ສປປ ລາວ-ສ.ເກົາຫລີ ເພີ່ມທະວີຮັດແໜ້ນການພົວພັນຮ່ວມມືສອງຝ່າຍ.

- advert banner 728 90 728x90 - ສປປ ລາວ-ສ.ເກົາຫລີ ເພີ່ມທະວີຮັດແໜ້ນການພົວພັນຮ່ວມມືສອງຝ່າຍ.

ໂດຍຕອບສະໜອງຕາມຄຳເຊີນຂອງທ່ານນາງ ຄັງຄຽງວາ (Kang Kyung Wha) ລັດຖະມົນຕີກະຊວງການຕ່າງປະເທດແຫ່ງ ສ.ເກົາຫລີ, ທ່ານ ສະເຫລີມໄຊ ກົມມະສິດ ລັດຖະມົນຕີກະຊວງການຕ່າງປະເທດເຮົາພ້ອມຄະນະໄດ້ເດີນທາງຢ້ຽມຢາມຢ່າງເປັນທາງການໃນລະຫວ່າງວັນທີ 29-30 ສິງຫານີ້, ຊຶ່ງເປັນການຢ້ຽມຢາມຄັ້ງທຳອິດນັບແຕ່ທ່ານຂຶ້ນດຳລົງຕຳແໜ່ງເປັນລັດຖະມົນຕີກະຊວງການຕ່າງປະເທດແຫ່ງ ສປປ ລາວ ເພື່ອເສີມຂະຫຍາຍ ແລະ ຮັດແໜ້ນສາຍພົວພັນມິດຕະພາບ ແລະ ການຮ່ວມມືອັນດີງາມລະຫວ່າງສອງປະເທດທີ່ມີມາແຕ່ດົນນານແລ້ວນັ້ນໃຫ້ນັບມື້ແໜ້ນແຟ້ນຍິ່ງຂຶ້ນ.

- new3 - ສປປ ລາວ-ສ.ເກົາຫລີ ເພີ່ມທະວີຮັດແໜ້ນການພົວພັນຮ່ວມມືສອງຝ່າຍ.

ໃນວັນທີ 29 ສິງຫາ, ທ່ານ ສະເຫລີມໄຊ ກົມມະສິດ ແລະ ຄະນະໄດ້ພົບປະສອງຝ່າຍກັບທ່ານນາງ ຄັງ ຄຽງ ວາ ລັດຖະມົນຕີກະຊວງການຕ່າງປະເທດແຫ່ງ ສ.ເກົາຫລີ, ຊຶ່ງສອງຝ່າຍໄດ້ຕີລາຄາສູງຕໍ່ໝາກຜົນແຫ່ງການພົວພັນຮ່ວມມືທີ່ດີງາມໃນຂອບສອງຝ່າຍ ແລະ ຫລາຍຝ່າຍໃນໄລຍະຜ່ານມາ, ອັນໄດ້ເຮັດໃຫ້ການຮ່ວມມືຫລາຍດ້ານໄດ້ມີໝາກຜົນຕົວຈິງ, ຊຶ່ງເຫັນໄດ້ຈາກການແລກປ່ຽນການຢ້ຽມຢາມຊຶ່ງກັນ ແລະ ກັນຂອງຄະນະຜູ້ແທນລະດັບສູງຂອງສອງປະເທດຢ່າງເປັນປົກກະຕິ ເຊັ່ນ: ການຢ້ຽມຢາມ ສ.ເກົາຫລີ ຢ່າງເປັນທາງການຂອງອະດີດປະທານປະເທດແຫ່ງ ສປປ ລາວໃນປີ 2013 ແລະ ການມາຢ້ຽມຢາມ ສປປ ລາວຂອງອະດີດປະທານາທິບໍດີແຫ່ງ ສ.ເກົາຫລີໃນປີ 2016, ໄດ້ກາຍເປັນບາດກ້າວສຳຄັນໃນພົວພັນຮ່ວມມືລະຫວ່າງສອງປະເທດ, ໄດ້ເຮັດໃຫ້ການຄ້າ, ທຸລະກິດ, ການລົງທຶນ, ການສຶກສາ ແລະ ການທ່ອງທ່ຽວລະຫວ່າງສອງປະເທດໄດ້ມີຄວາມຄືບໜ້າໃໝ່. ປັດຈຸບັນ ສ.ເກົາຫລີ ຈັດຢູ່ໃນອັນດັບ 5 ຂອງການລົງທຶນຕ່າງປະເທດຢູ່ ສປປ ລາວ, ກວມເອົາ 257 ໂຄງການ, ລວມມູນຄ່າການລົງທຶນຈຳນວນ 750 ລ້ານໂດລາສະຫະລັດ ແລະ ມູນຄ່າການຄ້າສອງຝ່າຍສາມາດບັນລຸໄດ້ 68 ລ້ານໂດລາສະຫະລັດໃນປີ 2016. ນອກຈາກນີ້ການຊ່ວຍເຫລືອເພື່ອການພັດທະນາ (ODA) ຂອງ ສ.ເກົາຫລີໃຫ້ແກ່ ສປປ ລາວ ໄດ້ເພີ່ມຂຶ້ນຢ່າງຕໍ່ເນື່ອງ ແລະ ໄດ້ສຸມໃສ່ບັນດາຂະແໜງການບູລິມະສິດຂອງລາວຄື: ການພັດທະນາຊົນນະບົດ, ການສຶກສາ, ສາທາລະນະສຸກ ແລະ ການພັດທະນາຊັບພະຍາກອນມະນຸດ. ການຊ່ວຍເຫລືອດັ່ງກ່າວໄດ້ປະກອບສ່ວນສຳຄັນເຂົ້າໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີຄັ້ງທີ 8 (2016-2020) ຂອງ ສປປ ລາວ ເພື່ອໃຫ້ຫລຸດພົ້ນອອກຈາກສະຖານະພາບປະເທດດ້ອຍພັດທະນາໃນປີ 2020. ການຮ່ວມມືດ້ານວັດທະນະທຳ ແລະ ທ່ອງທ່ຽວລະຫວ່າງສອງປະເທດກໍໄດ້ຮັບການຍົກລະດັບດີຂຶ້ນເປັນກ້າວໆ ໂດຍສະເພາະພາຍຫລັງສອງປະເທດໄດ້ເປີດສາຍການບິນໂດຍກົງນຳກັນລະຫວ່າງເຊອູນ-ວຽງຈັນ, ວຽງຈັນ-ເຊອູນ ນັບແຕ່ປີ 2012 ເປັນຕົ້ນມາຈຳນວນນັກທ່ອງທ່ຽວ ສ.ເກົາຫຼີ ເຂົ້າມາລາວໄດ້ເພີ່ມຂຶ້ນຢ່າງໄວວາ ຄືປີ 2016 ມີເຖິງ 173.000 ເທື່ອຄົນ ແລະ 60.000 ກວ່າເທື່ອຄົນໃນ 6 ເດືອນຕົ້ນປີ 2017, ໃນຂະນະດຽວກັນນັກທ່ອງທ່ຽວລາວຈຳນວນຫລາຍກໍໄດ້ເດີນທາງໄປທ່ອງທ່ຽວ ສ.ເກົາຫລີ ເຊັ່ນກັນ. ໃນການພົບປະຄັ້ງນີ້, ສອງຝ່າຍໄດ້ເຫັນດີຈະສືບຕໍ່ເພີ່ມທະວີການຮ່ວມມືທາງດ້ານການເມືອງ, ເສດຖະກິດ ແລະ ການຄ້າ, ພະລັງງານ ແລະ ຊັບພະຍາກອນທຳມະຊາດ, ການເງິນ-ການທະນາຄານ, ດ້ານກະສິກຳ, ສາທາລະນະສຸກ, ແຮງງານ, ວັດທະນະທຳ ແລະ ທ່ອງທ່ຽວ. ນອກຈາກນັ້ນ, ສອງຝ່າຍຍັງໄດ້ແລກປ່ຽນຄຳຄິດຄຳເຫັນຕໍ່ສະພາບການທີ່ພົ້ນເດັ່ນໃນພາກພື້ນ ແລະ ສາກົນທີ່ມີຄວາມສົນໃຈຮ່ວມກັນ. ໃນໂອກາດນີ້, ທ່ານລັດຖະມົນຕີ ສະເຫລີມໄຊ ກົມມະສິດ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນຂອງທ່ານລັດຖະມົນຕີຕ່າງປະເທດ ສ.ເກົາຫລີ ແລະ ໄດ້ຕາງໜ້າໃຫ້ລັດຖະບານ ແລະ ປະຊາຊົນລາວ ສະແດງຄວາມຂອບໃຈຢ່າງຈິງໃຈໄປຍັງລັດຖະບານ ແລະ ປະຊາຊົນ ສ.ເກົາຫລີ ທີ່ໄດ້ໃຫ້ການສະໜັບສະໜູນຊ່ວຍເຫລືອ ສປປ ລາວ ໃນໄລຍະຜ່ານມາ ແລະ ຫວັງຢ່າງຍິ່ງວ່າສາຍພົວພັນມິດຕະພາບ ແລະ ການຮ່ວມມືຂອງສອງປະເທດຈະໄດ້ຮັບການຊຸກຍູ້ສົ່ງເສີມໃຫ້ດີຂຶ້ນຢ່າງບໍ່ຢຸດຢັ້ງ ເພື່ອນຳເອົາຜົນປະໂຫຍດມາສູ່ປະຊາຊົນສອງປະເທດ.

ໃນຕອນທ້າຍຂອງການພົບປະ, ທ່ານ ສະເຫລີມໄຊ ກົມມະສິດ ໄດ້ເຊື້ອເຊີນທ່ານລັດຖະມົນຕີຕ່າງປະເທດ ສ.ເກົາຫລີ ມາຢ້ຽມຢາມ ສປປ ລາວ ໃນໂອກາດທີ່ທ່ານສະດວກ.

- lattana 1 - ສປປ ລາວ-ສ.ເກົາຫລີ ເພີ່ມທະວີຮັດແໜ້ນການພົວພັນຮ່ວມມືສອງຝ່າຍ.
error: Content is protected !!