ກ່ອນຕະຫລາດປິດ ເປແອສເຊ ເດີນໜ້າ ລ່າໂຕ ຊິເຢກ ດ້ວຍສັນຍາ ຢືມໂຕຈາກ ເຊວຊີ
January 31, 2023 - 6:00 PM

ຍັກໃຫຍ່ແຫ່ງລີກ 1 ພ້ອມເສີມກຳລັງເກມບຸກ ແລະ ຫວັງວ່າຢືມໂຕຈອມເທັກນິກຂອງທີມຊາດ ໂມຣັອກໂກ ຈາກ ເຊວຊີ ກ່ອນທີ່ຕະຫລາດນັກເຕະຈະປິດໃນເດືອນມັງກອນ.
ປາຣີ ແຊັງ-ແຊັກແມັງ, ເດີນໜ້າໄລ່ລ່າ ຮາຄິມ ຊິເຢັກ ຈາກ ເຊວຊີ ດ້ວຍສັນຍາຢືມໂຕ ກ່ອນທີ່ຈະປິດຕະຫລາດເດືອນມັງກອນນີ້, ອີງຕາມການລາຍງານຈາກ L’Equipe.
ນັກເຕະທີມຊາດໂມຣັອກໂກ ກາຍເປັນສ່ວນເກີນໃນແຜນການຂອງ ແກຮມ ພອດເຕີ ແລະ ມີໂອກາດລົງຫລິ້ນພຣີເມຍລີກພຽງ 10 ນັດໃນລະດູການນີ້.
ຂະນະທີ່ທາງ ເປແອສເຊ ຂາດທາງເລືອກໃນເກມບຸກ, ໂດຍຫົວຫນ້າຄູຝຶກ ຄຣິສຕອຟ ກາຕິເຢ ບອກສະໂມສອນວ່າກໍາລັງຊອກຫາທາງເລືອກເພີ່ມເຕີມໃນຕໍາແຫນ່ງນີ້.
ແນວໃດກໍດີ, ເຊື່ອວ່າທັງສອງຝ່າຍໄດ້ບັນລຸຂໍ້ຕົກລົງກ່ຽວກັບເງື່ອນໄຂສ່ວນຕົວແລ້ວ. ສິ່ງດຽວທີ່ຍັງເຫລືອແມ່ນການເຈລະຈາເພື່ອໃຫ້ ເຊວຊີ ປ່ອຍໂຕໃຫ້ໄດ້ກ່ອນທີ່ຕະຫລາດຈະປິດໃນເດືອນມັງກອນນີ້.