ນະຄອນຫຼວງວຽງຈັນຈະປັບປຸງເນື້ອໃນຮ່າງສັນຍາວ່າດ້ວຍການຄຸ້ມຄອງ ບໍາລຸງຮັກສາ ແລະ ສ້ອມແປງລະບົບໄຟເຍືອງທາງ 21 ເສັ້ນ ແລະ ໄຟອໍານາດ

ທ່ານ ພູຂົງ ບັນນະວົງ ຮອງເຈົ້າຄອງນະຄອນຫຼວງວຽງຈັນ ຊີ້ແຈງຕໍ່ກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນນະຄອນຫຼວງວຽງຈັນ ຊຸດທີ 2 ວັນທີ 22 ກໍລະກົດ 2022 ນີ້ວ່າ:

– ໃນຕໍ່ໜ້າອົງການປົກຄອງຈະໄດ້ເພີ່ມທະວີສ້າງຄວາມຮັບຮູ້ ແລະ ເຂັ້ມງວດການຈັດຕັ້ງປະຕິບັດກົດໝາຍຢູ່ຂັ້ນຮາກຖານ ໂດຍສະເພາະຂັ້ນເມືອງບ້ານ ລວມເຖິງປະຊາຊົນໃຫ້ເຂັ້ມແຂງຂຶ້ນຕື່ມ

– ກ່ຽວກັບການແກ້ໄຂບັນຫາລັກລອບຂົນສິນຄ້າຂ້າມຊາຍແດນ ໂດຍທ່ານສະມາຊິກສະພາ ສະເໜີໃຫ້ອົງການປົກຄອງບ້ານ ມີບົດບາດຕໍ່ການເຄື່ອນໄຫວຕິດຕາມຂອບເຂດບໍລິເວນດ່ານສາກົນ ແລະ ດ່ານປະເພນີນັ້ນ ພື້ນຖານອົງການ ປົກຄອງນະຄອນຫຼວງ ແມ່ນເຫັນດີສະໜັບສະໜູນ ປັດຈຸບັນກໍປະຕິບັດແບບນັ້ນ ໂດຍການຮັກສາຄວາມສະຫງົບຮຽບຮ້ອຍຕາມຊາຍແດນ ກໍແມ່ນບ້ານຮ່ວມກັບທະຫານຊາຍແດນເປັນຜູ້ຕິດຕາມກວດກາ ແລະ ລາດຕະເວນ.

– ສ່ວນການສະເໜີໃຫ້ອົງການປົກຄອງກວດກາເບິ່ງ ລະບົບໄຟເຍືອງທາງ ແລະ ໄຟອໍານາດ ປັດຈຸບັນ ນະຄອນຫຼວງວຽງຈັນໄດ້ມອບໃຫ້ຫ້ອງການຄຸ້ມຄອງ ແລະ ບໍລິຫານຕົວເມືອງເປັນຜູ້ຄຸ້ມຄອງ ແຕ່ການຈັດຕັ້ງປະຕິບັດຕົວຈິງເຫັນວ່າມີຄວາມຫຍຸ້ງຍາກ ຍ້ອນເຮົາບໍ່ມີວິຊາການ ດັ່ງນັ້ນ ອົງການປົກຄອງນະຄອນຫຼວງຈຶ່ງຕົກລົງທີ່ຈະ ຮ່ວມມືກັບລັດວິສາຫະກິດໄຟຟ້າລາວ ໃນການແກ້ໄຂບັນຫາດັ່ງກ່າວ ເຊິ່ງກໍາລັງປັບປຸງເນື້ອໃນຮ່າງສັນຍາວ່າດ້ວຍການຄຸ້ມຄອງ ບໍາລຸງຮັກສາ ແລະ ສ້ອມແປງລະບົບໄຟເຍືອງທາງ 21 ເສັ້ນ ແລະ ໄຟອໍານາດໃນນະຄອນຫຼວງວຽງຈັນ ຄາດວ່າພາຍໃນເດືອນກໍລະກົດ ຈະໄດ້ເລີ່ມຈັດຕັ້ງ ປະຕິບັດ.

– ສໍາລັບບັນຫາແຮງງານທີ່ສະໝັກເຂົ້າເຮັດວຽກຢູ່ໂຄງການທາງລົດໄຟລາວ-ຈີນ ທາງອົງການປົກຄອງຈະໄດ້ສົມທົບກັບພາກສ່ວນ ກ່ຽວຂ້ອງເພື່ອກວດກາລະອຽດກ່ອນ ເພື່ອເບິ່ງສະພາບບັນຫາໃຫ້ຊັດເຈນ ແລ້ວຈະໄດ້ຕອບມາຍັງສະພາປະຊາຊົນ.

– ດ້ານການທ່ອງທ່ຽວໃນ 6 ເດືອນທ້າຍປີນີ້ ຈະມີຫຼາຍກິດຈະກໍາທີ່ຈະເປັນການກະຕຸກຊຸກຍູ້ໃຫ້ເກີດການທ່ອງທ່ຽວ ເປັນຕົ້ນ: ການສ້າງເຂດວຽງລາຕີເກົ່າ ໃຫ້ເປັນບ່ອນ ຈັດກິດຈະກໍາ ສໍາລັບນັກວິຈິດສິນ, ສ້າງກິດຈະກໍາລາຕີວຽງຈັນ ການປັບປຸງສະຖານບໍລິການຢູ່ເຂດນໍ້າງື່ມ (ຂົວທ່າງ່ອນ), ສ່ວນການທ່ອງທ່ຽວຢູ່ ບູຮານສະຖານ, ໄດ້ປັບປຸງການບໍລິການ ເປັນຕົ້ນ ຫໍພະແກ້ວ ວັດສີສະເກດ ພະທາດຫຼວງ ສວນວັດທະນະທໍາຊຽງຄວນ. ພ້ອມນີ້ ຍັງໄດ້ຮ່ວມ ກັບແຂວງໜອງຄາຍ ຈັດງານແຂ່ງຂັນເຮືອປະເພນີຢູ່ເມືອງປາກງື່ມ ແລະ ກະກຽມຈັດງານແຂ່ງຂັນເຮືອຊ່ວງຢູ່ທ່າວັດຈັນ ລວມທັງຈັດງານບຸນ ນະມັດສະການພະທາດຫຼວງວຽງຈັນ.