ແມນຢູໄນເຕັດ ບັນລຸຂໍ້ຕົກລົງຄວ້າ ລີຊານໂດຣ ມາຕີເນສ ຮຽບຮ້ອຍແລ້ວ

ສຳນັກຂ່າວ ບີບີຊີ ລາຍງານວ່າ ແມນເຊສເຕີ ຢູໄນເຕັດ ບັນລຸຂໍ້ຕົກລົງຄ່າຕົວ 45 ລ້ານປອນ ເພື່ອຄວ້າ ລີຊານໂດຣ ມາຕີເນສ ກອງຫລັງຂອງ ອາແຈັກ ອຳເຕີດຳ ມາຮ່ວມທີມ.

ແມນເຊສເຕີ ຢູໄນເຕັດ ພວມຈະໄດ້ນັກເຕະໃຫມ່ຄົນທີ 3 ມາຮ່ວມທີມຢ່າງເປັນທາງການ ຫລັງມີການເປີດເຜີຍ ວ່າພວກເຂົາໄດ້ບັນລຸຂໍ້ຕົກລົງ 45 ລ້ານປອນ ກັບ ອາແຈັກ ອຳເຕີດຳ ໃນການຄວ້າຕົວ ລີຊານໂດຣ ມາຕີເນສ ກອງຫລັງຂອງອາແຈັກ ມາເສີມທີມ ໂດຍຕອນນີ້ນັກເຕະຢູ່ລະຫວ່າງຖ້າກວດຮ່າງກາຍ.

ສຳລັບກອງຫລັງຊາວອາເຈນຕີນາ ອາຍຸ 24 ປີລາຍນີ້ ເຄີຍຮ່ວມງານກັບ ເອຣິກ ເທນ ຮາກ ຜູ້ຈັດການທີມຄົນ ປັດຈຸບັນຂອງ ແມນເຊສເຕີ ຢູໄນເຕັດ ມາກ່ອນ ໂດຍລາວຍ້າຍມາຢູ່ກັບ ອາແຈັກ ເມື່ອປີ 2019.

ທັງນີ້ ມາຕີເນສ ຈະເປັນນັກເຕະຄົນໃຫມ່ຄົນທີ 3 ຂອງແມນຢູໃນລະດູການນີ້ ຕໍ່ຈາກ ໄທເຣລ ມາເລເຊຍ, ຄຣິສຕຽນ ອີຣິກເຊນ ທີ່ເປີດຕົວໄປຮຽບຮ້ອຍແລ້ວ.