ໄຕ້ຝຸ່ນ Noru ພັດຖະຫລົ່ມຟີລິບປິນ ປະຊາຊົນນັບພັນເລັ່ງອົບພະຍົບ ທາງການເຕືອນອາດເກີດນ້ຳຖ້ວມໜັກໃນມະນິລາ
ວັນທີ 25 ກັນຍາ 2022, ຊຸບເປີໄຕ້ຝຸ່ນ Noru ພັດຖະຫລົ່ມຟີລິບປິນ ສົ່ງຜົນໃຫ້ເກີດລົມພັດແຮງ, ຝົນຕົກໜັກ ແລະ ຄື້ນສູງ. ຂະນະທີ່ປະຊາຊົນ 8.300 ກວ່າຄົນຕ້ອງເລັ່ງອົບພະຍົບອອກຈາກພື້ນທີ່ສ່ຽງ ໂດຍ Noru ເປັນໄຕ້ຝຸ່ນຮຸນແຮງທີ່ສຸດທີ່ພັດເຂົ້າຟີລິບປິນໃນປີນີ້ ມີຄວາມໄວລົມສູງເຖິງ 195 ກິໂລແມັດຕໍ່ຊົ່ວໂມງ.
ອິດທິພົນຈາກໄຕ້ຝຸ່ນສົ່ງຜົນໃຫ້ເກີດຝົນຕົກໜັກ ແລະ ລົມແຮງ. ວິດີໂອໃນໂຊຊຽວມີເດຍເຜີຍໃຫ້ເຫັນພາບຂອງຕົ້ນໄມ້ທີ່ໂອນເອນໄປຕາມແຮງລົມຈົນເກືອບຫັກ. ຂະນະທີ່ເກາະໂປລິໂຢຂອງແຂວງເກຊອນນັ້ນເກີດເຫດດິນເຈື່ອນ ໂດຍວັນທີ 25 ກັນຍາ ມີ 2.500 ກວ່າຄົນຕົກຄ້າງຢູ່ຕາມທ່າເຮືອຕ່າງໆ ເນື່ອງຈາກທາງການໄດ້ສັ່ງໂຈະການເດີນທາງທາງເຮືອເພື່ອຄວາມປອດໄພ ອີກທັງຍັງໄດ້ສັ່ງໂຈະຖ້ຽວບິນເກືອບ 50 ຖ້ຽວ.
ກະຊວງກະສິກຳຟີລິບປິນເປີດເຜີຍໃນວັນທີ 25 ກັນຍາວ່າ: ເນື້ອທີ່ກະສິກຳອາດໄດ້ຮັບຜົນກະທົບຈາກໄຕ້ຝຸ່ນ Noru 1,47 ກວ່າລ້ານເຮັກຕາ ເຊິ່ງເປັນເນື້ອທີ່ປູກເຂົ້າ 75% ຂອງປະເທດ ເຮັດໃຫ້ສ່ຽງວ່າສະຖານະການທີ່ເກີດຂຶ້ນອາດເຮັດໃຫ້ເງິນເຟີ້ເພີ່ມຂຶ້ນອີກໃນອະນາຄົດ.
ທັງນີ້, ກົມອຸຕຸນິຍົມວິທະຍາຟີລິບປິນໄດ້ອອກປະກາດເຕືອນໃຫ້ເຝົ້າລະວັງອາດເກີດນ້ຳຖ້ວມຮຸນແຮງໃນພື້ນທີ່ສ່ຽງ ຄືນະຄອນຫລວງມະນິລາ ແລະ ແຂວງໃກ້ຄຽງ. ຂະນະທີ່ ພົນຕຳຫລວດເອກ ໂຣໂດລໂຟ ອາຊູຣິນ ຜູ້ບັນຊາການຕຳຫລວດແຫ່ງຊາດຟີລິບປິນ ຮຽກຮ້ອງໃຫ້ປະຊາຊົນທີ່ອາໄສໃນເຂດອັນຕະລາຍປະຕິບັດຕາມຄຳສັ່ງອົບພະຍົບຢ່າງເຄັ່ງຂັດເມື່ອເກີດເຫດຈຳເປັນ ໂດຍໃນວັນທີ 26 ກັນຍາ ໂຮງຮຽນ ແລະ ສະຖານທີ່ລັດຖະການຫລາຍແຫ່ງໄດ້ປິດຊົ່ວຄາວ.
ຊຸບເປີໄຕ້ຝຸ່ນ Noru ໄດ້ອ່ອນກຳລັງລົງເປັນໄຕ້ຝຸ່ນລະດັບ 4 ໃນຂະນະພັດຜ່ານທາງຕອນກາງຂອງເກາະລູຊອນ ແລະ ຄາດວ່າຈະເຂົ້າສູ່ທະເລຈີນໃຕ້ໃນວັນທີ 26 ກັນຍາ ໂດຍມຸ້ງໜ້າສູ່ຫວຽດນາມ.
ໂດຍປົກກະຕິແລ້ວ ຟີລິບປິນເປັນປະເທດທີ່ມັກຈະຜະເຊີນພາຍຸເປັນປະຈຳ ຫລື ສະເລ່ຍປະມານ 20 ຄັ້ງຕໍ່ປີ ແຕ່ຫລ້າສຸດ ນັກວິທະຍາສາດໄດ້ເຕືອນວ່າ: ພາຍຸຈະມີຄວາມຮຸນແຮງຫລາຍກວ່າເກົ່າ ເນື່ອງຈາກໂລກຂອງເຮົາມີອຸນຫະພູມສູງຂຶ້ນຈາກສະພາບໂລກລວນ ເຊິ່ງຟີລິບປິນເປັນໜຶ່ງໃນປະເທດທີ່ສ່ຽງຕໍ່ຜົນກະທົບຈາກສະພາບໂລກລວນຫລາຍທີ່ສຸດ.
ອ້າງອີງ:
- https://www.aljazeera.com/news/2022/9/25/typhoon-noru-intensifying-explosively-as-it-nears-philippines
- https://www.bloomberg.com/news/articles/2022-09-25/philippines-braces-for-intensifying-super-typhoon-noru-landfall#xj4y7vzkg
- https://edition.cnn.com/2022/09/24/asia/super-typhoon-noru-karding-heads-for-philippines/index.html
