ບາຊ່າ ຈະອົດໃຊ້ງານ ເດມເບເລ່ ຫລັງເຈັບ ກ້າມເນື້ອໃນເກມພົບ ຄິໂຣນາ 1-0

ບາເຊໂລນາ ທີມຈ່າຝູງຂອງ ລາລີກາ ສະເປນ ມີແວວທີ່ຈະຂາດ ອູສມານ ເດມເບເລ ດວນກັບ ແມນເຊັສເຕີ ຢູໄນເຕັດ ໃນນັດທຳອິດຂອງ ຢູໂຣປາ ລີກ ຮອບ 16 ທີມ ນັດທຳອິດ ຫລັງຈາກນັກເຕະທີມຊາດຝຣັ່ງ ໄດ້ຮັບບາດເຈັບໃນ ລາລີກາ ນັດຫລ້າສຸດໃນວັນເສົາທີ 28 ມັງກອນນີ້.

ບາເຊໂລນາ ໄດ້ຮັບຂ່າວຮ້າຍຢ່າງຕໍ່ເນື່ອງ ເດມເບເລ່ ເຈັບຂາຊ້າຍໃນນັດຊະນະ ຄິໂຣນາ 1-0, ໂດຍນັກເຕະຊາວຝຣັ່ງຖືກປ່ຽນຕົວອອກໃນນາທີ 26, ໂດຍ ເປດຣີ ຖືກສົ່ງລົງມາແທນ.

ຢ່າງໃດກໍ່ຕາມ, ເຖິງວ່າສຸດທ້າຍ ເປດຣີ ຈະເປັນພະເອກຍິງປະຕູດຽວໃຫ້ທີມ ຂະນະທີ່ ຄາຕາລັນ ເກັບ 3 ຄະແນນໄດ້ໃນນາທີ 61, ແຕ່ ຊາບີ ນາຍໃຫຍ່ຂອງ ບາເຊໂລນາ ອາດຈະເສຍ ເດມເບເລ່ ໄປປະມານ 2-3 ອາທິດ, ເຊິ່ງເທົ່າກັບວ່າລາວອາດຈະພາດການແຂ່ງຂັນ ຢູໂຣປາ ລີກ ຮອບ 16 ທີມທຳອິດ ພົບກັບ ແມນເຊັສເຕີ ຢູໄນເຕັດ ທີ່ສະໜາມກິລາ ແຄມນູ ໃນວັນທີ 16 ກຸມພາ.