ປກສ ເມືອງຫາດຊາຍຟອງ ຈັບເປົ້າໝາຍຄ້າຂາຍຢາເສບຕິດ ພ້ອມຂອງກາງຢາບ້າ 42.000 ເມັດ

ທ່ານ ພັທ ບຸນມີ ກັນຕີຍາວົງ ຮອງຫົວໜ້າກອງບັນຊາການ ປກສ ເມືອງຫາດຊາຍຟອງ, ຜູ້ຊີ້ນຳວຽກງານພະແນກຕຳຫລວດ ໃຫ້ສຳພາດຕໍ່ປ້ອງກັນຄວາມສະຫງົບນະຄອນຫລວງວຽງຈັນ ວັນທີ 15 ທັນວາ 2022 ວ່າ: ໄລຍະເດືອນ ພະຈິກ ປີ 2022 ຜ່ານມາ ມີພົນລະເມືອງດີແຈ້ງມາຫາເຈົ້າໜ້າທີ່ ປກສ ເມືອງຫາດຊາຍຟອງວ່າມີກຸ່ມຄົນບໍ່ດີເຄື່ອນໄຫວຄ້າຂາຍຢາເສບຕິດ ຢູ່ບ້ານນາທົ່ມ ເມືອງໄຊທານີ ນະຄອນຫລວງວຽງຈັນ ຈາກນັ້ນ, ເຈົ້າໜ້າທີ່ຈຶ່ງໄດ້ລົງເກັບກຳຂໍ້ມູນເພື່ອພິສູດແຫລ່ງຂ່າວເຫັນວ່າແມ່ນມີມູນຄວາມຈິງ.

ມາຮອດວັນທີ 7 ທັນວາ 2022 ເວລາປະມານ 17:50 ໂມງ ເຈົ້າໜ້າທີ່ໜ່ວຍງານສະກັດກັ້ນ ແລະ ຕ້ານຢາເສບຕິດ ພະແນກຕຳຫລວດ ປກສ ເມືອງຫາດຊາຍຟອງ, ໄດ້ສົມທົບກັບພະແນກຕຳຫລວດສະກັດກັ້ນ ແລະ ຕ້ານຢາເສບຕິດ ປກສ ນະຄອນຫລວງວຽງຈັນລົງແກ້ໄຂເປົ້າ ໝາຍຄ້າຂາຍຢາຕິດ ຢູ່ບ້ານນາທົ່ມ ເມືອງໄຊທານີ ນະຄອນຫລວງວຽງຈັນ ກັກຕົວເປົ້າໝາຍໄດ້ 1 ຄົນ ຊື່ທ້າວ ເຫລົ່າປໍ ອາຍຸ 31 ປີ ອາຊີບ ປະຊາຊົນ ບ້ານເກີດ ຜາງາມ ເມືອງຮຸນ ແຂວງອຸດົມໄຊ, ປັດຈຸບັນພັກເຊົາຢູ່ບ້ານຕານມີໄຊ ເມືອງໄຊທານີ ນະຄອນຫລວງວຽງຈັນ ພ້ອມຂອງກາງຢາບ້າຈຳນວນ 20 ມັດເທົ່າກັບ 40.000 ເມັດ, ຮອດເວລາ 20:30 ໂມງ ຂອງວັນດຽວກັນໄດ້ຂະຫຍາຍຜົນຫາກຸ່ມຮ່ວມຂະບວນການພັກເຊົາຢູ່ຫ້ອງແຖວ ຢູ່ເຂດບ້ານໜອງວຽງຄໍາ ເມືອງໄຊທານີ ແຕ່ຜູ້ກ່ຽວໄດ້ເອົາຕົວຫລົບໜີ. ຈາກນັ້ນ ເຂົ້າກວດຄົ້ນຫ້ອງແຖວ ພົບເຫັນຢາເສບຕິດຈຳນວນ 1 ມັດ ເທົ່າກັບ 2.000 ເມັດ, ລວມຂອງກາງຢາບ້າ ຈຳນວນທັງໝົດ 42.000 ເມັດ. ຜ່ານການສືບສວນ-ສອບສວນ ຜູ້ກ່ຽວຮັບສາລະພາບວ່າ: ໄດ້ພົວພັນຄ້າຂາຍຢາເສບຕິດແທ້. ສ່ວນຢາບ້າທີ່ນໍາມາຂາຍແມ່ນຊື້ນໍາກຸ່ມຮ່ວມຂະບວນການ ຫລັງຈາກໄດ້ຢາບ້າແລ້ວກໍນຳໄປຂາຍໃຫ້ໄວໜຸ່ມບໍ່ຊາບຊື່.

ປັດຈຸບັນຄະດີດັ່ງກ່າວເຈົ້າໜ້າທີ່ ປກສ ເມືອງຫາດຊາຍຟອງ ພວມສືບສວນ-ສອບສວນຂະຫຍາຍຜົນ ເພື່ອຊອກຫາກຸ່ມແກ້ງຜູ້ຮ່ວມຂະບວນການ ເພື່ອນຳຕົວພວກກ່ຽວມາດຳເນີນຄະດີຕາມຂັ້ນຕອນຂອງກົດໝາຍ.