ນັອດຕິງແຮມ ພ້ອມຈ່າຍຄ່າເມື່ອຍໃຫ້ ລິນກາດ ຕ້ອງການ ຫວັງປິດການຂາຍໄວໆນີ້

ເວສແຮມ ຢູໄນເຕັດ ມີສະເທືອນ, ຫລັງສື່ອັງກິດລາຍງານວ່າ ນັອດຕິງແຮມ ຟໍເຣສ ພ້ອມປາດຫນ້າຄວ້າ ເຈສຊີ ລິນກາດ ໄປເສີມທີມ ໂດຍເຈົ້າຂອງສະໂມສອນບິນມາເຈລະຈາກັບຕົວນັກເຕະທີ່ນະຄອນລອນດອນ ເມື່ອວັນອັງຄານທີ່ຜ່ານມາ.

ນັອດຕິງແຮມ ຟໍເຣສ ທີມນ້ອງໃຫມ່ແຫ່ງພຣີເມຍລີກ ອັງກິດ ເດີນຫນ້າທາບທາມ ເຈສຊີ ລິນກາດ ດາວເຕະຂອງ ແມນເຊສເຕີ ຢູໄນເຕັດ ທີມໃຫຍ່ຮ່ວມລີກມາເສີມທີມ ເຖິງຈະມີ ເວສແຮມ ຢູໄນເຕັດ ທີ່ເປັນຕົວຫລັກທີ່ມີໂອກາດຈະໄດ້ດາວເຕະອາຍຸ 29 ປີ ເຊິ່ງຫາກໍຫມົດສັນຍາກັບ ແມນຢູ ເມື່ອວັນທີ 30 ມິຖຸນາ ທີ່ຜ່ານມາໄປເສີມທີມກໍຕາມ.

ກ່ອນຫນ້ານີ້ ລິນກາດ ຕັດສິນໃຈບໍ່ຕໍ່ສັນຍາກັບ ແມນຢູ ໂດຍມີ ເວສແຮມ ທີ່ມີໂອກາດຫລາຍຈະໄດ້ຕົວໄປເສີມທີມ ຫລັງນັກ ເຕະເຄີຍສ້າງຜົນງານໄດ້ຢ່າງຍອດຢ້ຽມໃນການຫລິ້ນໃຫ້ ເວສແຮມ ດ້ວຍສັນຍາຢືມຕົວເມື່ອປີ 2021 ໂດຍຍິງໄປ 9 ປະຕູກັບ 5 ແອສຊິສ ຂະນະທີ່ ເດວິດ ມອຍ ຜູ້ຈັດການທີມຂອງເວສແຮມ ກໍສະແດງອອກຢ່າງຈະແຈ້ງວ່າ ຕ້ອງການໄດ້ດາວເຕະ ລາຍ ນີ້ກັບໄປຫລິ້ນໃນຖິ່ນລອນດອນ ສະເຕດ້ຽມ ອີກເທື່ອຫນຶ່ງ.

ແນວໃດກໍຕາມ ສື່ໃນອັງກິດລາຍງານວ່າ ນັອດຕິງແຮມ ຟໍເຣສ ຫາກໍໄດ້ເລື່ອນຊັ້ນກັບຂຶ້ນມາຫລິ້ນໃນລີກສູງສຸດອັງກິດ ອີກເທື່ອຫນຶ່ງໃນລະດູການນີ້ນັ້ນ ຫວັງປາດຫນ້າ ເວສແຮມ ເພື່ອດຶງ ລິນກາດ ໄປເສີມທີມ ໂດຍມີລາຍງານວ່າ ນັກເຕະອາຍຸ 29 ປີ ເດີນທາງມາຍັງນະຄອນຫລວງລອນດອນ ເພື່ອເຈລະຈາກັບ ເອແວນເຈລອສ ມາຣີນາຄິສ ເຈົ້າຂອງສະໂມສອນຟໍເຣສ ເມື່ອຄືນວັນອັງຄານທີ່ຜ່ານມາຕາມເວລາທ້ອງຖິ່ນ ໂດຍການເຈລະຈາມີຂ່າວວ່າເປັນໄປດ້ວຍດີ ເຖິງຈະມີອຸປະສັກເລື່ອງຄ່າ ເມື່ອຍທີ່ອະດີດກອງກາງທີມຊາດອັງກິດ ຮຽກຮ້ອງຄ່າເມື່ອຍເຖິງອາທິດລະ 180,000 ປອນກໍຕາມ.