ພາຍຸ ບອມໄຊໂຄນ ຖະຫລົ່ມ ລັດແຄລິຟໍເນຍ ເຮັດໃຫ້ຝົນຕົກ-ນ້ຳຖ້ວມຢ່າງໜັກ

ສຳນັກຂ່າວຕ່າງປະເທດລາຍງານໃນວັນທີ 7 ມັງກອນ 2023 ວ່າ: ສຳນັກງານອຸຕຸນິຍົມວິທະຍາແຫ່ງສະຫະລັດ ອອກປະກາດເຕືອນກ່ຽວກັບສະພາບອາກາດທີ່ແປປວນໃນລັດແຄລິຟໍເນຍ ວ່າ: ທາງພາກເໜືອຍັງໄດ້ຮັບຜົນກະທົບຢ່າງໜັກ ໄປຈົນເຖິງທາງພາກໃຕ້, ພ້ອມປະກາດສະຖານະການສຸກເສີນ ເພື່ອຍົກລະດັບໃຫ້ປະຊາຊົນກຽມພ້ອມຮັບມືກັບໄພພິບັດໃນຄັ້ງນີ້.

ປັດຈຸບັນລັດແຄລິຟໍເນຍຢູ່ພາຍໃຕ້ການເຝົ້າລະວັງນ້ຳຖ້ວມກະທັນຫັນ ແລະ ກະແສລົມພັດແຮງ ເຊິ່ງສົ່ງຜົນກະທົບຕໍ່ການສົ່ງກະແສໄຟຟ້າ ໃຫ້ແກ່ຄົວເຮືອນ ແລະ ສະຖານປະກອບກິດຈະການ ລວມຫລາຍກວ່າ 60,000 ແຫ່ງ ແລະ ມີຄົນເສຍຊີວິດແລ້ວຢ່າງໜ້ອຍ 6 ຄົນ.