ນາຍົກເນັ້ນຫລາຍວຽກງານສໍາຄັນ

- advert banner 728 90 728x90 - ນາຍົກເນັ້ນຫລາຍວຽກງານສໍາຄັນ

ກອງປະຊຸມລັດຖະບານສະໄໝສາມັນປະຈໍາເດືອນສິງຫາ 2017 ໄດ້ມີຂຶ້ນ ໃນທ້າຍອາທິດຜ່ານມາຢູ່ທີ່ສໍານັກງານນາຍົກລັດຖະມົນຕີ, ພາຍໃຕ້ການເປັນປະທານຂອງທ່ານ ທອງລຸນ ສີສຸລິດ ນາຍົກລັດຖະມົນຕີ, ມີບັນດາຮອງນາຍົກລັດຖະມົນຕີ ແລະ ສະມາຊິກລັດຖະບານເຂົ້າຮ່ວມຢ່າງພ້ອມພຽງ.
ກອງປະຊຸມໄດ້ລາຍງານສະພາບພົ້ນເດັ່ນຢູ່ພາຍໃນ ແລະ ຕ່າງປະເທດ, ຜົນກະທົບຈາກໄພນໍ້າຖ້ວມ, ພ້ອມທັງໄດ້ຮັບຮອງເອົາດ້ານຫລັກການຂອງຮ່າງດໍາລັດຈໍານວນໜຶ່ງຄື: ຮ່າງດໍາລັດວ່າດ້ວຍວັນພັກ, ຮ່າງດໍາລັດວ່າດ້ວຍມາດຕະ ຖານພົ້ນທຸກ ແລະ ມາດຕະຖານພັດທະນາ ແລະ ຮ່າງດໍາລັດວ່າດ້ວຍເງິນເບ້ຍລ້ຽງສໍາລັບນັກຮຽນຜູ້ທຸກຍາກ ແລະ ດ້ອຍໂອກາດໃນສາຍສາມັນສຶກສາ. ກອງປະຊຸມໄດ້ຕົກລົງເປັນເອກະພາບເຫັນດີອະນຸມັດຕົວເລກລັດຖະກອນໃໝ່ປະຈໍາປີ 2018 ເພື່ອທົດແທນພະນັກງານ-ລັດຖະກອນທີ່ໄດ້ອອກທຸກຮູບການເທົ່ານັ້ນ ແລະ ຈະມີຂໍ້ຕົກລົງວ່າດ້ວຍການອະນຸມັດຕົວເລກລັດຖະກອນປີ 2018 ອອກມາສະເພາະ, ພ້ອມທັງມອບໃຫ້ທຸກພາກສ່ວນນັບແຕ່ສູນກາງຮອດທ້ອງຖິ່ນກວດກາຄືນບັນດາຕໍາແໜ່ງງານອັນໃດຈໍາເປັນ ແລະ ອັນໃດບໍ່ຈໍາເປັນ ເພື່ອເຮັດໃຫ້ພະນັກງານຜູ້ໜຶ່ງສາມາດເຮັດວຽກໄດ້ຫລາຍດ້ານ, ສິ່ງສໍາຄັນກົງຈັກການຈັດຕັ້ງແຕ່ສູນກາງລົງຮອດທ້ອງຖິ່ນແມ່ນບໍ່ໃຫ້ຂະຫຍາຍເພີ່ມ ແລະ ໃຫ້ເພີ່ມມາດຕະຖານພະນັກງານ-ລັດຖະກອນເພື່ອຮັບປະກັນໃຫ້ມີຄຸນນະພາບ, ມີປະສິດທິພາບ, ມີຄວາມຮັບພິຊອບໃນການປະຕິບັດໜ້າທີ່ວຽກງານຂອງຕົນ.

- new3 - ນາຍົກເນັ້ນຫລາຍວຽກງານສໍາຄັນ

ກອງປະຊຸມໄດ້ຕົກລົງໃຫ້ມີການສຶກສາສຳຫລວດ, ຄົ້ນຄວ້າ, ເກັບກຳຂໍ້ມູນລະອຽດໃນຂະແໜງບໍ່ແຮ່ຄືນໃໝ່ ຈຶ່ງກ້າວໄປສູ່ການວາງແຜນສະຫງວນ ຫລື ຂຸດຄົ້ນມານຳໃຊ້ຕາມຄວາມເໝາະສົມ ແລະ ເພີ່ມທະວີຄວາມເອົາໃຈໃສ່ຂອດຄຸ້ມຄອງການລົງທຶນໃຫ້ດີ, ຖືກຕ້ອງຕາມມາດຕະຖານເຕັກນິກ ແລະ ສອດຄ່ອງກັບລະບຽບກົດໝາຍ. ສ່ວນດ້ານພະລັງງານແມ່ນຕ້ອງໝູນໃຊ້ທ່າແຮງຂອງທ້ອງຖິ່ນໃຫ້ເກີດປະໂຫຍດ, ໂດຍສະເພາະການສ້າງ ແລະ ນຳໃຊ້ພະລັງງານທົດແທນໃຫ້ຫລາຍຂຶ້ນ.
ໃນໂອກາດນີ້, ທ່ານນາຍົກລັດຖະມົນຕີໄດ້ເນັ້ນໃຫ້ສະມາຊິກລັດຖະບານສືບຕໍ່ ເພີ່ມທະວີຄວາມເອົາໃຈໃສ່ວຽກງານຂອງຕົນໃຫ້ມີປະສິດທິຜົນກວ່າເກົ່າຄື: ຕິດຕາມຢ່າງໃກ້ຊິດສະພາບການພາກພື້ນ ແລະ ສາກົນ, ໂດຍໃຫ້ສາມາດຊີ້ໃຫ້ເຫັນຄວາມສ່ຽງ ແລະ ທ່າອ່ຽງຜົນກະທົບທາງດ້ານການເມືອງ, ເສດຖະກິດ ແລະ ສັງຄົມ ກໍຄືການພັດທະນາຂອງປະເທດເຮົາ, ເພີ່ມທະວີຄວາມເອົາໃຈໃສ່ວຽກງານຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍ, ໂດຍສະເພາະການແກ້ໄຂປະກົດການຫຍໍ້ທໍ້ຕ່າງໆໃນສັງຄົມ ເປັນຕົ້ນ: ຢາເສບຕິດ, ອຸປະຕິເຫດຕາມທ້ອງຖະໜົນ, ປຸ້ນຈີ້-ຊີງຊັບ ແລະ ອື່ນໆ ແລະ ປັດຈຸບັນເຫັນວ່າສະພາບການລັກຊັບຂອງຊາວຕ່າງປະເທດແມ່ນທີ່ມີທ່າອ່ຽງເພີ່ມຂຶ້ນ, ເຊິ່ງມັນກະທົບເຖິງຄວາມສະຫງົບ, ຊື່ສຽງ, ການທ່ອງທ່ຽວ ແລະ ການລົງທຶນຂອງປະເທດເຮົາຕໍ່ສາກົນ ແລະ ກະທົບໂດຍກົງຕໍ່ການເປີດປີທ່ອງທ່ຽວລາວປີ 2018 ທີ່ຈະມາເຖິງນີ້, ດັ່ງນັ້ນຕ້ອງພາກສ່ວນກ່ຽວຂ້ອງຕ້ອງເອົາໃຈໃສ່ແກ້ສະພາບບໍ່ດີດັ່ງກ່າວໃຫ້ຂາດຕົວໂດຍໄວ, ສືບຕໍ່ຄົ້ນຄວ້າແກ້ໄຂໜີ້ສິນໂຄງການລົງທຶນຂອງລັດດ້ວຍວິທີການທີ່ເໝາະສົມ ແລະ ຄົ້ນຄວ້າປະເມີນໂຄງການລົງທຶນຂອງລັດກ່ອນພິຈາລະນາເຂົ້າແຜນ, ໂດຍເນັ້ນໃສ່ປະສິດທິຜົນຂອງໂຄງການ, ຄວາມອາດສາມາດໃນການສະໜອງງົບປະມານ ແລະ ຫລຸດຜ່ອນການສ້າງໜີ້ສິນເພີ່ມໃຫ້ແກ່ລະບົບງົບປະມານລັດທີ່ຍັງຢູ່ໃນສະພາບບໍ່ເຂັ້ມແຂງ, ສືບຕໍ່ປັບປຸງລັດວິສາຫະກິດການບີນລາວ ແລະ ລັດວິສາຫະກິດໄຟຟ້າລາວໃຫ້ມີຄວາມຄືບໜ້າໂດຍໄວ, ເອົາໃຈໃສ່ຄຸ້ມຄອງການນຳເຂົ້າສິນຄ້າ ແລະ ເຄື່ອງອຸປະໂພກ-ບໍລິໂພກທີ່ມີຄວາມສ່ຽງອັນຕະລາຍຕໍ່ສຸຂະພາບຂອງປະຊາຊົນ, ເພີ່ມທະວີການຕິດຕາມສະພາບດິນຟ້າອາກາດ ແລະ ແຈ້ງເຕືອນປະຊາຊົນ, ພ້ອມທັງກະ

ກຽມຄວາມພ້ອມໃນການຮັບມື, ແກ້ໄຂ ແລະ ຊ່ວຍເຫລືອຜູ້ໄດ້ຮັບຜົນກະທົບໃຫ້ທັນການ, ສືບຕໍ່ເອົາໃຈໃສ່ເຝົ້າລະວັງ ແລະ ປ້ອງກັນເຊື້ອພະຍາດຕິດຕໍ່ທີ່ອາດຈະເກີດຂຶ້ນຕາມລະດູການ ເປັນຕົ້ນ: ພະຍາດໄຂ້ຫວັດໃຫຍ່, ໄຂ້ຫວັດສັດປີກ, ຫູໝູກ່ຳ, ປາກເປື່ອຍລົງເລັບ, ທ້ອງເບັງແບ້ ແລະ ພະຍາດລະບາດອື່ນໆ, ຮີບຮ້ອນກວດກາສະພາບເສັ້ນທາງທີ່ເປ່ເພໃນທົ່ວປະເທດເພື່ອສ້າງແຜນສ້ອມແປງໃຫ້ທັນການ, ເອົາໃຈໃສ່ກວດກາລົດບັນທຸກສິນຄ້າຂົນສົ່ງເກີນນໍ້າໜັກ ແລະ ຈໍາກັດຊ່ອງຫວ່າງບໍ່ໃຫ້ເຈົ້າໜ້າທີ່ສວຍໂອກາດເກັບເງິນໂດຍບໍ່ຖືກຕ້ອງ ແລະ ກາຍເປັນປະກົດການຫຍໍ້ທໍ້ໃນສັງຄົມ, ພ້ອມນີ້ກໍໃຫ້ກະກຽມໃຫ້ແກ່ການເປີດສົກຮຽນໃໝ່ 2017-2018 ໃຫ້ເປັນຂະບວນຟົດຟື້ນ, ຖືເອົາໂອກາດເປີດສົກຮຽນໃໝ່ເປັນໂອກາດສໍາຄັນໃນການສຶກສາອົມຮົມນັກຮຽນ-ນັກສຶກສາໃຫ້ເອົາໃຈໃສ່ໃນການຮ່ຳຮຽນ, ມີນ້ຳໃຈຮັກຊາດ, ມີຄວາມພະຍາຍາມອົດທົນ, ມີຄວາມເສຍສະຫລະ, ຫ່າງໄກຢາເສບຕິດ ແລະ ຖຶເອົາຄວາມເອົາໃຈໃສ່ໃນການຮ່ຳຮຽນເປັນການປະກອບສ່ວນເຂົ້າໃນພາລະກິດປົກປັກຮັກສາ ແລະ ພັດທະນາປະເທດຊາດ.

- lattana 1 - ນາຍົກເນັ້ນຫລາຍວຽກງານສໍາຄັນ
error: Content is protected !!