ຫົວໂປ້ອາຊະຍາກອນທາງໄຊເບີ ຊາວຈີນ ມີປະຫວັດກໍ່ອາຊະຍາກຳຢູ່ລາວ ແລະ ກຳປູເຈຍ ຖືກເຈົ້າໜ້າທີ່ໄທຈັບ ແລະ ສົ່ງດຳເນີນຄະດີຢູ່ຈີນ

ວັນທີ 25 ກໍລະກົດ 2022 ນີ້ ສຳນັກຂ່າວຊ່ອງ 23 ເວີກພອຍຂອງໄທລາຍງານໃຫ້ຮູ້ວ່າ: ວັນທີ 22 ກໍລະກົດ 2022 ເຈົ້າໜ້າທີ່ຕຳຫລວດໄດ້ຈັບກຸມຕົວ ທ້າວ Zhou dawei ສັນຊາດຈີນ ທີ່ທາງການອອກໝາຍແດງ ໃນຄະດີການຈັດການ ແລະ ຂົນສົ່ງບຸກຄົນລັກລອບເຂົ້າ- ອອກເມືອງ ຈະເດີນທາງເຂົ້າໄທຜ່ານດ່ານກວດຄົນເຂົ້າເມືອງ ຂອງສະໜາມບິນສຸວັນນະພູມ ເຈົ້າໜ້າທີ່ຈຶ່ງທຳການຄວບຄຸມຜູ້ຕ້ອງຫາໄວ້ທີ່ຫ້ອງກັກຂັງ ເພື່ອສືບສວນຂະຫຍາຍຜົນ ແລະ ສົ່ງໃຫ້ກັບທາງການຈີນ ແລະ ມອບໝາຍໃຫ້ ພົນຕຳຫລວດເອກ ດຳລົງສັກສີ ກິດຕິປະພັນ ຮອງຜູ້ບັງຄັບບັນຊາ ຕຳຫລວດ, ຜູ້ບັງຄັບບັນຊາ ກວດຄົນເຂົ້າເມືອງ ແລະ ຜູ້ບັງຄັບການ ກອງການຕ່າງປະເທດ ໃຫ້ກຳກັບເລື່ອງນີ້ຢ່າງໃກ້ຊິດ.

ພົນຕຳຫລວດເອກ ສຸວັດ ແຈ້ງຍອດສຸກ ຜູ້ບັງຄັບບັນຊາ ຕຳຫລວດໄທ ເປີດເຜີຍວ່າ: ຈາກການປະສານກັບທາງການຈີນຈຶ່ງໄດ້ຮູ້ວ່າ ທ້າວ Zhou dawei ໄດ້ນຳເອົາຊາວຈີນລັກລອບຂ້າມຊາຍແດນໄປເຮັດວຽກກັບກຸ່ມຄໍເຊັນເຕີ ທີ່ປະເທດລາວ ແລະ ກຳປູເຈຍ, ເຊິ່ງບຸກຄົນທີ່ ກະຊວງຄວາມໝັ້ນຄົງສາທາລະນະ ແລະ ກວດຄົນເຂົ້າເມືອງຈີນ ຕ້ອງການຕົວຢ່າງຮີບດ່ວນ.

ຜ່ານການສືບສວນ ທ້າວ Zhou ຍອມຮັບສາລະພາບວ່າ: ໄດ້ພາຊາວຈີນລັກລອບຂ້າມແດນໄປເຮັດວຽກເປັນກຸ່ມຄໍເຊັນເຕີຢູ່ປະເທດລາວ ແລະ ກຳປູເຈຍແທ້, ທາງການຈີນໄດ້ແຈ້ງໃຫ້ຜູ້ຕ້ອງຫາຮູ້ວ່າ ເປັນບຸກຄົນທີ່ມີໝາຍແດງ ແລະ ໄດ້ຍົກເລີກໜັງສືເດີນທາງແລ້ວ, ເຊິ່ງຜູ້ຕ້ອງຫາໄດ້ຮັບຮູ້ ແລະ ຍິນຍອມກັບໄປສູ່ຂະບວນຍຸຕິທຳທາງສາທາລະນະລັດປະຊາຊົນຈີນ ກ່ອນສົ່ງຕົວກັບຈີນວັນທີ 26 ກໍລະກົດ ໂດຍສາຍການບິນ China Southern Airlines CZ 3082 ເຊິ່ງທາງການຈີນເປັນຜູ້ດຳເນີນການເລື່ອງປີ້ຍົນເອງທັງໝົດ.