ເຊລຊີ ບັນລຸເຈລະຈາເງື່ອນໄຂຂໍ້ຕົກລົງສ່ວນຕົວ ນາທານ ອາເກ

ເຊລຊີ ກຽມດຶງສິດເກ່ົາ ນາທານ ອາເກ ກັບຄືນເຖິ່ນອີກເທື່ອຫນຶ່ງ ຫລັງຕົກລົງເງື່ອນໄຂສ່ວນຕົວກັນໄດ້ແລ້ວ ແຕ່ແມນເຊສເຕີ ຊິຕີ ກໍຮຽກຄ່າຕົວສູງພໍສົມຄວນ.

ເວລານີ້ ເຊລຊີ ຕ້ອງການເສີມກອງຫລັງຢ່າງຍິ່ງ ຫລັງເສຍທັງ ອັນໂຕນີໂອ ຣູດີເກີ ແລະ ແອນດຣຽສ ຄຣິສເຕນເຊນ ຫລ້າສຸດ ວາງເປົ້າໄປທີ່ ອາເກ ເຊິ່ງເຄີຍເປັນເດັກປັ້ນໃນລະບົບເຍົາວະຊົນສະໂມສອນ ແລະ ຢູ່ໃນທີມຊຸດໃຫຍ່ໄລຍະປີ 2012-17.

ຂະນະທີ່ ແມນຊິຕີ ກໍພ້ອມຂາຍ ເນື່ອງຈາກ ອາເກ ມີສະຖານະເປັນຕົວສຳຮອງເທົ່ານັ້ນ ແຕ່ກໍຕ້ອງການຄ່າຕົວບໍ່ຕຳ່ກວ່າ 45 ລ້ານປອນ ຕອນນີ້ທັງສອງສະໂມສອນຈຶ່ງຕ້ອງເຈລະຈາກັນຕໍ່ໄປ ຫລັງຈາກນັກເຕະກໍພ້ອມຍ້າຍເຊັ່ນດຽວກັນ.

ສຳລັບ ເຊລຊີ ຍັງຕົກເປັນຂ່າວໃກ້ຈະໄດ້ ຣາຮິມ ສະເຕີລິງ ກອງຫນ້າຫມູ່ຮ່ວມສັງກັດຂອງ ອາເກ ຫລັງຈາກຕົກລົງເງື່ອນໄຂໄດ້ແລ້ວ ໂດຍແມນຊິຕີ ຕ້ອງການຄ່າຕົວຂອງ ສະເຕີລິງ 50 ລ້ານປອນ.