ເຈົ້າໜ້າທີ່ໄທ ຈັບນາງເອກຊື່ດັງພ້ອມສາມີ ຮ່ວມກັນເປີດເວັບພະນັນເຖື່ອນ ຢຶດຂອງກາງຫລາຍລາຍການ

ສຳນັກຂ່າວຕ່າງປະເທດລາຍງານວ່າ: ວັນທີ 16 ທັນວາ 2022 ນີ້ ຜູ້ບັງຄັບບັນຊາຕຳຫລວດແຫ່ງຊາດໄທ ຖະແຫລງບຸກຈັບ ນາງເອກຊື່ດັງ ພ້ອມສາມີ ໃນຂໍ້ຫາເປີດເວັບພະນັນເຖື່ອນ ufa24h.net ແລະ hd.star4k.com ຢຶດລົດຊຸບເປີຄຣາ, ໂມງ, ກະເປົາແບຣນເນມ, ລວມເຮືອນອີກ 4 ຫລັງ, ຈາກທີ່ມີການສືບສວນມາດົນເຖິງ 2 ປີ, ພົບບັນຊີລູກຄ້າຫລິ້ນການພະນັນ 40,000 ຄົນ, ມີເງິນໝູນວຽນ ປະມານ 7,000 ລ້ານບາດຕໍ່ເດືອນ.

ຕາມໝາຍຈັບສານອາຍາລົງວັນທີ 13 ທັນວາ 2022 ຂໍ້ຫາ ຮ່ວມກັນເຜີຍແຜ່ພາບລາມົກອະນາຈານ, ຮ່ວມກັນຫລິ້ນ ຫລື ຊັກຊວນຜູ້ອື່ນ ມາຫລິ້ນການພະນັນ, ສົມທົບກັນເພື່ອກະທຳຜິດຖານຟອກເງິນ ແລະ ຮ່ວມກັນຟອກເງິນ ພ້ອມຢຶດຂອງກາງ ເປັນລົດ 13 ຄັນ ໃນນັ້ນມີ ລົດຊຸບເປີຄຣາ 6 ຄັນ, ລົດຫລູ 6 ຄັນ Porsche, Benz, BMW,ລົດກະບະ 1 ຄັນ, ລົດຖີບ 2 ຄັນ ເງິນສົດໄທ ແລະ ເງິນຕ່າງປະເທດລວມ 42 ລ້ານບາດ, ໂມງຫລູ ເປັນຕົ້ນ Richard Mille, Patek Phillips, Rolex, Omega 8 ໜ່ວຍ, ກະເປົາແບຣນເນມ Hermes, LouisVitton 50 ໜ່ວຍ, ຄອມພິວເຕີ 5 ຽ່ວຍ, ໂທລະສັບ 18 ໜ່ວຍ, ປື້ມບັນຊີທະນາຄານ 44 ຫົວ, ເຮືອນຫລູ 4 ຫລັງ ແລະ ຊັບສິນອື່ນໆອີກຫລາຍລາຍການ ລວມມູນຄ່າປະມານ 700 ລ້ານບາດ.

ພາບ: ຂ່າວສົດ