ແມນຢູ ທາບທາມ ເຊສໂກ  ມີຄູ່ແຂ່ງ 3 ທີມທີ່ພ້ອມຍາດນັກເຕະ

ເດລີ ເມລ ສື່ຊື່ດັງຂອງອັງກິດລາຍງານວ່າ ແມນເຊສເຕີ ຢູໄນເຕັດ ທີມດັງພຣີເມຍລີກ ອັງກິດ ໄດ້ຕິດຕໍ່ກັບໂຕແທນສ່ວນຕົວຂອງ ເບນຈາມິນ ເຊສໂກ ແລ້ວ ເພື່ອຫວັງຄວ້າຕົວກອງຫນ້າທີມຊາດສະໂລວີເນຍ ມາເສີມທີມ ຫລັງຈາກ ຄຣິສຕຽນໂນ ໂຣນັລໂດ ອາດຍ້າຍທີມໃນຕະຫລາດນັກເຕະລະດູການນີ້ ເນື່ອງຈາກລາວຍັງຢາກຫລິ້ນໃນຢູຟາ ແຊ໊ມປຽນລີກ ຂະນະທີ່ ແມນຢູ ໄດ້ໂຄຕາໄປຫລິ້ນພຽງ ຢູໂຣປາລີກ.

ແນວໃດກໍຕາມ ແຫລ່ງຂ່າວລະບຸວ່າ ເຣສບູລ ຊັລບວກ ບໍ່ຕ້ອງການຂາຍດາວຍິງອາຍຸ 19 ປີ ຖ້າຫາກບໍ່ໄດ້ຄ່າຕົວຫລາຍກວ່າ 55 ລ້ານປອນ ເຊິ່ງນອກຈາກ ແມນຢູ ແລ້ວ ຍັງມີ ນິວຄາສເຊິລ ຢູໄນເຕັດ ທີມຮ່ວມພຣີເມຍລີກ ອັງກິດ ລວມເຖິງ ບາເຢິນ ມິວນິກ ແລະ ໂບຣຸສເຊຍ ດອດມຸນ 2 ສະໂມສອນຊັ້ນນນຳຂອງບຸນເດສລີກາ ເຢຍລະມັນ ທີ່ພ້ອມຍາດຕົວເຊ່ັນດຽວກັນ.

ລາຍງານຍັງບອກວ່າ ໂຕແທນຂອງ ເບນຈາມິນ ເຊສໂກ ໄດ້ໂສຮູບລົງອິນສະຕາແກຣມວ່າລາວພວມຮັບປະທານອາຫານແລງທີ່ຮ້ານແຫ່ງຫນຶ່ງໃນເຂດໄທບຣິສ ເມືອງນິວຄາສເຊິລ ແຕ່ຍັງບໍ່ມີການເປີດສາກເຈລະຈາກັບ ນິວຄາສເຊິລ ຢ່າງເປັນທາງການ ເຊິ່ງຍັງຕ້ອງຕິດຕາມຄວາມຄືບຫນ້າກັນຕໍ່ໄປ.

ສຳລັບ ເບນຈາມິນ ຖືກຈັບຕາເບິ່ງຫລາຍຂຶ້ນ ຫລັງສະແດງຜົນງານໂດດເດັ່ນ ແລະ ຍິງປະຕູໄຊໃຫ້ ເຣສບູລ ຊັລບວກ ຊະນະ ລີເວີພູລ 1-0 ໃນເກມອຸ່ນເຄື່ອງກ່ອນເປີດລະດູການເມື່ອວັນພຸດທີ 27 ກໍລະກົດທີ່ຜ່ານມາ ຈົນຕົ້ນສັງກັດໄດ້ເວລາປ່ັນກະແສໃນໂລກໂຊຊຽລວ່າ ຕ້ອງການຄ່າຕົວ 300 ລ້ານຢູໂຣ ພ້ອມພ່ວງ ບຣູໂນ ເຟີນັລເດສ ຈາກແມນຢູ ອີກ 1 ລາຍ ກ່ອນຈະຂໍເພີ່ມຄ່າຕົວເປັນ 1 ພັນລ້ານຢູໂຣ ພ້ອມ ບຣູໂນ ແລະ ເຟຣັດ ເດິ ເຣສ ( ມາສຄອດແມນຢູ ) ແລກກັບ ເຊສໂກ.