ກຳປູເຈຍແຈກເງິນໃຫ້ກວ່າ 3 ແສນຄອບຄົວ ຊ່ວຍເຫລືອເງິນເຟີ້-ນ້ຳຖ້ວມ

ສຳນັກຂ່າວຊິນຮົວລາຍງານວ່າ: ກຳປູເຈຍໄດ້ເລີ່ມແຈກຢາຍເງິນໃຫ້ປະຊາຊົນປະມານ 1,3 ລ້ານຄົນຈາກເກືອບ 360.000 ຄອບຄົວ ທີ່ໄດ້ຮັບຜົນກະທົບຈາກແຮງກົດດັນດ້ານເງິນເຟີ້ ແລະ ເຫດອຸທົກກະໄພຄັ້ງຫລ້າສຸດ. ຫົວໜ້າຫ້ອງການເສດຖະກິດ ແລະ ການເງິນກຳປູເຈຍ ຖະແຫລງການຄາດຄະເນວ່າ: ລັດຖະບານຈະໃຊ້ຈ່າຍເງິນທັງໝົດ 31 ລ້ານໂດລາສະຫະລັດ ສຳລັບຄອບຄົວທີ່ໄດ້ຮັບຜົນກະທົບຈາກແຮງກົດດັນດ້ານເງິນເຟີ້ ແລະ ອີກ 15 ລ້ານໂດລາສະຫະລັດ ສຳລັບຄອບຄົວທີ່ປະສົບອຸທົກກະໄພເມື່ອບໍ່ດົນມານີ້ ເປັນໄລຍະເວລາ 3 ເດືອນ ເລີ່ມແຕ່ເດືອນທັນວາຫາເດືອນກຸມພາ.

ຄຳສັ່ງທີ່ລົງນາມໂດຍທ່ານ ຮຸນເຊນ ນາຍົກລັດຖະມົນຕີກຳປູເຈຍ ໃນອາທິດຜ່ານມາ ຊີ້ວ່າ: ກະຊວງການວາງແຜນຂອງປະເທດເປັນຜູ້ຄັດເລືອກຄອບຄົວທີ່ໄດ້ຮັບເງິນດັ່ງກ່າວຕາມພື້ນທີ່ອາໄສ.

ຄອບຄົວທີ່ອາໄສໃນນະຄອນຫລວງພະນົມເປັນໄດ້ຮັບເງິນ 25 ໂດລາສະຫະລັດ ໂດຍສະມາຊິກໃນຄອບຄົວຈະໄດ້ຮັບເງິນເພີ່ມອີກຄົນລະ 7 ໂດລາ, ຄອບຄົວຢູ່ຕ່າງແຂວງຈະໄດ້ຮັບເງິນ 22 ໂດລາ ໂດຍສະມາຊິກໃນຄອບຄົວຈະໄດ້ຮັບເງິນເພີ່ມອີກຄົນລະ 6 ໂດລາ, ສ່ວນຄອບຄົວໃນຊົນນະບົດຈະໄດ້ຮັບເງິນ 20 ໂດລາ ໂດຍສະມາຊິກໃນຄອບຄົວຈະໄດ້ຮັບເງິນເພີ່ມອີກຄົນລະ 5 ໂດລາ.

ຂະນະທີ່ຄອບຄົວທີ່ປະສົບອຸທົກກະໄພເມື່ອບໍ່ດົນມານີ້ໃນນະຄອນຫລວງພະນົມເປັນ ແລະ ອີກ 15 ແຂວງ ຈະໄດ້ຮັບເງິນຄອບຄົວລະ 20 ໂດລາ ໂດຍສະມາຊິກໃນຄອບຄົວຈະໄດ້ຮັບເງິນເພີ່ມອີກຄົນລະ 4 ໂດລາ.

ທັງນີ້, ທະນາຄານໂລກລະບຸໃນລາຍງານເສດຖະກິດກຳປູເຈຍວ່າ: ລາຄາພະລັງງານ, ປຸ໋ຍ ແລະ ອາຫານທີ່ເພີ່ມສູງຂຶ້ນທົ່ວໂລກ ກະຕຸ້ນໃຫ້ອັດຕາເງິນເຟີ້ໃນກຳປູເຈຍເພີ່ມສູງຂຶ້ນ ໂດຍອັດຕາເງິນເຟີ້ລາຄາຜູ້ບໍລິໂພກສູງເຖິງ 7,8% ໃນເດືອນມິຖຸນາ, ແຕ່ຫລຸດລົງເຫລືອ 4,9% ໃນເດືອນສິງຫາຜ່ານມາ. ພ້ອມຊີ້ວ່າ: ອັດຕາເງິນເຟີ້ທີ່ເພີ່ມຂຶ້ນສົ່ງຜົນກະທົບໜັກໜ່ວງຕໍ່ຄອບຄົວທຸກຍາກ.