ກອງປະຊຸມສຸດຍອດ ລະຫວ່າງ ພັກປະຊາຊົນ ປະຕິວັດລາວ ແລະ ພັກປະຊາຊົນ ກໍາປູເຈຍ ສືບຕໍ່ຮ່ວມມືແໜ້ນແຟ້ນຍິ່ງຂຶ້ນ

- IMG 1255 - ກອງປະຊຸມສຸດຍອດ ລະຫວ່າງ ພັກປະຊາຊົນ ປະຕິວັດລາວ ແລະ ພັກປະຊາຊົນ ກໍາປູເຈຍ ສືບຕໍ່ຮ່ວມມືແໜ້ນແຟ້ນຍິ່ງຂຶ້ນ
- kitchen vibe - ກອງປະຊຸມສຸດຍອດ ລະຫວ່າງ ພັກປະຊາຊົນ ປະຕິວັດລາວ ແລະ ພັກປະຊາຊົນ ກໍາປູເຈຍ ສືບຕໍ່ຮ່ວມມືແໜ້ນແຟ້ນຍິ່ງຂຶ້ນ

ໂດຍຕອບສະໜອງຕາມການເຊື້ອເຊີນ ຂອງພະນະທ່ານ ທອງລຸນ ສີສຸລິດ, ເລຂາທິການໃຫ່ຍ ຄະນະບໍລິຫານງານສູນກາງພັກ ປະຊາຊົນ ປະຕິວັດລາວ, ສົມເດັດ ອັກຄະມາຫາເສນາບໍດີ ເຕໂຈ ຮຸນແຊນ, ປະທານພັກ ປະຊາຊົນ ກໍາປູເຈຍ ພ້ອມດ້ວຍຄະນະຜູ້ແທນຂັ້ນສູງຂອງພັກປະຊາຊົນ ກໍາປູເຈຍ ໄດ້ເດີນທາງມາຮ່ວມກອງປະຊຸມສຸດຍອດ ລະຫວ່າງ ພັກປະຊາຊົນ ປະຕິວັດລາວ ແລະ ພັກປະຊາຊົນ ກໍາປູເຈຍ ທີ່ ນະຄອນຫລວງວຽງຈັນ ໃນວັນທີ 14 ກຸມພາ 2023, ກອງປະຊຸມສຸດຍອດດັ່ງກ່າວ ເປັນກົນໄກໜຶ່ງທີ່ສໍາຄັນໃນການພົວພັນຮ່ວມມືລະຫວ່າງ 2 ພັກ ກໍຄື 2 ປະເທດ ລາວ-ກໍາປູເຈຍ ປະກອບສ່ວນສໍາຄັນເຮັດໃຫ້ສາຍພົວພັນມິດຕະພາບ, ຄວາມສາມັກຄີ ແລະ ການຮ່ວມມື ແບບຄູ່ຮ່ວມຍຸດທະສາດຮອບດ້ານ, ໝັ້ນຄົງ, ຍາວນານ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ກໍາປູເຈຍ ນັບມື້ນັບແຕກດອກອອກຜົນຍິ່ງໆຂຶ້ນ.

ການເດີນທາງເຂົ້າຮ່ວມກອງປະຊຸມສຸດຍອດ ຂອງ ສົມເດັດ ເຕໂຈ ຮຸນແຊນ ແລະ ພ້ອມດ້ວຍຄະນະຄັ້ງນີ້ ໄດ້ນໍາເອົາໄມຕີຈິດມິດຕະພາບ, ຄວາມສາມັກຄີຮັກແພງອັນສະໜິດສະໜົມຂອງພັກ, ລັດ ແລະ ປະຊາຊົນກໍາປູເຈຍ ອ້າຍນ້ອງມາສູ່ ພັກ, ລັດ ແລະ ປະຊາຊົນລາວບັນດາເຜົ່າ. ພ້ອມນັ້ນ, ສະຫາຍເລຂາທິການໃຫ່ຍ ພັກປະຊາຊົນ ປະຕິວັດລາວ ໄດ້ຕາງໜ້າໃຫ້ສູນກາງພັກ, ລັດຖະບານ ແລະ ປະຊາຊົນລາວບັນດາເຜົ່າ ສະແດງຄວາມຊົມເຊີຍ ຕໍ່ບັນດາຜົນສໍາເລັດອັນໃຫຍ່ຫລວງ ແລະ ຮອບດ້ານທີ່ປະຊາຊົນ ກໍາປູເຈຍ ຍາດມາໄດ້ໃນການປົກປັກຮັກສາ, ສ້າງສາ ແລະ ພັດທະນາປະເທດຊາດ ໃນຕະຫລອດໄລຍະຜ່ານມາ ກໍຄື ການສະກັດກັ້ນ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ພາຍໃຕ້ການຊີ້ນໍາ-ນໍາພາອັນຖືກຕ້ອງ ແລະ ສະ ຫລາດສ່ອງໃສຂອງ ພັກປະຊາຊົນ ກໍາປູເຈຍ ອັນມີ ສົມເດັດ ເຕໂຈ ຮຸນແຊນ ເປັນປະທານ, ໂດຍສະເພາະບັນດາໝາກຜົນໃນການຈັດຕັ້ງຜັນຂະຫຍາຍເນື້ອໃນຈິດໃຈ ກອງປະຊຸມສູນກາງພັກ ຄັ້ງທີ 43 ສະໄໝທີ V ຂອງພັກປະຊາຊົນ ກໍາປູເຈຍ ກໍຄື ໄຊຊະນະອັນໃຫຍ່ຫລວງໃນການເລືອກຕັ້ງ ສະມາຊິກສະພາທ້ອງຖິ່ນ, ຜົນສໍາເລັດການເປັນປະທານໝູນວຽນອາຊຽນ ໃນປີ 2022 ຜ່ານມາ ແລະ ຜົນສໍາເລັດກອງປະຊຸມໃຫຍ່ວິສາມັນຜູ້ແທນທົ່ວປະເທດ ຂອງພັກປະຊາຊົນ ກໍາປູເຈຍ ໃນທ້າຍເດືອນມັງກອນ ຜ່ານມາ.

- Visit Laos Visit SALANA BOUTIQUE HOTEL - ກອງປະຊຸມສຸດຍອດ ລະຫວ່າງ ພັກປະຊາຊົນ ປະຕິວັດລາວ ແລະ ພັກປະຊາຊົນ ກໍາປູເຈຍ ສືບຕໍ່ຮ່ວມມືແໜ້ນແຟ້ນຍິ່ງຂຶ້ນ

ສົມເດັດ ຮຸນແຊນ ໄດ້ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນ ແລະ ສະແດງຄວາມຊົມເຊີຍຜົນສໍາເລັດ ອັນສໍາຄັນ ທີ່ປະຊາຊົນລາວບັນດາເຜົ່າ ຍາດມາໄດ້ ພາຍໃຕ້ການນໍາພາອັນສະຫລາດສ່ອງ ໃສຂອງພັກປະຊາຊົນ ປະຕິວັດລາວ ໃນການສ້າງສາ, ພັດທະນາປະເທດຊາດ ຕາມມະຕິກອງປະຊຸມໃຫ່ຍຄັ້ງທີ XI ຂອງພັກ ແລະ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ 9, ການຮັບມືກັບການແຜ່ລະບາດຂອງພະຍາດໂຄວິດ-19 ແລະ ອື່ນໆ.

ພາຍໃຕ້ບັນຍາກາດແຫ່ງໄມຕີຈິດມິດຕະພາບ, ສອງຝ່າຍ ໄດ້ພ້ອມກັນນັ້ນສະແດງຄວາມຊົມເຊີຍ ແລະ ຕີລາຄາສູງ ຜົນສໍາເລັດການພົບປະລະຫວ່າງ ສອງນາຍົກລັດຖະມົນຕີ ລາວ-ກໍາປູເຈຍ ກໍຄື ການເຂົ້າຮ່ວມກອງປະຊຸມສຸດຍອດ ຂອງ ສົມ ເດັດ ຮຸນແຊນ ໃນຄັ້ງນີ້, ເຊື້ອໝັ້ນວ່າການພົບປະສອງພັກໃນຄັ້ງນີ້ ຈະເປັນຂີດໝາຍໃໝ່ສໍາຄັນປະກອບສ່ວນ ເຂົ້າໃນການເພີ່ມພູນຄູນສ້າງ ສາຍພົວພັນມິດຕະພາບ ອັນເປັນມູນເຊື້ອທີ່ດີງາມ ແລະ ການຮ່ວມມືແບບຄູ່ຮ່ວມຍຸດທະສາດຮອບດ້ານ ໝັ້ນຄົງ ຍາວນານ ລະຫວ່າງ ສອງພັກ ແລະ ປະຊາຊົນສອງຊາດ ລາວ-ກໍາປູເຈຍ ໃຫ້ໄດ້ຮັບການເສີມຂະຫຍາຍ ແລະ ມີປະສິດທິຜົນຍິ່ງໆຂຶ້ນ.

ພະນະທ່ານ ທອງລຸນ ສີສຸລິດ, ເລຂາທິການໃຫ່ຍ ພັກປະຊາຊົນ ປະຕິວັດລາວແລະ ສົມເດັດ ຮຸນແຊນ, ປະທານພັກ ປະຊາຊົນ ກໍາປູເຈຍ ໄດ້ເປັນເອກະພາບ ແລະ ຍິນດີຮ່ວມກັນ ສືບຕໍ່ປະສານສົມທົບຢ່າງແໜ້ນແຟ້ນ ເພື່ອຊຸກຍູ້ເສີມຂະຫຍາຍການພົວພັນ ລະຫວ່າງ ສອງພັກ-ສອງລັດ ແລະ ປະຊາຊົນສອງຊາດ ລາວ-ກໍາປູເຈຍ ໃຫ້ແຕກດອກອອກຜົນຍິ່ງໆຂຶ້ນ ແລະ ນໍາເອົາຜົນປະໂຫຍດຕົວຈິງນັບມື້ນັບຫລາຍຂຶ້ນ ມາສູ່ປະຊາຊົນສອງຊາດ ລາວ-ກໍາປູເຈຍ, ປະກອບສ່ວນເຂົ້າໃນການເສີມສ້າງສັນຕິພາບ, ການຮ່ວມມື ແລະ ການພັດທະນາໃນພາກພື້ນ ແລະ ໃນໂລກ.

ພາຍຫລັງການພົບປະ, ພະນະທ່ານ ທອງລຸນ ສີສຸລິດ ແລະ ສົມເດັດ ຮຸນແຊນ ໄດ້ເປັນສັກຂີພິຍານການລົງນາມ ເອກະສານຮ່ວມມືສອງພັກ 2 ສະບັບ ແລະ ໃນຕອນບ່າຍຂອງວັນດັ່ງກ່າວ ພະນະທ່ານ ທອງລຸນ ສີສຸລິດ ໄດ້ຈັດງານລ້ຽງເປັນກຽດຕ້ອນຮັບ ສົມເດັດ ຮຸນແຊນ ພ້ອມດ້ວຍຄະນະ.

 

- 3 - ກອງປະຊຸມສຸດຍອດ ລະຫວ່າງ ພັກປະຊາຊົນ ປະຕິວັດລາວ ແລະ ພັກປະຊາຊົນ ກໍາປູເຈຍ ສືບຕໍ່ຮ່ວມມືແໜ້ນແຟ້ນຍິ່ງຂຶ້ນ
- 5 - ກອງປະຊຸມສຸດຍອດ ລະຫວ່າງ ພັກປະຊາຊົນ ປະຕິວັດລາວ ແລະ ພັກປະຊາຊົນ ກໍາປູເຈຍ ສືບຕໍ່ຮ່ວມມືແໜ້ນແຟ້ນຍິ່ງຂຶ້ນ
- 4 - ກອງປະຊຸມສຸດຍອດ ລະຫວ່າງ ພັກປະຊາຊົນ ປະຕິວັດລາວ ແລະ ພັກປະຊາຊົນ ກໍາປູເຈຍ ສືບຕໍ່ຮ່ວມມືແໜ້ນແຟ້ນຍິ່ງຂຶ້ນ