ສປປ ເກົາຫລີ ຍົກເລີກບັງຄັບໃສ່ຜ້າປິດປາກ ຫລັງປະກາດໄຊຊະນະເໜືອໂຄວິດ

- 114e2e31fedb6eb7c9c6c2912bc21a77c0919494 - ສປປ ເກົາຫລີ ຍົກເລີກບັງຄັບໃສ່ຜ້າປິດປາກ ຫລັງປະກາດໄຊຊະນະເໜືອໂຄວິດ
- 16583075379783 - ສປປ ເກົາຫລີ ຍົກເລີກບັງຄັບໃສ່ຜ້າປິດປາກ ຫລັງປະກາດໄຊຊະນະເໜືອໂຄວິດ

ສຳນັກຂ່າວກາງເກົາຫລີ (Korea Central News Agency: KCNA) ລາຍງານໃນວັນທີ 13 ສິງຫານີ້ວ່າ: ລັດຖະບານ ສປປ ເກົາຫລີ ປະກາດຍົກເລີກມາດຕະການບັງຄັບໃສ່ຜ້າປິດປາກ, ພ້ອມທັງຫລຸດຜ່ອນມາດຕະການຮັກສາໄລຍະຫ່າງ ແລະ ມາດຕະການອື່ນໆ ເພື່ອຄວບຄຸມ ແລະ ປ້ອງກັນການແພ່ລະບາດຂອງໂຄວິດ.

“ຂັ້ນຕອນການບັງຄັບໃສ່ຜ້າປິດປາກຖືກຍົກເລີກໃນທຸກພື້ນທີ່ ຍົກເວັ້ນພື້ນທີ່ແນວໜ້າ, ເມືອງ ແລະ ພື້ນທີ່ຕິດຊາຍແດນ ເນື່ອງຈາກທົ່ວປະເທດໄດ້ກາຍເປັນເຂດປອດພະຍາດລະບາດ” ລາຍງານລະບຸ.

ການເຄື່ອນໄຫວດັ່ງກ່າວມີຂຶ້ນຫລັງຈາກ ສປປ ເກົາຫລີ ປະກາດໄຊຊະນະເໜືອໂຄວິດໃນຕົ້ນອາທິດຜ່ານມາ ເຊິ່ງຖືເປັນໄລຍະເວລາພຽງບໍ່ເທົ່າໃດເດືອນຫລັງຈາກ ສປປ ເກົາຫລີ ລາຍງານວ່າພົບຜູ້ຕິດເຊື້ອໂຄວິດຄົນທຳອິດໃນເດືອນພຶດສະພາ.

ຂະນະທີ່ກ່ອນໜ້ານີ້, ທ່ານ ໂຢຈອງ ນ້ອງສາວຂອງທ່ານ ກິມຈອງອຸນ ຜູ້ນຳສູງສຸດຂອງ ສປປ ເກົາຫລີ ຍັງກ່າວຫາ ສ.ເກົາຫລີ ວ່າ: ເປັນຕົ້ນເຫດຂອງການແພ່ລະບາດຂອງໂຄວິດພາຍໃນປະເທດຈາກການທີ່ນັກເຄື່ອນໄຫວຊາວ ສ.ເກົາຫລີ ປ່ອຍປຸ່ມເປົ້າບັນຈຸໃບປິວຊວນເຊື່ອ, ເງິນໂດລາ ແລະ ເຄື່ອງຂອງຕ່າງໆຂ້າມຊາຍແດນມາ ໂດຍນ້າງອ້າງວ່າເປັນການກໍ່ອາຊະຍາກຳຕໍ່ມະນຸດ ພ້ອມເຕືອນວ່າຈະດຳເນີນການຕອບໂຕ້ຢ່າງຮຸນແຮງ.

ເຖິງຢ່າງໃດກໍຕາມ, ສຳລັບປະຊາຊົນທີ່ມີອາການຂອງພະຍາດທາງເດີນຫາຍໃຈ ຍັງໄດ້ຮັບຄຳແນະນຳໃຫ້ໃສ່ຜ້າປິດປາກ ໂດຍລັດຖະບານພຽງຢາງຍັງຂໍໃຫ້ປະຊາຊົນ “ຕື່ນຕົວ ແລະ ລະມັດລະວັງ” ຕໍ່ “ສິ່ງຜິດປົກກະຕິ” ເຊິ່ງຄາດວ່າໝາຍເຖິງປຸ່ມເປົ້າບັນຈຸໃບປິວຊວນເຊື່ອ ແລະ ເຄື່ອງຂອງຈາກ ສ.ເກົາຫລີ.

ທັງນີ້, ສປປ ເກົາຫລີ ບໍ່ມີການເປີດເຜີຍຕົວເລກຜູ້ຕິດເຊື້ອໂຄວິດທີ່ແນ່ນອນ ໂດຍມີການບັນທຶກຂໍ້ມູນຂອງຜູ້ທີ່ມີອາການໄຂ້ສູງ ເຊິ່ງພົບວ່າໃນໄລຍະການແພ່ລະບາດຂອງໂຄວິດນັບແຕ່ເດືອນເມສາ ມີບັນທຶກຕົວເລກປະຊາຊົນທີ່ມີໄຂ້ສູງເກືອບ 4,8 ລ້ານຄົນ. ຂະນະທີ່ມີລາຍງານຜູ້ເສຍຊີວິດຈາກໂຄວິດຈຳນວນ 74 ຄົນ.

ອ້າງອີງ:

https://www.channelnewsasia.com/asia/north-korea-lifts-mask-mandate-covid-19-victory-2878401

-    AD conten website - ສປປ ເກົາຫລີ ຍົກເລີກບັງຄັບໃສ່ຜ້າປິດປາກ ຫລັງປະກາດໄຊຊະນະເໜືອໂຄວິດ
- lattana banner 1 - ສປປ ເກົາຫລີ ຍົກເລີກບັງຄັບໃສ່ຜ້າປິດປາກ ຫລັງປະກາດໄຊຊະນະເໜືອໂຄວິດ
- lattana banner - ສປປ ເກົາຫລີ ຍົກເລີກບັງຄັບໃສ່ຜ້າປິດປາກ ຫລັງປະກາດໄຊຊະນະເໜືອໂຄວິດ
error: Alert: ເນື້ອຫາຂ່າວມີລິຂະສິດ !!