ກິລາລາວຈະກ້າວໄກ ຖ້າປັດໄຈຄົບເຄື່ອງ

- advert banner 728 90 728x90 - ກິລາລາວຈະກ້າວໄກ ຖ້າປັດໄຈຄົບເຄື່ອງ

ໂດຍ: ທິດ​ກໍ່າ

ເມື່ອຫວນຄືນເບິ່ງໄລຍະກ່ອນ ແລະ ຕອນທີ່ລາວເຮົາເປັນເຈົ້າພາບຊີເກມໃນໄລຍະປີ 2009 ເຫັນວ່າຂະບວນການກິລາໃນປະເທດ ເຮົາກໍເປັນຂະບວນຟົດຟື້ນ ແລະ ມີບັນຍາກາດດີພໍສົມຄວນ, ​ແຕ່ພໍຕົກມາຮອດຊຸມປີຫລັງໆປະເທດສິງກະໂປເປັນເຈົ້າພາບ ແລະ ມາປີ 2017 ນີ້ແມ່ນປະເທດມາເລເຊຍເປັນເຈົ້າພາບຊີເກມກໍເຫັນກັນຢ່າງຈະແຈ້ງວ່າ ວົງການກິລາບ້ານເຮົາຂ້ອນຂ້າງທົດຖອຍ ອືດອາດເປັນຄືໂສ້ງບໍ່ເຄັ່ງ, ໃນເວລາໄປແຂ່ງຢູ່ຕ່າງແດນກວ່າຈະບຸກບືນຄວ້າໄດ້ຫລຽນໃດຫລຽນໜຶ່ງມາມືກໍບໍ່ແມ່ນຂອງງ່າຍ, ເຜີໆ ມາມີຫລາຍປະເພດກິລາບໍ່ເຄີຍເຫັນໜ້າຫລຽນມາຫ້ອຍຄໍຈັກເທື່ອ ໂດຍສະເພາະແມ່ນກິລາບານເຕະ. ໃນຄວາມເປັນຈິງແລ້ວ, ຖ້າພວກເຮົາພາກັນຕັ້ງຄໍາຖາມວ່າດ້ວຍສາເຫດໃດຈຶ່ງເປັນແນວນັ້ນ ?. ຖ້າຈະໃຫ້ທິດກໍ່າຕອບກໍຍ້ອນວ່າຜ່ານການໄປຮ່ວມແຂ່ງ ຂັນຊີເກມໃນຄັ້ງຜ່ານມານີ້ຜົນທີ່ໄດ້ຮັບບໍ່ໄດ້ຕາມຄວາມຄາດຫວັງປານໃດ ເປັນຕົ້ນກິລາບານເຕະຂີ້ຮ້າຍສຸດກໍຂໍໃຫ້ໄດ້ຜ່ານເຂົ້າ ຮອບໜຶ່ງ. ນອກນັ້ນ ກໍມີເປຕັງ, ມວຍບາງປະເພດ, ກະຕໍ້ ແລະ ອື່ນໆ ເພາະບັນດາປະເພດກິລາທີ່ກ່າວມານີ້ເຄີຍສ້າງຊື່ສຽງມາ ແລ້ວ ແລະ ເປັນປະເພດກິລາທີ່ງົບປະມານສຸມໃສ່ຫລາຍສົມຄວນ, ຕາມທິດກໍ່າວ່າ ອັນປະເພດກິລາທີ່ໄດ້ໃຊ້ຈ່າຍຫລາຍກວ່າໝູ່ກໍ ແມ່ນກິລາບານເຕະ ເພາະມີຫລາຍຄົນ, ຫລາຍປາກ, ຫລາຍທ້ອງ ແລະ ເປັນປະເພດກິລາຍອດນິຍົມຂອງມວນຊົນນໍາດ້ວຍ. ຖ້າ ຢາກຮູ້ວ່າໃນໄລຍະຜ່ານມາວົງການກິລາບ້ານເຮົາມີການພັດທະນາດີຂຶ້ນ ຫລື ບໍ່ນັ້ນ ກໍຕ້ອງໄດ້ເບິ່ງແຕ່ເຮົາໄປຫາໝູ່ ແລະ ເບິ່ງໝູ່ ມາ​ໃສ່ເຮົາ, ຕົວຢ່າງການໄປແຂ່ງຂັນສູ້ກັບປະເທດອ້ອມຂ້າງ ຫລື ພາກພື້ນທີ່ເຮົາເຄີຍຊະນະມາຕະຫລອດ ແຕ່ເຂົາພັດກັບປີ້ນ ມາສະເໝີ ຫລື ຊະນະເຮົາກໍສະແດງວ່າເຮົາຖອຍຫລັງ, ກົງກັນຂ້າມ ຖ້າເຮົາຫາກຊະນະເຂົາຕະຫລອດ ແລະ ກ້າວຂຶ້ນໄປສະເໝີ ຫລື ຊະນະທີມທີ່ແຂງແກ່ນກວ່າກໍສະແດງວ່າເຮົາໄດ້ມີການພັດທະນາດີຂຶ້ນ. ນີ້ລະຄືສິ່ງທີ່ພິສູດວ່າ ເຮົາມີການພັດທະນາ, ເກັ່ງ ຫລື ບໍ່ເກັ່ງ.

ເວົ້າເຖິງມູນເຊື້ອຂອງກິລາບ້ານເຮົາແມ່ນເຄີຍໂດ່ງດັງ ແລະ ສ້າງຊື່ສຽງມາແລ້ວໃນຍຸກປະຫວັດສາດ ເຊັ່ນວ່າໃນໄລຍະເກືອບສະ ຕະວັດຜ່ານມາ ສະ​ໄໝກິລາແຫລມທອງ ປະເພດກິລາບານເຕະຈົນເຮັດໃຫ້ບັນດາປະເທດອ້ອມຂ້າງຕ້ອງເກງຂາມ, ຕໍ່ມາໃນຍຸກ ຊາວສາມສິບປີມານີ້ ກໍແມ່ນກິລາເປຕັງ ແລະ ມວຍສາກົນ, ມວຍລາຍລາວເຄີຍກິນຄາຍ ແລະ ສ້າງຊື່ສຽງມາໃຫ້ປະເທດຊາດມາ ແລ້ວ. ສະ​ໄໝກ່ອນກິລາ ກະຕໍ້ເປັນກິລາພື້ນບ້ານເຕະກັນໄປມາກະປ໋ອກກະແປ໋ກພໍມ່ວນຕາມພາສາທ້ອງຖິ່ນ ແຕ່ມາດຽວນີ້ເຂົາ ພັດມີການພັດທະນາເກັ່ງກວ່າເຮົາຕັ້ງຫລາຍເທົ່າ, ໃນບັນດາປະເທດອາຊຽນບໍ່ທັນເຄີຍມີກິລາປະເພດນີ້, ​ແຕ່ມາດຽວນີ້ທຽບເຂົາບໍ່ ຕິດແລ້ວ. ສິ່ງທີ່ທິດກໍ່າໄດ້ຍົກຂຶ້ນມານີ້ມັນກໍອາດມີເງື່ອນງໍາ ແລະ ສາເຫດ. ອັນໂຕທີ່ເປັນໜ້າໜັກໃຈໃນປັດຈຸບັນເຫັນວ່າຂະບວນ ກິລາໃນປະເທດເຮົາ ບໍ່ວ່າປະເພດໃດແມ່ນມີການເຄື່ອນໄຫວຕິດພັນກັບສິ່ງມືນເມົາເປັນຫລັກ ເປັນຕົ້ນກ່ອນການແຂ່ງຂັນກໍທ້າ ທາຍພະນັນກັນ​ກິນເຫລົ້າກິນເບຍ, ເມື່ອແຂ່ງຂັນຈົບແລ້ວກໍພາກັນສະຫລອງ ທັງຜູ້ໄດ້ຜູ້ເສຍຈົນມືນຕາບໍ່ຂຶ້ນ. ປະເພດກິລາທີ່ຕິດ ພັນກັບສິ່ງມືນເມົາຫລາຍທີ່ສຸດກໍຄືກິລາເປຕັງ ທັງລົງເງິນ, ລົງເບຍ, ຕີຖືກກໍໄດ້ຍົກຈອກຊົມເຊີຍ, ຕີຜິດກໍໄດ້ຍົກຈອກປັບ​ໄໝ, ຕີ ໝູອອກເດີ່ນກໍໄດ້ຍົກແກ້ວ, ຫລິ້ນກັນຈົນຮອດເດິກດື່ນ, ບາງລາຍຈົນລູກເມຍຂັດຂ້ອງ ເພາະໄປກໍາແຕ່ໝາກບູນຢູ່ເດີ່ນ, ສ່ວນ ໝາກບູນຢູ່ບ້ານພັດປ່ອຍປະລະໄລເຜີໆມາຈົນແຈ້ງໂຂ້ໂຫລ້. ນີ້ຄືເສັ້ນທາງເດີນທີ່ໜ້າເປັນຫວ່ງ ແລະ ໜ້າສັງເວດຂອງວົງການກິ ລາ ແລະ ນັກກິລາບາງປະເພດຢູ່ໃນບ້ານເຮົາ. ນອກນັ້ນ ເງື່ອນໄຂຄວາມພ້ອມອື່ນໆກໍມາກະທົບໃສ່ ເຊັ່ນແຫລ່ງທຶນ, ແຫລ່ງຄົນ ຕະ ຫລອດຮອດການ​ເຝິກຊ້ອມເຮັດແບບໄຟລາມເຟືອງເອົາຊະນິດທີ່ວ່າເຕົ່າບໍ່ໄປເອົາໄຟຈູດກົ້ນ ສຸດທ້າຍບາດໄປແຂ່ງຂັນກັບໝູ່ກໍພໍ ໄດ້ແຕ່ແລ່ນຕາມກົ້ນເຂົາ ຍ້ອນວ່າຄວາມພ້ອມບໍ່ໄດ້ຄົບເຄື່ອງ.

- Tiger Head 728x90 - ກິລາລາວຈະກ້າວໄກ ຖ້າປັດໄຈຄົບເຄື່ອງ
- 1 1 - ກິລາລາວຈະກ້າວໄກ ຖ້າປັດໄຈຄົບເຄື່ອງ

ເຖິງຢ່າງໃດກໍດີ, ຕາມທິດກໍ່າວ່າ ວົງການກິລາບ້ານເຮົາຍັງພໍມີຄວາມຫວັງໃນອະນາຄົດ, ຖ້າພວກເຮົາພ້ອມພາກັນສ້າງປັດ​ໄຈ ໃຫ້ຄົບເຄື່ອງ ເປັນຕົ້ນຖ້າເຮົາຫັນເຂົ້າສູ່ອັນທັນສະໄໝຕາມນະໂຍບາຍຂອງພັກ ແລະ ລັດຖະບານ ແນ່ນອນມັນກໍຕ້ອງກ້າວໄປໄກ ​ເຊິ່ງກ່ອນອື່ນໝົດແມ່ນຕ້ອງເວົ້າເລື່ອງຄົນເປັນຫລັກ.  ໝາຍວ່າຄົນກໍຕ້ອງໄດ້ມາດຕະຖານ ແລະ ມີຄວາມພ້ອມທຸກຢ່າງ, ອັນ ສອງມາຕ້ອງເວົ້າເລື່ອງເງິນເປັນຂອດຕັດສິນ ຈະເຮັດຫຍັງທໍາຫຍັງກໍຕ້ອງເວົ້າເລື່ອງງົບເລື່ອງເງິນ ເພາະສັງຄົມເຮົາປັດຈຸບັນນີ້ມັນ ຮຽກຮ້ອງເຖິງເສດຖະກິດພໍຢູ່ພໍກິນມີໃຊ້ມີຈ່າຍຈຶ່ງໄປແຂ່ງກັບໝູ່ໄດ້. ໃນຜ່ານມາຕາມເຮົາວ່າ ບໍ່ແມ່ນລາວເຮົາທຸກຍາກປາກ ໝອງຈົນເຖິງຂັ້ນຫອດຫິວອຶດຢາກ, ແຕ່ຍ້ອນວ່າສ່ວນໜຶ່ງປະເທດຊາດເສຍຜົນປະໂຫຍດຍ້ອນພວກຈັງໄຮມີການສໍ້ລາດບັງ ຫລວງຈົນກາຍເປັນພະຍາດຊໍາເຮື້ອ, ກືນບໍ່ເຂົ້າຄາຍບໍ່ອອກ, ໄກ່ເຫັນຕີນງູ ງູເຫັນນົມໄກ່. ຈາກນັ້ນກໍເຮັດຄືໂສ້ງບໍ່ເຄັ່ງ, ເຮັດໄປ ຕາມວາດຕາມຂະເຍີມ. ເຮົາຄິດວ່າຖ້າພວກເຮົາພ້ອມກັນຫັນທິດ ແລະ ເປັນເຈົ້າການປະຕິບັດຕາມແນວທາງຂອງພັກ ແລະ ລັດຖະບານແທ້ຈິງ ອີກຫ້າປີ, ສິບປີຂ້າງໜ້າປະເທດຊາດຕ້ອງມັ່ງຄັ່ງເຂັ້ມແຂງແນ່ນອນ. ອັນສາມມາແມ່ນຕ້ອງມີພື້ນຖານວັດຖຸເຕັກນິກຮັບໃຊ້ຢ່າງພຽງພໍ ແລະ ອັນສຸດທ້າຍແມ່ນການ​ເຝິກແອບຄວາມພ້ອມເພື່ອກ້າວຂຶ້ນເປັນນັກກິລາອາຊີບ, ການ​ເຝິກແອບຕ້ອງມີເປົ້າໝາຍ, ມີໄລຍະອັນຍາວໄກ ແລະ ຕໍ່ເນື່ອງຈຶ່ງຈະມີພະລັງຊ້າງສານສົມບູນສູ້ກັບພາຍນອກໄດ້. ໃນເງື່ອນໄຂທີ່ໂລກພວມມີການປ່ຽນແປງກ້າວສູ່ຍຸກການເຊື່ອມໂຍງ ແລະ ເຊື່ອມຈອດການສື່ສານທາງດ້ານກິລາເປັນທູດວັດທະນະທໍາທີ່ສໍາຄັນຍອດຍິ່ງ ເພື່ອຜູກມິດຫລຸດຜ່ອນສັດຕູ, ທັງພິສູດໃຫ້ຕ່າງຊາດເຂົາເຫັນຄວາມເຂັ້ມແຂງຂອງປະເທດເຮົາອີກ​ດ້ວຍ.

error: Content is protected !!