ລາວ-ຫວຽດນາມ ແລກປ່ຽນບົດຮຽນການພັດທະນາສື່ມວນຊົນໃນຍຸກໃໝ່

- advert banner 728 90 728x90 - ລາວ-ຫວຽດນາມ ແລກປ່ຽນບົດຮຽນການພັດທະນາສື່ມວນຊົນໃນຍຸກໃໝ່

ເນື່ອງໃນໂອກາດລະນຶກວັນສ້າງຕັ້ງສື່ມວນຊົນລາວຄົບຮອບ 67 ປີ ແລະ ປີສາມັກຄີມິດຕະພາບລາວ-ຫວຽດນາມ, ດັ່ງນັ້ນ ສະມາຄົມນັກຂ່າວແຫ່ງ ສປປ ລາວຮ່ວມກັບສະຖາບັນສື່ມວນຊົນ ແລະ ໂຄສະນາແຫ່ງ ສສ.ຫວຽດນາມ, ໄດ້ຈັດສໍາມະນາວິທະຍາສາດໃນຫົວຂໍ້: “ການປ່ຽນແປງໃນຍຸກໃໝ່ ແລະ ສິ່ງທ້າທາຍຕໍ່ສື່ມວນຊົນ” ຂຶ້ນໃນວັນທີ 21 ສິງຫານີ້ທີ່ຫໍວັດທະນະທໍາແຫ່ງຊາດໃນນະຄອນຫລວງວຽງຈັນ, ໂດຍການເປັນປະທານຂອງທ່ານ ສະຫວັນຄອນ ຣາຊມຸນຕຣີ ຮອງລັດຖະມົນຕີກະຊວງຖະແຫລ່ງຂ່າວ, ວັດທະນາທໍາ ແລະ ທ່ອງທ່ຽວ ທັງເປັນປະທານສະມາຄົມນັກຂ່າວແຫ່ງ ສປປ ລາວ, ມີທ່ານຫົວໜ້າສະຖາບັນສື່ມວນຊົນ ແລະ ໂຄສະນາ ສສ.ຫວຽດນາມ ເຈືອງຫງອກນາມ, ພ້ອມດ້ວຍບັນດາຫົວໜ້າບັນນາທິການ ແລະ ນັກຂ່າວຈາກອົງການສື່ມວນຊົນຂະແໜງການຕ່າງໆທັງພາກລັດ ແລະ ເອກະຊົນເຂົ້າຮ່ວມຈໍານວນຫລາຍ.

- new3 - ລາວ-ຫວຽດນາມ ແລກປ່ຽນບົດຮຽນການພັດທະນາສື່ມວນຊົນໃນຍຸກໃໝ່

ທ່ານຮອງລັດຖະມົນຕີ ສະຫວັນຄອນ ຣາຊມຸນຕຣີ ໄດ້ມີຄໍາເຫັນວ່າ: ກອງປະຊຸມສໍາຄັນນີ້ຈັດຂຶ້ນໃນທ່າມກາງບັນຍາກາດທີ່ສອງພັກ, ສອງລັດ ແລະ ປະຊາຊົນສອງປະເທດພວມເບີກບານມ່ວນຊື່ນສະເຫລີມສະຫລອງສອງວັນປະຫວັດສາດລາວ-ຫວຽດນາມ ແລະ ເປັນຄັ້ງທໍາອິດຂອງຂະແໜງສື່ມວນຊົນລາວທີ່ໄດ້ມີການແລກປ່ຽນບົດຮຽນ ແລະ ປະສົບການຕົວຈິງໃນການພັດທະນາວຽກງານສື່ມວນຊົນໃນເງື່ອນໄຂທີ່ເຕັກໂນໂລຊີຂໍ້ມູນຂ່າວສານມີການຂະຫຍາຍຕົວ ແລະ ຫລາກຫລາຍ, ພ້ອມທັງມີອັນສະດວກ ແລະ ສິ່ງທ້າທາຍຫລາຍດ້ານທີ່ພວກເຮົາຈະໄດ້ມີການປຶກສາຫາລືເພື່ອປັບປຸງແກ້ໄຂ ແລະ ພັດທະນາໃຫ້ດີກວ່າເກົ່າ, ຂະນະດຽວກັນທ່ານ ເຈືອງຫງອກນາມ ກໍໄດ້ຍົກໃຫ້ເຫັນບົດຮຽນຕ່າງໆແຫ່ງການພັດທະນາສື່ຫວຽດນາມວ່າ: ປັດຈຸບັນຢູ່ຫວຽດນາມໄດ້ມີອົງການສື່ມວນຊົນຫລາຍກວ່າພັນແຫ່ງ, ໃນນີ້ສື່ສິ່ງພີມມີຈໍານວນ 859 ສະບັບ, ສື່ອີເລັກໂຕຼນິກ 135 ແຫ່ງ, ວິທະຍຸ-ໂທລະພາບຫລາຍກວ່າ 67 ສະຖານີ,ນອກນີ້ບັນດາອົງການລັດຕ່າງໆກໍມີເວບໄຊເປັນຂອງຕົນເອງ, ຂະນະທີ່ການຂະຫຍາຍຕົວໄວຂອງສື່ໃໝ່ ຫລື ສື່ສັງຄົມອອລາຍ ໄດ້ສົ່ງຜົນສະທ້ອນຫລາຍສົມຄວນຕໍ່ການເຄື່ອນໄຫວຂອງອົງການສື່ທີ່ເປັນທາງການ, ໂດຍສະເພາະມັນໄດ້ເຮັດໃຫ້ສັງຄົມມີຄວາມຫ່າງເຫີນຕໍ່ການອ່ານໜັງສືພີມ, ຟັງວິທະຍຸ ແລະ ເບິ່ງໂທລະພາບຫລຸດລົງເທື່ອລະໜ້ອຍແລ້ວຫັນໄປຕິດຕາມຂໍ້ມູນຂ່າວສານຜ່ານລະບົບອີນເຕີເນັດ, ເວບໄຊ ແລະ ສື່ອອນລາຍຕ່າງໆຜ່ານມືຖື, ພ້ອມທັງສາມາດສະແດງຄໍາຄິດເຫັນສ່ວນຕົວຂອງຕົນຕໍ່ກັບບັນຫານັ້ນໄດ້.

- lattana 1 - ລາວ-ຫວຽດນາມ ແລກປ່ຽນບົດຮຽນການພັດທະນາສື່ມວນຊົນໃນຍຸກໃໝ່

ທ່ານ ເຈືອງຫງອກນາມ ກ່າວວ່າ: ການພັດທະນາໄວຂອງລະບົບເຕັກໂນໂລຊີຂໍ້ມູນຂ່າວສານຄືດັ່ງປັດຈຸບັນນີ້, ມັນກໍມີທັງດ້ານດີ ແລະ ຫຍໍ້ທໍ້ຄຽງຄູ່ກັນໄປ ແລະ ອັນສໍາຄັນແມ່ນພວກເຮົາຍັງບໍ່ສາມາດຕ້ານກັບບັນຫາທີ່ກະທົບຕໍ່ພວກເຮົານັ້ນໄດ້, ຍ້ອນເຕັກນິກຕ່າງໆແມ່ນຖືກສ້າງຂຶ້ນ ແລະ ພັດທະນາຢູ່ຕ່າງປະເທດ, ແນວໃດກໍຕາມ, ບົດຮຽນຂອງຫວຽດນາມໃນການແກ້ໄຂ ແລະ ຮັບມືຕໍ່ບັນຫາດັ່ງກ່າວ ກໍຄືການສືບຕໍ່ປັບປຸງໂຄງປະກອບການຈັດຕັ້ງຂອງບັນດາອົງການສື່ໃຫ້ເຂັ້ມແຂງ, ພ້ອມທັງກໍານົດເປົ້າໝາຍການເຄື່ອນໄຫວໃຫ້ໄປຕາມແນວທາງນະໂຍບາຍຂອງພັກ ແລະ ລັດ ແລະ ຕອບສະໜອງຄວາມຕ້ອງການຂອງສັງຄົມໃຫ້ຫລາຍຂຶ້ນ, ເອົາໃຈໃສ່ຍົກລະດັບດ້ານການເມືອງແນວຄິດ ແລະ  ຄວາມຮູ້ຄວາມສາມາດຂອງບຸກຄະລາກອນຂະແໜງສື່ມວນຊົນສູງຂຶ້ນ ແລະ ໜັກແໜ້ນ ເພື່ອໃຫ້ສາມາດນໍາໃຊ້ ແລະ ເຂົ້າເຖິງດ້ານເຕັກໂນໂລຊີຂໍ້ມູນຂ່າວສານທີ່ທັນສະໄໝ, ເພີ່ມທະວີການໂຄສະນາວຽກດີຄົນເດັ່ນໃຫ້ຫລາຍ, ພ້ອມທັງຊອກໃຫ້ເຫັນດ້ານດີ-ດ້ານອ່ອນຂອງບັນຫາຕ່າງໆທີ່ເກີດຂຶ້ນໃນສັງຄົມ ເພື່ອນໍາມາວິເຄາະ-ໃຈ້ແຍກ ເພື່ອສົ່ງເສີມດ້ານດີ ແລະ ຕ້ານດ້ານຫຍໍ້ທໍ້ ແລະ ບັນຫາສຸດທ້າຍແມ່ນບໍ່ຄວນນໍາເອົາຂໍ້ມູນທີ່ບໍ່ມີຄວາມຈິງ ແລະ ບໍ່ໄດ້ຜ່ານການກວດກາຈາກສື່ອອນລາຍມາລົງໃນສື່ທາງການເດັດຂາດ, ເພາະຈະເຮັດໃຫ້ສັງຄົມເກີດຄວາມສັບສົນ ແລະ ເຊື່ອວ່າຂໍ້ມູນນັ້ນເປັນຈິງ ແລະ ອາດຈະສົ່ງຜົນສະທ້ອນອັນບໍ່ດີໃຫ້ແກ່ສັງຄົມຕາມມາ.

error: Content is protected !!