ສານປະຊາຊົນແຂວງອຸດົມໄຊ ຕັດສິນໂທດປະຫານຊີວິດຜູ້ຂົນສົ່ງ, ຄອບຄອງຢາບ້າ ແລະ ສານເຄມີ

ຂ່າວ ປກສ ແຂວງອຸດົມໄຊ ລາຍງານວັນທີ 27 ກໍລະກົດ 2022 ຜ່ານມານີ້ ສານປະຊາຊົນແຂວງອຸດົມໄຊ ຈຶ່ງໄດ້ພິຈາລະນາລົງໂທດຕັດອິດສະຫຼະພາບ ຕາມປະເດັນຄຳຕັດສິນ ເລກທີ 081/ຂຕ.ອ ລົງວັນທີ 21 ກໍລະກົດ 2022 ຕໍ່ ທ້າວ ສົມລີ ເລົ່າ ອາຍຸ 38 ປີ, ຢູ່ບ້ານປ່າສັກ, ເມືອງໄຊ ແຂວງອຸດົມໄຊ ຖືຈັບໃນວັນທີ 26 ພຶດສະພາ 2021 ຄ້າຈາຍຢາເສບຕິດ ແລະ ຄອບຄອງອາວຸດເສິກ.

ຜ່ານການສືບສວນ-ສອບສວນ ທ້າວ ສົມລີ ເລົ່າ ໄດ້ໃຫ້ການຮັບສາລະພາບວ່າ: ໄດ້ຂົນສົ່ງຢາບ້າ ຈໍານວນ 4 ເປົາ ມີ 549 ມັດ ເທົ່າກັບ 1.098.000 ເມັດ ນໍ້າໜັກ 130,5 ກິໂລກຣາມ ຈາກບ້ານປ່າສັກ, ເມືອງໄຊ, ແຂວງອຸດົມໄຊ ມາຍັງບ້ານສີເກີດ ນະຄອນຫຼວງວຽງຈັນ ເຊິ່ງຈະໄດ້ຮັບຄ່າຈ້າງຈໍານວນ 200 ບາດ ຕໍ່ 1 ມັດ, ສ່ວນຄ່າຈ້າງຂົນສົງເເມ່ນໃຫ້ໄປຮັບເອົງຢູ່ນະຄອນຫຼວງວຽງຈັນ ລວມເປັນເງິນຈໍານວນ 150.000 ບາດ ຕໍ່ 1 ໂຕນ ແຕ່ຖືກເຈົ້າໜ້າທີ່ເຂົ້າກັກຕົວຢູ່ເຮືອນກ່ອນອອກເດີນທາງ.

ນອກຈາກນີ້ ໃນໄລຍະຜ່ານມາ ທ້າວ ສົມລີ ເລົ່າ ເຄີຍໄດ້ຂົນສົ່ງຢາບ້າໃຫ້ ທ້າວດາ ຈາກເເຂວງ ອຸດົມໄຊ ໄປສົ່ງໃຫ້ຄົນ (ບໍ່ຮູ້ຊື່) ຢູ່ນະຄອນຫຼວງວຽງຈັນ ມາແລ້ວ 3 ຄັ້ງຄື: ຄັ້ງທີ 1 ຂົນສົ່ງ ຈໍານວນ 200 ມັດ, ຄັ້ງທີ 2 ຈໍານວນ 350 ມັດ, ຄັ້ງທີ 3 ຈໍານວນ 350 ມັດ ລວມເງິນທີ່ໄດ້ຈາກການຂົນສົ່ງຢາບ້າຈໍານວນ 3 ຄັ້ງ ຕົກເປັນຈໍານວນສະກຸນເງິນບາດ 180.000 ບາດ ແລະ ໄດ້ຂົນສົ່ງແປ້ງຝຸ່ນໃຫ້ ທ້າວ ກວາງ ຈາກແຂວງ ອຸດົມໄຊ ໄປນະຄອນຫຼວງວຽງຈັນ ມາແລ້ວ 2 ຄັ້ງ, ຄັ້ງລະ 1 ໂຕນ ໄດ້ເງິນຈໍານວນ 150.000 ບາດ ຕໍ່ 1 ໂຕນ ລວມສະກຸນເງິນບາດ ຈໍານວນ 300.000 ບາດ; ສ່ວນປືນສັ້ນ 9 ມມ ພ້ອມລູກ ຈໍານວນ 25 ລູກ ເເມ່ນຕົນໄດ້ຊື້ເອົານໍາຄົນ ( ບໍ່ຮູ້ຊື່ )ໃນປີ 2020 ໃນລາຄາ 15.000 ບາດ ເພື່ອເອົາໄວ້ຕິດຕົວໃນເວລາເດີນທາງ, ສ່ວນໝື້ໝາກຟ່າ 5 ຫຼອດ ພ້ອມເກັບໝາກຟ່າ 5 ດອກ ແມ່ນໄດ້ຊື້ນໍາຄົນ (ບໍ່ຮູ້ຊື່) ຢູ່ຈຸດກໍ່ສ້າງເສັ້ນທາງລົດໄຟ ເຂດເມືອງງາ ເພື່ອເອົາມາໄວ້ຈູດຕໍໄມ້ຢູ່ສວນ.

ຜ່ານການຄົ້ນຄວ້າ, ກວດກາບັນດາຂໍ້ມູນຫຼັກຖານ ແລະ ເອກະສານຕ່າງໆ ທີ່ມີຢູ່ໃນສໍານວນຄະດີຢ່າງລະອຽດ, ຖີ່ຖ້ວນ, ຮອບດ້ານ, ພາວະວິໄສແລ້ວເຫັນວ່າ: ການກະທໍາຂອງທ້າວ ສົມລີ ເລົ່າ (ຈໍາເລີຍ) ໄດ້ກະທໍາຜິດຕາມຂໍ້ກ່າວຫາແທ້.

ດັ່ງນັ້ນ, ຄະນະສານອາຍາ ສານປະຊາຊົນແຂວງອຸດົມໄຊ ຈຶ່ງໄດ້ພິຈາລະນາລົງໂທດຕັດອິດສະຫຼະພາບ ຕາມປະເດັນຄຳຕັດສິນ ເລກທີ 081/ຂຕ.ອ ລົງວັນທີ 21 ກໍລະກົດ 2022 ວ່າ: ທ້າວ ສົມລີ ເລົາ (ຈໍາເລີຍ) ມີຄວາມຜິດທາງອາຍາໃນຂໍ້ຫາມີອາວຸດເສິກ ແລະ ວັດຖຸລະເບີດໄວ້ໃນຄອບຄອງໃຫ້ຈຳຄຸກ 1 ປີ ແລະ ປັບໃໝ 5.000.000 ກີບ ແລະ ໃນສະຖານ ມີການຂົນສົ່ງຢາບ້າ, ມີຢາບ້າໄວ້ໃນຄອບຄອງ; ຂົນສົ່ງ ແລະ ມີສານເຄມີ (ແປ້ງຄາເຟອິນ) ເພື່ອນໍາໃຊ້ປຸງແຕ່ງຢາເສບຕິດ ໄວ້ໃນຄອບຄອງ, ລວມໂທດປະຫານຊີວິດ ຮີບຢາບ້າ ຈໍານວນ 4 ເປົາ, ມີ 549 ມັດ, ເທົ່າກັບ 1.098.000 ເມັດ, ນໍ້າໜັກ 130,5 ກິໂລກຣາມ ແລະ ແປ້ງຄາເຟອິນ ຈຳນວນ 48 ເປົາ, ນ້ຳໜັກ 1.200 ກິໂລກຣາມ ຂອງທ້າວ ສົມລີ ເລົ່າ (ຈຳເລີຍ) ມາທຳລາຍຖິ້ມ, ຮີບປືນສັ້ນ 9ມມ ພ້ອມດ້ວຍລູກ ຈໍານວນ 25 ລູກ ແລະ ວັດຖຸລະເບີດ ສະນິດໜາກຟ່າ 05 ຫຼອດ ພ້ອມແກັບ 05 ດອກ ມາເປັນຂອງລັດ ແລ້ວມອບໃຫ້ພາກສ່ວນທີ່ກ່ຽວຂ້ອງຄຸ້ມຄອງຮັກສາໄວ້ຕາມລະບຽບກົດໝາຍ, ຮີບເງິນຈຳນວນ 480.000 ບາດ ທີ່ໄດ້ຈາກການກະທຳຜິດ ແລະ ລົດກະບະ ລີໂວ (REVO) ສີຂາວມຸກ ໝາຍເລກທະບຽນກຳແພງນະຄອນ ຣຫ 5689 ຂອງທ້າວ ສົມລີ ເລົ່າ (ຈໍາເລີຍ) ທີ່ໄດ້ນໍາໃຊ້ເຂົ້າໃນການກະທຳຜິດ ມາເປັນຂອງລັດ.