າງແທ້ຈິງ ເຮັດໃຫ້ປະເທດເຮົາກັບມາປົກກະຕິ ມີວິຖີການດຳລົງຊີວິດທີ່ບໍ່ຫຍຸ້ງຍາກ ແລະ ບໍ່ໄດ້ຮັບຄວາມລຳບາກອີກຄັ້ງ ແລະ ຫວັງວ່າບັນຫາອື່ນໆ ເປັນຕົ້ນແມ່ນ ລາຄາສິນຄ້າແພງ, ອັດຕາແລກປ່ຽນ, ເງິນເຟີ້, ລາຄານໍ້າມັນແພງ ກໍຈະໄດ້ຮັບການແກ້ໄຂໃນໄວໆນີ້.
