ເນເທີແລນ ປະກາດໃຫ້ ໂຣນັລ ຄູມັນ ເປັນໂຄ໋ດ ຄົນໃໝ່ຂອງທີມແທນ ຫລຸຍ ຟານ ກາວ ເຊິ່ງເປັນການຫວນກັບມາຄຸມທີມເປັນຄັ້ງທີ່ສອງ
January 24, 2023 - 2:00 PM

ໂຣນັລ ຄູມັນ ໄດ້ປະກາດຢ່າງຈະແຈ້ງຄວາມເຖິງຄວາມຕັ້ງໃຈຂອງລາວທີ່ຈະສ້າງທີມຊາດເນເທີແລນ ໃຫ້ກັບມາຫລິ້ນກິລາບານເຕະດ້ວຍສະເໜ່ ແລະ ສຸມໃສ່ເກມບຸກເປັນຫລັກ ຫລັງຈາກທີ່ຖືກເອີ້ນມາເປັນຄູຝຶກຄົນໃຫມ່ໃຫ້ກັບ ອັດສະວິນສີສົ້ມ ໃນວັນຈັນ 23 ມັງກອນທີ່ຜ່ານມາ.
ໂຄ໋ດ ອາຍຸ 59 ປີ ເຄີຍຄຸມທິມຊາດບ້ານເກີດລະຫວ່າງປີ 2018 ຫາ 2020, ໃນໄລຍະນັ້ນລາວໄດ້ນຳເອົາພອນສະຫວັນຂອງນັກເຕະໄວໜຸ່ມເຂົ້າມາຫລິ້ນໃຫ້ກັບທີມຊຸດໃຫຍ່ ແລະ ນຳພາທີມຜ່ານເຂົ້າຮອບຄັດເລືອກ ຢູໂຣ 2020 ແລະ ຜ່ານເຂົ້າຮອບຊີງຊະນະເລີດ ເນຊັນລີກ ໃນປີ 2019 ແຕ່ເສຍໃຫ້ ໂປຕຸເກດ 0-1.
ທັງນີ້ ຄູມັນ ໄດ້ກ້າວເຂົ້າມາແທນ ຫລຸຍ ຟານ ກາວ, ທີ່ປະກາດວາງມືໄປຫລັງຈົບບານໂລກ 2022 ຫລັງຈາກທີ່ຕົນກັບຄືນມາຄຸມທີມຊາດເນເທີແລນເປັນຮອບທີສາມ, ພ້ອມສ້າງຜົນງານນໍາພາ “ອັດສະວິນສີສົ້ມ” ບໍ່ເສຍໃຫ້ໃຜ 20 ນັດໃນຊ່ວງເວລາປົກກະຕິ.