ການຂຶ້ນແຜນຂໍງົບປະມານໂຄງການລົງທຶນຂອງລັດ ມີຄວາມສຳຄັນໃຫ້ແກ່ການພັດທະນາເສດຖະກິດ-ສັງຄົມ
ກົມແຜນການ ແລະ ການຮ່ວມມື ກະຊວງອຸດສາຫະກໍາ ແລະ ການຄ້າ ໄດ້ຈັດກອງປະຊຸມບັ້ນຝຶກອົບຮົມການຂຶ້ນແຜນຂໍງົບປະມານໂຄງການລົງທຶນຂອງລັດ ໂດຍການເປັນປະທານຂອງ ທ່ານ ປອ ຄໍາເພັດ ວົງດາລາ ຫົວໜ້າກົມແຜນການ ແລະ ການຮ່ວມມື ກະຊວງອຸດສາຫະກໍາ ແລະ ການຄ້າ, ເຊິ່ງໄດ້ຈັດຂຶ້ນໃນວັນທີ 30 ມັງກອນ 2023 ທີ່ແຂວງບໍລິຄໍາໄຊ.
ໃນພິທີ, ປະທານກອງປະຊຸມໄດ້ກ່າວວ່າ: ບັ້ນຝຶກອົບຮົມການຂຶ້ນແຜນຂໍງົບປະມານໂຄງການລົງທຶນຂອງລັດໃນຄັ້ງນີ້ມີຄວາມໝາຍຄວາມສຳຄັນຫລາຍ ໃຫ້ແກ່ການພັດທະນາເສດຖະກິດ-ສັງຄົມໃຫ້ມີບາດກ້າວຂະຫຍາຍຕົວຂຶ້ນ ໂດຍສະເພາະຕໍ່ຂົງເຂດອຸດສາຫະກຳ ແລະ ການຄ້າ ເຊິ່ງຮຽກຮ້ອງທາງດ້ານງົບປະມານ ມາຈັດຕັ້ງປະຕິບັດບັນດາວຽກງານຈຸດສຸມບູລິມະສິດ ທີ່ໄດ້ກຳນົດໄວ້ໃນແຜນພັດທະນາອຸດສາຫະກໍາປຸງແຕ່ງ ແລະ ການຄ້າ 5 ປີ ຂອງກະຊວງ ໃຫ້ສາມາດບັນລຸຕາມແຜນການກຳນົດໄວ້. ສະນັ້ນ, ການສະເໜີຂໍງົບປະມານການລົງທຶນຂອງລັດຕ້ອງມີຈຸດສຸມ, ສອດຄ່ອງຕາມແຜນພັດທະນາຂອງຂະແໜງການ ແລະ ສອດຄ່ອງຕາມທິດການພັດທະນາຂອງລັດຖະບານ ເພື່ອຮັບປະກັນໃຫ້ແກ່ການນຳໃຊ້ງົບປະມານຈັດຕັ້ງປະຕິບັດເຂົ້າໃນວຽກງານຈຸດສຸມບູລິມະສິດຕ່າງໆ ຂອງກະຊວງ ກໍຄືຂະແໜງການອຸດສາຫະກຳ ແລະ ການຄ້າ ທັງສູນກາງ ແລະ ທ້ອງຖິ່ນ ໃຫ້ມີປະສິດທິພາບ ແລະ ປະສິດທິຜົນ, ຫລີກເວັ້ນການສ້າງແຜນທີ່ບໍ່ມີຄວາມຖືກຕ້ອງບໍ່ຖືກທິດທາງຂອງການພັດທະນາ ເຊິ່ງເຮັດໃຫ້ມີການນຳໃຊ້ງົບປະມານບໍ່ໄດ້ຮັບໝາກຜົນ. ພ້ອມນີ້ກໍເພື່ອຈະຊ່ວຍໃຫ້ເຂົ້າໃຈກ່ຽວກັບການຕື່ມຂໍ້ມູນໃສ່ໃນແຕ່ລະເງື່ອນໄຂໃນຟອມບົດສະເໜີໂຄງການໃຫ້ຖືກຕ້ອງ ເພື່ອໃຫ້ໄດ້ໂຄງການທີ່ມີປະສິດທິພາບ ແລະ ປະສິດທິຜົນ.
ນອກນີ້, ທ່ານປະທານໄດ້ຮຽກຮ້ອງໃຫ້ນັກສໍາມະນາກອນ ແລະ ຜູ້ເຂົ້າຮ່ວມເອົາໃຈໃສ່ສຸມສະຕິປັນຍາ, ຄວາມຮູ້ຄວາມສາມາດ, ສຶກສາ, ຄົ້ນຄວ້າ, ແລກປ່ຽນຄໍາຄິິດຄໍາເຫັນກັບນັກວິທະຍາກອນ ເພື່ອເກັບກ່ຽວເອົາຂໍ້ມູນ, ໃຫ້ໄດ້ບົດຮຽນ, ໃຫ້ຮູ້ເງື່ອນໄຂ, ຂັ້ນຕອນການສະເໜີຂໍງົບປະມານ, ການຂຽນບົດສະເໜີໂຄງການທີ່ຖືກຕ້ອງ, ສອດຄອ່ງກັບແຜນພັດທະນາຂອງຂະແໜງການຕົນ ຂັ້ນສູນກາງ ແລະ ທ້ອງຖິ່ນ.
