ທະເລສາບໃຫຍ່ທີ່ສຸດຂອງຈີນ ມີລະດັບນ້ຳຫລຸດລົງຕ່ຳຫລາຍ
ສຳນັກຂ່າວ ຈາກຊຽງໄຮ້ ໃຫ້ຮູ້ວ່າ: ວັນທີ 23 ກັນຍາ ນີ້ ທະເລສາບ ໂປຢາງ(Poyang) ເປັນທະເລສາບ ນ້ຳຈືດ ໃຫຍ່ທີ່ສຸດ ຂອງຈີນ ເຊິ່ງເຊື່ອມຕໍ່ກັບ ແມ່ນ້ຳແຢງຊີງ, ແມ່ນ້ຳຍາວທີ່ສຸດຂອງຈີນ ພວມຜະເຊີນກັບບັນຫາໄພແຫ້ງແລ້ງ ມາຕັ້ງແຕ່ ເດືອນມິຖຸນາ ໂດຍ ລະດັບນ້ຳທີ່ຈຸດວັດແທກ ຫລຸດລົງຈາກ 19,43 ແມັດ ເຫລືອພຽງ 7,1 ແມັດ ໃນໄລຍະ 3 ເດືອນຜ່ານມາ.
ຂະນະທີ່ ສູນຕິດຕາມລະດັບນ້ຳ ແຂວງຈ່ຽງຊີ ກ່າວວ່າ:ລະດັບນ້ຳໃນທະເລສາບໂປຢາງ ຈະຫລຸດລົງ ຕ່ຳກວ່ານີ້ອີກໃນຕໍ່ໜ້າ ເນື່ອງຈາກປະລິມານ ນ້ຳຝົນຍັງຄົງໜ້ອຍຕ່ຳກວ່າ 60% ເມື່ອທຽບໃສ່ ປີກາຍ. ປັດຈຸບັນ ສະຖານີຕິດຕາມສະພາບອາກາດ 267 ແຫ່ງ ທົ່ວປະເທດຈີນ ລາຍງານອຸນຫະພູມສູງເປັນປະຫວັດສາດ ໃນເດືອນສິງຫາ ແລະ ສະພາບ ແຫ້ງແລ້ງແລ້ວທົ່ວລຸ່ມ ແມ່ນ້ຳແຢງຊີ ເຮັດໃຫ້ເກີດຜົນກະທົບຕໍ່ການຜະລິດໄຟຟ້າ, ພະລັງງານນ້ຳ ແລະ ສ້າງຄວາມເສຍຫາຍໃຫ້ແກ່ພືດທາງກະສິກຳ ເຖິງວ່າ ຈະເກີດຝົນຕົກໜັກ ຊ່ວຍຫລຸດຜ່ອນໄພແຫ້ງແລ້ງ ໃນບໍລິເວນ ຕາເວັນຕົກສ່ຽງໃຕ້ຂອງຈີນ ແຕ່ບໍລິເວນ ທາງພາກກາງຍັງຄົງຜະເຊີນ ໄພແຫ້ງແລ້ງ, ສະພາບອາກາດຮ້ອນແຮງ ໃນແຂວງຈຽງຊີ ຍາວນານມາເປັນເວລາ ຫລາຍກວ່າ 70 ວັນແລ້ວ.
