ຜູ້ເສຍຊີວິດຈາກເຫດລະເບີດຢູ່ມັດສະຢິດໃນປາກິດສະຖານ ເພີ່ມຂຶ້ສູງກວ່າ 60 ຄົນແລ້ວ ທາງການຄາດວ່າເປັນການຂ້າຕົວຕາຍ

ຈໍານວນຜູ້ເສຍຊີວິດຈາກເຫດລະເບີດຢູ່ມັດສະຢິດແຫ່ງໜຶ່ງໃນເມືອງເປສະວາ ທາງຕາເວັນຕົກສຽງເໜືອຂອງປາກິດສະຖານ ໃນວັນທີ 30 ມັງກອນ ຕາມເວລາທ້ອງຖິ່ນ ສູງກວ່າ 60 ຄົນແລ້ວ ແລະ ໄດ້ຮັບບາດເຈັບອີກນັບຮ້ອຍຄົນ, ທາງການຄາດວ່າເຫດລະເບີດດັ່ງກ່າວເປັນການຂ້າຕົວຕາຍ.

ທ່ານ ເຊບາດ ຊາຣີບ ນາຍົກລັດຖະມົນຕີປາກິດສະຖານ ຊີ້ວ່າ: ເຫດລະເບີດຄັ້ງນີ້ເປັນຝີມືຂອງກຸ່ມກໍ່ການຮ້າຍທີ່ຕ້ອງການຈະສ້າງບັນຍາກາດຂອງຄວາມຢ້ານກົວໃຫ້ບັນດາຜູ້ປະຕິບັດໜ້າທີ່ປົກປ້ອງປາກິດສະຖານ. ເບື້ອງຕົ້ນຍັງບໍ່ມີກຸ່ມກໍ່ການຮ້າຍກຸ່ມໃດອ້າງເປັນຜູ້ຢູ່ເບື້ອງຫລັງເຫດການໃນຄັ້ງນີ້, ແຕ່ທາງການປາກິດສະຖານເຊື່ອວ່າອາດມີການກ່ຽວຂ້ອງກັບກຸ່ມຕາລີບັນທີ່ຢູ່ໃນປະເທດແຫ່ງນີ້.

ທ່ານ ຊາຣີບ ໄດ້ເດີນທາງໄປເມືອງເປສະວາຢ່າງຮີບດ່ວນ ເພື່ອສໍາຫລວດສະພາບຄວາມເສຍຫາຍ ແລະ ພົບປະກັບບັນດາສະມາຊິກຄອບຄົວຂອງຜູ້ໄດ້ຮັບບາດເຈັບ ແລະ ເສຍຊີວິດຈາກເຫດການນີ້.

ຂະນະທີ່, ທ່ານ ອັນໂຕນິໂອ ກູເຕີເຣັສ ເລຂາທິການສະຫະປະຊາຊາດ ໄດ້ກ່າວປະນາມເຫດລະເບີດດັ່ງກ່າວ ພ້ອມລະບຸວ່າ: ສິ່ງນີ້ເປັນການກະທໍາທີ່ໜ້າຊີງຊັງ ເພາະຜູ້ລົງມືກໍ່ເຫດເລືອກໂຈມຕີໃສ່ສະຖານທີ່ສັກສິດ ເຊິ່ງເປັນສູນລວມຄວາມເຊື່ອ ແລະ ຈັດພິທີທາງສາສະໜາຂອງຄົນສ່ວນຫລາຍໃນປາກິດສະຖານ.

ອ້າງອີງ:

https://www.bbc.com/news/world-asia-64451936

https://www.reuters.com/…/blast-mosque-pakistans…/

https://edition.cnn.com/…/peshawar-pakistan…/index.html