ປີ 2022 ດ່ານພາສີສາກົນບໍ່ເຕ່ນ ແຂວງຫລວງນໍ້າທາ ເກັບລາຍຮັບໄດ້ 661,55 ຕື້ກວ່າກີບ
ທ່ານ ວິລະກອນ ເກດຕະວົງ ຫົວໜ້າດ່ານພາສີສາກົນບໍ່ເຕ່ນ ລາຍງານວ່າ: ດ່ານພາສີສາກົນບໍ່ເຕ່ນ ແຂວງຫລວງນໍ້າທາ, ເຮັດໜ້າທີ່ການຈັດເກັບລາຍຮັບພາສີ ແລະ ພັນທະອື່ນໆເຂົ້າງົບປະມານແຫ່ງລັດ, ຕາມກົດໝາຍ, ລະບຽບການອື່ນໆໃຫ້ສອດຄ່ອງ, ຖືກຕ້ອງ, ຄົບຖ້ວນ, ທັນກັບເວລາ, ເຊິ່ງໃນປີ 2022 ຜ່ານມາ, ການຈັດເກັບລາຍຮັບເຫັນວ່າມີລັກສະນະຕັ້ງໜ້າ ແລະ ສາມາດປະຕິບັດລາຍຮັບໄດ້ທັງໝົດ 661,55 ຕື້ກວ່າກີບເທົ່າກັບ 128,33% ຂອງແຜນການປີ.
ໃນປີ 2022 ໄດ້ຮັບຕົວເລກແຜນການທັງໝົດ 515,5 ຕື້ກີບ, ເພີ່ມຂຶ້ນຈາກປີຜ່ານມາ 77,79% ຫລື ປະມານ 225 ຕື້ກວ່າກີບ, ແຕ່ຜ່ານການຈັດຕັ້ງປະຕິບັດວຽກງານຕົວຈິງໝົດປີສາມາດເກັບລາຍຮັບເຂົ້າງົບປະມານແຫ່ງລັດໄດ້ທັງໝົດ 661,55 ຕື້ກວ່າກີບ ຫລື ເທົ່າກັບ 128,33% ຂອງແຜນການປີ (ລື່ນແຜນການປີ 28,33% ) ຖ້າທຽບໃສ່ໄລຍະດຽວກັນຂອງປີຜ່ານມາ (ປີ 2021) ປະຕິບັດໄດ້ 362,17 ຕື້ກວ່າກີບ, ເພີ່ມຂຶ້ນ 82,66% ເທົ່າກັບ 299,37 ຕື້ກວ່າກີບ).
ທ່ານຫົວໜ້າດ່ານພາສີສາກົນບໍ່ເຕ່ນ ໃຫ້ຮູ້ຕື່ມວ່າ: ສາເຫດທີ່ພາໃຫ້ການຈັດເກັບລາຍຮັບໄດ້ລື່ນແຜນການປີ, ຍ້ອນມີການນໍາເຂົ້າສິນຄ້າປະເພດ: ອາຍແກັສ, ນໍ້າມັນຫລໍ່ລືນ, ພາຫະນະເປັນຄັນ, ອາໄຫລ່ສິ້ນສ່ວນ, ເຄື່ອງກໍ່ສ້າງ, ເຄື່ອງໄຟຟ້າ, ເຄື່ອງບໍລິໂພກ-ບໍລິໂພກ, ສິນຄ້ານໍາເຂົ້າເພື່ອສົ່ງອອກ, ປັບໃໝ່, ຂາຍເຄື່ອງຮິບ, ຄ່າທຳນຽມຕ່າງໆ, ຄ່າທຳນຽມຜ່ານແດນສາກົນເພີ່ມຂຶ້ນ. ຄຽງຄູ່ກັນນີ້, ຍ້ອນການຊີ້ນຳ–ນໍາພາຈາກການນໍາທຸກຂັ້ນ (ທັງສູນກາງ ແລະ ທ້ອງຖິ່ນ) ເປັນຕົ້ນ: ຈາກກົມພາສີ, ພາສີ ປະຈຳແຂວງ, ມີບັນດານິຕິກຳ, ລະບຽບກົດໝາຍ, ມີແບບແຜນວີທີເຮັດວຽກ, ແບ່ງຄວາມຮັບຜິດຊອບ ແລະ ມີເຄື່ອງມືທີ່ທັນສະໄໝເປັນການອຳນວຍຄວາມສະດວກເຂົ້າຮັບໃຊ້ວຽກງານເປັນຕົ້ນ: ລະບົບການແຈ້ງພາສີແບບເອເລັກໂຕຣນິກ (ASYCUDA), ການຊໍາລະຜ່ານລະບົບ SMART TAX ເປັນເຄື່ອງມືອຳນວຍຄວາມສະດວກໃນການແຈ້ງພາສີເປັນລາຍລະອຽດ, ລະບົບ EASYPASS, ລະບົບຄຸ້ມຄອງພາຫະນະເຂົ້າ–ອອກ D53; ລະບົບແຈ້ງພາສີປະຕູດຽວ (LaoNational Single Window), ເຄື່ອງກວດກາດ້ວຍລະບົບສາຍແສງ (Scan ner), ລະບົບຊິງຊັ່ງທັນສະໄໝ, ຄະນະດ່ານ, ພະນັກງານ, ເຈົ້າໜ້າທີ່ພາສີໄດ້ເອົາໃຈໃສ່ຕໍ່ໜ້າທີ່ວຽກງານວິຊາສະ ເພາະທີ່ຕົນຮັບຜິດຊອບຂອງຂັ້ນເທິງມອບໝາຍຢ່າງເຂັ້ມງວດ.
ສຳລັບທິດທາງແຜນການປີ 2023 ຄະນະດ່ານພາສີສາກົນບໍ່ເຕ່ນຈະເອົາໃຈໃສ່ໃນການຊີ້ນຳ-ນໍາພາວຽກງານການເມືອງ-ແນວຄິດ, ສ້າງບາດລ້ຽວໃໝ່ໃຫ້ມີການປ່ຽນແປງໃໝ່ຫັນໄປສູ່ການຄຸ້ມຄອງແບບທັນສະໄໝ, ຕິດຕາມ, ກວດກາ–ກວດການ, ເພີ່ມທະວີການຄຸ້ມຄອງ, ການນໍາເຂົ້າ–ສົ່ງອອກ, ເພີ່ມທະວີການຈັດຕັ້ງປະຕິບັດບັນດາມາດຕະ ການຕ່າງໆເປັນຕົ້ນ: ລົງເລິກແຕ່ລະກຸ່ມວຽກ, ປະສານສົມທົບກັບຂະແໜງການທີ່ກ້ຽວຂ້ອງ, ອັດບັນດາຊ່ອງຫວ່າງ ການຮົ່ວໄຫຼຂອງລາຍຮັບທຸກຮູບແບບຢ່າງເຂັ້ມງວດ ແລະ ບັນຫາອື່ນໆ.
