ວົງການກິລາລາວຄືສ້ວຍຫາງປາ

- advert banner 728 90 728x90 - ວົງການກິລາລາວຄືສ້ວຍຫາງປາ

ໂດຍ: ທິດ​ກໍ່າ

- new3 - ວົງການກິລາລາວຄືສ້ວຍຫາງປາ

​ເມື່ອ​ເອີ່ຍ​ເຖິງ​ວົງ​ການ​ກິລາ​ລາວ​ໃນ​ປັດຈຸບັນ ຫລາຍ​ຄົນ​ຮູ້ສຶກ “ທໍ້​ແທ້” ວ່າ​ຊັ້ນ ! ຄໍາ​ວ່າ​ທໍ້​ແທ້​ນີ້​ກໍ​ຍ້ອນ​​ມາເບິ່ງ​​ໃນ​ດ້ານປະສິດທິ ພາບ​ ແລະ ​ປະສິດທິ​ຜົນ​ໃນ​ເວລາ​​ໄປ​ສູ້​ກັບເຂົາ​ຢູ່​ຕ່າງ​ແດນຜົນ​ໄດ້​ຮັບ​ກໍ​ຄືບໍ່​ສູ້​ເຂົາ.

ກ່ອນ​​ເວລາ​ໄປ​ແຂ່ງ​ບາງ​ຄັ້ງ​ເພິ່ນ​ກໍ​ໃຫ້​ສໍາພາດ​ ແລະ ​ຄາດ​ຫວັງ​​ເປົ້າ​ໝາຍວ່າ​ຈະ​ເອົາ​ຄັກໆ,​ແຕ່​ພໍ​ໄປຜະ​ເຊີນໜ້າ​​ແບບ​ເອົາ​ຈິງ​ເອົາ​ຈັງ​ແຮງ​ພັດ​ບໍ່​ສູ້​ເຂົາ. ຈາກ​ນັ້ນ​ໃນ​ເວລາ​ກັບ​ມາ​ບ້ານ​ບາງ​ຄັ້ງ​ກໍຝາ​ມື​ເປົ່າ ​​ແລະ ສີ​ມິດໆ ​ເພາະ​ອັບອາຍ​ ແລະ ​ຢ້ານ​ສັງຄົມ​ເຂົາ​ວິຈານ. ​​ແຕ່​ກ່ອນ​ເວົ້າ​ເຖິງ​ກິລາ​ເປ​ຕັງ​ເກືອບ​ເວົ້າ​ໄດ້​ວ່າ​ລະດັບ​ໂລກ, ​ມາ​ດຽວ​ນີ້​ອືດ​ອາດ​ທັງ​ເຫື່ອ​ໄຫລ​ໄຄ​ຍ້ອຍ, ບານ​ສົ່ງ, ບານບ້ວງກໍມິດ​ປານ​ຫອຍ​ໄຂ່, ມວຍ​ສາກົນ​ກັບ​ມວຍ​ລາຍ​ລາວ​ຍັງ​ພໍ​ກູ້​ໜ້າ​ກູ້​ຕາ, ​ເຫັນ​ລູກ​ຫລານ​ບາງ​ຄົນ​ເຂົາ​ໄປ​ຄ້າ​ກໍາ​ປັ້ນ​ຢູ່​ປະ​ເທດ​ເພື່ອນ​ບ້ານ​ມີ​ກຽດ​ຊື່​ສຽງ​ໂດ່​ງດັ່ງ​ມາ​ແລ້ວຫລາຍ​ຄົນ. ສ່ວນວ່າ​ກິລາ​ບານເຕະ​ໄຄ​ແດ່​ແຕ່​ຕອນ​ຍັງ​ນ້ອຍອາຍຸ 12-13 ປີ​ ບາດ​ໃຫຍ່​ຂຶ້ນ​ມາ​ເປັນ​ທີມຊາດ​ອືດ ອາດ​ປານ​ດຶງ​ຂາ​ເຕົ່າ. ​ໃນ​ເວລາ​ໄປ​ແຂ່ງ​ຢູ່​ຕ່າງປະ​ເທດ​ ທິດ​ກໍ່າ ​ໄດ້​ຍິນ​ຄໍາ​ເວົ້າ​ແຕ່​ໜຸ່ມ​ຈົນ​ເຖົ້າ​ວ່າ​ໄປ​ເອົາ​ປະສົບ​ປະການ​ ແລະ ​ຖອດ​ຖອນ​ບົດຮຽນ. ຕໍ່​ຄໍາ​ເວົ້າເຫລົ່າ​ນີ້ ​​ໄດ້​ຍິນ ​ແລະ ໄດ້​ຟັງ​ມາຈົນ​ລຶ້ງຫູ. ສະຫລຸບ ຖ້າ​ຈະ​ເວົ້າ​ໃຫ້​ວົງ​ການ​ກິລາ​ບ້ານ​ເຮົາ​ໃນ​ປັດຈຸບັນ​​ມັນ​ສ້ວຍ​ລົງ​ຄື​ຫາງ​ຂີ້​ໂກະ ​ຍ້ອນ​ວ່າ​ມັນ​ບໍ່​ກ້າວ​ໄປ​ໜ້າ, ກົງກັນຂ້າມ​ພັດ​ມີ​ການ​ຖອຍຫລັງ​ໄປ​ຕິກໆ ປະ​ເພດ​ທີ່​ເປັນຕາ​ເວົ້າ​ກວ່າ​ໝູ່​ແມ່ນ​ກິລາ​ບານ​ເຕະ ມັນ​ຍິ່ງ​ຂີ້ຮ້າຍ​ລົງ​ນັບ​ມື້.​ ແຕ່​ກ່ອນ​ວົງ​ການ​ບານ​ເຕະ​ລາວ​ຊະນະ​ກໍາປູ​ເຈຍ, ​ບຣູ​ໄນ ​ແລະ ​ຕີ​ມໍ​ເລ​ສ​ເຕ, ສ່ວນວ່າ​ກັບ​ມຽນມາ, ມາ​ເລເຊຍ​, ສິງກະ​ໂປ​ນັ້ນ​ສູ​ສີ​ກັນ​ໄຂ່​ເປັດ​ໄຂ່​ໄກ່ ແລະ ​ຕົກ​ໃນ​ອັນດັບ​ທີ 6 ຫລື 7 ຂອງ​ອາ​ຊຽນ. ​ແຕ່​ມາ​ດຽວ​ນີ້​ອາດ​ຕົກໄປ​ເປັນ​ນາຍທ້າຍ​ປ່ອຍ​ໃຫ້​ປະ​ເທດ​ອື່ນ​ເຂົາ​ພາກັນ​ແຫ່​ໄປ​ເອົາ​ຕ່ອນ​ກ່ອນ.

ຕາມ​ທິດ​ກໍ່າ​ວ່າ, ການ​ທີ່​ວົງ​ການ​ບານເຕະ​ລາວ ​ກໍ​ຄື​ກິລາ​ປະ​ເພດ​ອື່ນໆ​ຕົກ​ຢູ່​ໃນ​ສະພາບ​ແລະ ເງື່ອນ​ໄຂ​​ເປັນ​ໝັນ​ແບບ​ສ້ວຍ​ຫາງ​ຂີ້​ໂກະນີ້, ມັນ​ກໍ​ເນື່ອງ​ມາ​ຈາກຫລາຍ​ສາ​ເຫດ​ ຄືອັນ​ທີ​ໜຶ່ງ​ແມ່ນ​ຂຶ້ນ​ກັບ​ເງິນ ມັນ​ກໍ​ຄື​ເຂົາ​ວ່າ​ຫັ້ນ​ລະ ​ມີ​ເງິນຫລາຍ​ເຮັດ​ຫຍັງ​ກໍໄດ້, ອັນ​ສອງ​ມາແມ່ນ​ຂຶ້ນ​ກັບ​ຄົນ ​ເວົ້າ​ເຖິງ​ຄົນ​ກໍ​ຕ້ອງ​​ເປັນ​ຄົນ​ເກັ່ງ​ອີ່ຫລີ ບໍ່​ເປັນ​ຄົນ​ເຄິ່ງໆ​ກາງໆ​ ທັງ​ບໍ່​ແມ່ນ​ຄົນ​ເຈົ້າ​ຄົນ​ຂ້ອຍ, ອັນ​ສາມ​ກໍ​ແມ່ນ​ລະບົບການຈັດ​ຕັ້ງ​ບໍລິຫານ, ຄຸ້ມ​ຄອງ​ບັນຊາ​ຕ້ອງ​ແທດ​ເໝາະ​ສອດຄ່ອງ​ ແລະ ​ທັນ​ສະ​ໄໝກັບ​ຍຸກ​ການ​ປ່ຽນ​ແປງ​​ໃໝ່ຂອງ​ໂລກ ທັງ​ມີວິ​ໄສ​ທັດ ​ແລະ ​ມຸມ​ມອງ​ແນວ​ຄວາມ​ຄິດ​ທີ່​ລ້ຳ​ຍຸກ, ​ອັນ​ທີ​ສີ່ກໍແມ່ນ​ໃນ​ດ້ານ​ເຕັກນິກ​ອຸປະກອນ​ຮັບ​ໃຊ້​ຕ້ອງ​ພຽງພໍກັບ​ຄວາມ​ຮຽກຮ້ອງ​ຕ້ອງການ​ດີ​ສົມ​ຄວນ ​ຈຶ່ງ​ສາ​ມາດ​ກະຕຸກ​ຊຸກຍູ້​ໃຫ້​ວຽກ​ງານ​ທຸກ​ຢ່າງ​ເດີນ​ໄດ້. ສ່ວນວ່າ​ອັນ​ສຸດ​ທ້າຍ​ແມ່ນ​ເຫັນ​ວ່າ​ຢູ່ ບ້ານ​ເຮົາ​ຍັງ​ບໍ່​ມີວົງ​ການ​ກິລາ​ປະ​ເພດ​ໃດ​ເປັນ​ອາຊີບ ພໍ​ຮອດ​ຍາມ​ແຂ່ງຂັນ​ມາກໍຮ້ອງ​ກັນ​ເຂົ້າ​ສູນ​ດ້າມ​ເດືອນ​ສອງ​ເດືອນ​​ແລ້ວ​ພາ ກັນ​ຍົກ​ທີມໄປ​ແຂ່ງ, ຊ້ຳ​ບໍ່​ໜໍາ​ອັດຕາ​ບໍາລຸງບໍ່​ພຽງພໍ​ມັນ​ກໍ​ເລີຍ​ພາກັນ​ເຮັດ​ຄື​ໂສ້​ບໍ່​ເຄັ່ງ, ນັກ​ກິລາ​ເຮົາ​ສ່ວນ​ຫລາຍ​ແມ່ນ​ສູ້​ດ້ວຍ​ໃຈ ​ແລະ ​ສູ້​ດ້ວຍ​ຄວາມ​ມັກ​ຮັກ. ທັງ​ໝົດ​ທີ່​ເວົ້າ​ມາ​ນີ້​ມັນ​ກໍ​ຂຶ້ນກັບ​ຄົນ​ທີ່​ເປັນ​ຂອດ​ຕັດສິນ​ວ່າ​ຈະ​ໄດ້​ ຫລື ​ບໍ່​ໄດ້.

- lattana 1 - ວົງການກິລາລາວຄືສ້ວຍຫາງປາ

​ໃນຫລາຍ​ປີຜ່ານມາ, ​ເວົ້າ​ເຖິງ​ການ​ສັນ​ຫາ​ນັກ​ກິລາ​ທີ່​ເກັ່ງ​ໃນ​ທົ່ວ​ປະ​ເທດ​ກໍ​ຫາກ​ຍັງ​ພໍ​ມີ​ຢູ່,​ແຕ່​ອັນ​ສໍາຄັນ​ເວລາ​ມາ​ເຝິກ​ແອບ​ບາດ​​ໃກ້​ຈະ​ຮອດ​ມື້​ໄປ​ແຂ່ງ​ແທ້​ພັດຍັງ​ມີ​ຄົນ​ເຈົ້າ​ຄົນ​ຂ້ອຍ, ຫລິ້ນ​ພັກຫລິ້ນ​ພວກ, ບາດ​ເວລາ​ໄປ​ແຂ່ງ​ໄດ້​ເງິນ​ລາງວັນ​ມາ​ແທນ​ທີ່​ນັກ​ກິລາ​ທີ່​ມັນ​ສູ້​ຕາຍ​ຈະ​ໄດ້​ເປັນ​ກອບ​ເປັນ​ກໍາ​ແດ່ ​ພັດ​ແຈກ​ຢາຍ​ໄປ​ຕະປິດ​ຕະປີ່​ ເຜີໆ​ແມ່ນ​​ຜູ້​​ເປັນ​ນາຍໄດ້​ຫລາຍ​ກວ່າ. ນີ້​ຄື​ອາຖັນ​ຂອງ​ວົງ​ການ​ກິລາ​ລາວ​ທີ່​ຈະ​ຕ້ອງ​ໄດ້​ຜ່າຕັດ​ຢ່າງ​ແທດ​ເຖິງ ​ແລະ​ ເດັດ​ຈິງ​ຈັງ. ຈາກ​ສະພາບ​ການ​ຕ່າງໆ​ທີ່​ມັນ​ຍັງ​ມີ​ປາກົດ​ການ​ຫຍໍ້​ທໍ້​ໃນ​ວົງ​ການ​ກິລາ​ລາວ​ພວກ​ເຮົາ ​ກໍ​ຕ້ອງ​ໄດ້​ພ້ອມ​ກັນ​ຄິດ ​ແລະ ​ພ້ອມ​ກັນ​ແກ້. ກົງກັນຂ້າມ​ ຖ້າ​ພວກ​ເຮົາ​ຫາກ​ຖື​ເບົາ​ກໍສະ​ແດງ​ວ່າການປະ ຕິບັດ​ມະຕິ 9 ກັບ​ມະຕິ 10 ຂອງ​ພັກ​ບໍ່​ມີ​​ຜົນສັກສິດ ​ແລະ ​ບໍ່​ເປັນ​ຮູ​ບປະ​ທໍາ​ ກາຍ​ເປັນ​ທິດ​ສະ​ດີ​ນ້ຳ​ເຕົ້າ​ເປົ່າ​ ເພາະວ່າ​ການ​ສ້າງ​ນັກ​ກິລາ​ທີ່​ເກັ່ງ​ກໍ​ແມ່ນ​ການ​ສ້າງ​ຊັບພະຍາກອນ​ມະນຸດ​ທີ່​ເກັ່ງ.

​ເຖິງ​ຢ່າງ​ໃດ​ກໍ​ດີ, ຕາມ​ທິດ​ກໍ່າ​ຄິດ​ ຄວາມ​ຫວັງ​ຂອງ​ວົງ​ການ​ກິລາ​ລາວພໍ​ຍັງ​ມີ​ທາງ​ອອກ​ໃນ​ຫລາຍ​ດ້ານ ແລະ ທາງ​ອອກ​ແຕ່​ລະ​ດ້ານ​ກໍຕ້ອງ​ໄປຕາ​ມ​ແຕ່ລະ​ຂໍ້​ທີ່​ໄດ້​ກ່າວ​ມາ​ຂ້າງ​ເທິງ, ອັນ​ສໍາຄັນ​ກ່ອນ​ອື່ນ​ໝົດ​ແມ່ນ​ເລີ່ມຈາກຄົນ, ​ຈາກ​ແນວ​ຄິດ​ກ້າວ​ໄປ​ເຖິງ​ການ​ກະທໍາ​ທີ່​ປອດ​ໃສຂາວ​ສະອາດ, ຖື​ເອົາ​ການ​ກິລາ​ເປັນ​ບໍ່​ເກີດ​ແຫ່ງ​ການ​ສ້າງ​ຄົນ​ໃຫ້​ໄປ​ເຖິງ​ເປົ້າ. ​ເມື່ອ​ນັ້ນ​ລະ​ ກຽດ​ສັກ​ສີ​ໃບ​ໜ້າ​ໃບ​ຕາ​ຂອງຕົນ​ເອງ ​ແລະ ​ຂອງ​ຊາດ ​ຈຶ່ງ​ຈະເປັນ​ທີ່​ຍອມຮັບ​ຈາກ​ປວງ​ຊົນ​ລາວ​ທັງ​ຊາດ.

error: Content is protected !!