ວັນສ້າງຕັ້ງອົງການກວດກາພັກ-ລັດ ຄົບຮອບ 41 ປີ  (16 ກຸມພາ 1982- 16 ກຸມພາ 2023)

- 116096424 107863964360180 3392106263067058228 n - ວັນສ້າງຕັ້ງອົງການກວດກາພັກ-ລັດ ຄົບຮອບ 41 ປີ  (16 ກຸມພາ 1982- 16 ກຸມພາ 2023)
- kitchen vibe - ວັນສ້າງຕັ້ງອົງການກວດກາພັກ-ລັດ ຄົບຮອບ 41 ປີ  (16 ກຸມພາ 1982- 16 ກຸມພາ 2023)

ພາຍຫລັງຢຶດອໍານາດທົ່ວປະເທດ ແລະ ສະຖາປະນາ ເປັນປະເທດສາທາລະນະປະຊາທິປະໄຕ ປະຊາຊົນລາວ ວັນທີ 2 ທັນວາ 1975 ຢ່າງເປັນທາງການ ພັກໄດ້ກາຍ ເປັນພັກກຳອຳນາດນຳພາຮອບດ້ານ ໃນທົ່ວສັງຄົມ ຊຶ່ງຮຽກຮ້ອງໃຫ້ວຽກງານກວດກາຕ້ອງໄດ້ເປີດກວ້າງ ບໍ່ພຽງແຕ່ກວດກາພາຍໃນພັກເທົ່ານັ້ນ ຫາກຍັງຕ້ອງຕິດຕາມ-ກວດກາທັງໝົດການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ. ດັ່ງນັ້ນ, ກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 8 ສະໄໝທີ II ປີ 1980 ຈິ່ງກໍານົດວ່າ: “ຕ້ອງຈັດຕັ້ງອົງການກວດກາຂຶ້ນທັນທີ ເພື່ອຊ່ວຍສູນກາງພັກ, ລັດຖະບານ ແລະ ສະພາປະຊາຊົນສູງສຸດ ໃນການກວດກາການປະຕິບັດມະຕິຂອງພັກ, ກົດໝາຍ ແລະ ຂໍ້ກໍານົດຕ່າງໆຂອງລັດ”. ອີງໃສ່ຈິດໃຈມະຕິດັ່ງກ່າວ, ສູນກາງພັກ, ຄະນະປະຈໍາສະພາປະຊາຊົນສູງສຸດ ແລະ ສະພາລັດຖະມົນຕີແຫ່ງ ສປປ ລາວ ໄດ້ຮ່ວມອອກດໍາລັດ ເລກທີ 02, ລົງວັນທີ 16 ກຸມພາ 1982, ກໍານົດໃຫ້ສ້າງຕັ້ງຄະນະກຳມະການກວດກາພັກ-ລັດຂຶ້ນ ທັງຢູ່ຂັ້ນສູນກາງ, ແຂວງ, ເມືອງ ແລະ ໃຫ້ແບ່ງກຳມະການພັກຂັ້ນຂອງຕົນຮັບຜິດຊອບ. ອີງໃສ່ດໍາລັດສະບັບດັ່ງກ່າວ ຮອດປີ 2012 ກົມການເມືອງສູນກາງພັກ ໄດ້ມີມະຕິຕົກລົງຮັບຮອງເອົາວັນທີ 16 ກຸມພາ 1982 ເປັນວັນສ້າງອົງການກວດກາພັກ-ລັດ ແຫ່ງ ສປປ ລາວ ຢ່າງເປັນທາງການ. ນັບແຕ່ກອງປະຊຸມໃຫຍ່ ຄັ້ງທີ III ຂອງພັກ ປີ 1982 ເປັນຕົ້ນມາ ຢູ່ສູນກາງ ແລະ ທ້ອງຖິ່ນ ໄດ້ມີການສ້າງຕັ້ງອົງການກວດກາພັກ-ລັດ ເປັນກົງຈັກເອກະລາດ ຂຶ້ນກັບການຊີ້ນໍາໂດຍກົງ ຂອງຄະນະພັກຂັ້ນຕົ້ນ, ເຮັດບົດບາດຕິດຕາມ ກວດກາການຈັດຕັ້ງປະຕິບັດແນວທາງ, ແຜນນະໂຍບາຍ, ມະຕິ, ຄໍາສັ່ງ ກົດລະບຽບຂອງພັກ ແລະ ກົດໝາຍຂອງລັດ. ຄະນະກວດກາພັກ-ລັດ ແຕ່ລະຂັ້ນ ໄດ້ຮັບການສ້າງຕັ້ງ ແລະ ປັບປຸງປ່ຽນແປງໄປຕາມກົດລະບຽບຂອງພັກ ແຕ່ລະສະໄໝ ແລະ ຕາມຄວາມຮຽກຮ້ອງຕ້ອງການຂອງໜ້າທີ່ການເມືອງຕົວຈິງ ແຕ່ລະໄລຍະ.

ເພື່ອເປັນບ່ອນອີງໃຫ້ການນໍາພາ-ຊີ້ນໍາ ຂອງຄະນະພັກແຕ່ລະຂັ້ນ ແລະ ການເຄື່ອນໄຫວປະຕິບັດພາລະບົດບາດ, ໜ້າທີ່, ສິດ ຂອງຄະນະກວດກາແຕ່ລະຂັ້ນ ຄະນະກວດກາສູນກາງພັກ-ອົງການກວດກາແຫ່ງລັດ ເປັນເຈົ້າການຄົ້ນຄວ້າສ້າງນິຕິກໍາກ່ຽວກັບວຽກງານກວດກາພັກ, ກວດກາລັດ, ສະກັດກັ້ນ ແລະ ຕ້ານການສໍ້ລາດບັງຫຼວງ ເປັນຕົ້ນ ມະຕິ ຂອງຄະນະບໍລິຫານງານສູນກາງພັກ, ຂອງກົມການເມືອງສູນກາງພັກ ແລະ ຄະນະເລຂາທິການສູນກາງພັກ; ສ້າງ ແລະ ປັບປຸງກົດໝາຍ ວ່າດ້ວຍການກວດກາລັດ, ກົດ    ໝາຍ ວ່າດ້ວຍການຕ້ານການສໍ້ລາດບັງຫຼວງ  ແລະ ນິຕິກໍາລຸ່ມກົດໝາຍຈໍານວນຫຼາຍສົມຄວາມ.

- Visit Laos Visit SALANA BOUTIQUE HOTEL - ວັນສ້າງຕັ້ງອົງການກວດກາພັກ-ລັດ ຄົບຮອບ 41 ປີ  (16 ກຸມພາ 1982- 16 ກຸມພາ 2023)

ບົນພື້ນຖານມີນິຕິກໍາ ກ່ຽວກັບວຽກງານກວດກາ, ສະກັດກັ້ນ ແລະ ຕ້ານການສໍ້ລາດບັງຫຼວງ ເປັນບ່ອນອີງໃຫ້ການເຄື່ອນໄຫວ ສົມທົບກັບການນໍາພາ-ຊີ້ນໍາຂອງຄະນະພັກ ແຕ່ລະຂັ້ນຢ່າງຕັ້ງໜ້າ  ໄດ້ເຮັດໃຫ້ການເຄື່ອນໄຫວວຽກງານກວດກາພັກ, ກວດກາລັດ, ສະກັດກັ້ນ ແລະ ຕ້ານການສໍ້ລາດບັງງຫຼວງ ຍາດໄດ້ຜົນງານ ແລະ ຜົນສໍາເລັດຫຼາຍດ້ານ ໄດ້ປະກອບສ່ວນສໍາຄັນໃນການປັບປຸງກໍ່ສ້າງພັກໃຫ້ມີຄວາມປອດໃສ, ເຂັ້ມແຂງ, ໜັກແໜ້ນ; ການຄຸ້ມຄອງບໍລິຫານລັດ ມີຄວາມເຂັ້ມແຂງ ແລະ ເຂັ້ມງວດຕາມກົດໝາຍ ດີຂຶ້ນເທື່ອລະກ້າວ ຊຶ່ງສະແດງອອກ ດັ່ງນີ້:

ວຽກງານກວດກາພັກ ໄດ້ເຂົ້າຮ່ວມໂດຍກົງໃນການດໍາເນີນຊີວິດການເມືອງພາຍໃນພັກ, ການເລືອກເຟັ້ນບຸກຄະລາກອນຂອງກອງປະຊຸມໃຫຍ່ຂອງອົງຄະນະພັກແຕ່ລະຂັ້ນ ແລະ ກະກຽມດ້ານບຸກຄະລາກອນຂອງກອງປະຊຸມໃຫຍ່ ແຕ່ລະຄັ້ງ ຂອງພັກ ເຊິ່ງສ່ວນໃຫຍ່ກໍ່ສາມາດເລືອກໄດ້ບຸກຄະລາກອນທີ່ມີມາດຕະຖານ, ເງື່ອນໄຂຄົບຖ້ວນ, ມີຄຸນນະພາບດີຂຶ້ນກວ່າເກົ່າ; ຊຸກຍູ້, ຕິດຕາມ-ກວດກາ ປະເມີນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກ    ແໜ້ນ ແລະ ການຈັດແບ່ງປະເພດສະມາຊິກພັກ ແລະ ລົງວິໄນໃນລະດັບຕ່າງໆຕໍ່ການຈັດຕັ້ງພັກ ແລະສະມາຊິກພັກ.ຈາກການເອົາໃຈໃສ່ນໍາພາ-ຊີ້ນໍາວຽກງານຕິດຕາມ, ກວດກາພາຍໃນພັກຢ່າງເຂັ້ມງວດ ໄດ້ປະກອບສ່ວນສໍາຄັນໃນການປັບປຸງກໍ່ສ້າງພັກໃຫ້ມີຄວາມປອດໃສ, ເຂັ້ມແຂງ, ໜັກແໜ້ນ; ທັງເປັນການສະກັດກັ້ນການລະເມີດກົດລະບຽບພັກ, ກົດໝາຍຂອງລັດ; ແກ້ໄຂຢ່າງເຂັ້ມງວດຕໍ່ການຈັດຕັ້ງພັກ ແລະ ສະມາຊິກພັກທີ່ມີການລະເມີດ ເຊິ່ງໄດ້ປັບປຸງທາງດ້ານການເມືອງ, ແນວຄິດ, ການຈັດຕັ້ງ ແລະ ແບບແຜນນຳພາຂຶ້ນຕື່ມບາດກ້າວໜຶ່ງ.

ວຽກງານກວດກາລັດ ດໍາເນີນການຕິດຕາມ, ກວດກາປົກກະຕິ, ກວດກາຕາມຄຳສັ່ງ, ຕາມການສະເໜີຂອງພົນລະເມືອງ, ໃນນັັັ້ນ ອັນພົ້ນເດັ່ນແມ່ນກວດກາບັນດາໂຄງການລົງທຶນກໍ່ສ້າງພື້ນຖານໂຄງລ່າງ, ການຄຸ້ມຄອງ-ນຳໃຊ້ທີ່ດິນ, ຂຸດຄົ້ນ ແລະທຸລະກິດໄມ້, ການສຳຫຼວດ-ຂຸດຄົ້ນແຮ່ທາດ ແລະອື່ນໆ. ອັນສໍາຄັນຜ່ານການເຄື່ອນໄຫວກວດກາຕົວຈິງເຫັນໄດ້ຊ່ອງວ່າງດ້ານລະບຽບການ ແລະ ໄດ້ສະເໜີໃຫ້ພາກສ່ວນກ່ຽວຂ້ອງມີມາດຕະການປັບປຸງແກ້ໄຂໃຫ້ຮັດກຸມກວ່າເກົ່າ, ທັງເປັນການປະກອບສ່ວນຢັບຢັ້ງ ການລະເມີດກົດໝາຍ, ຫຼຸດຜ່ອນການກະທໍາຜິດດ້ານວິໄນແຜນການ-ການເງິນ, ຜົນເສຍຫາຍ ດ້ານຊັບສິນໄດ້ຮັບການເກັບກູ້ຄືນຈໍານວນໜຶ່ງ, ຜູ້ມີຄວາມຜິດໄດ້ລົງໂທດຕາມກົດໝາຍ ເຮັດໃຫ້ການບໍລິຫານຄຸ້ມຄອງລັດ-ຄຸ້ມຄອງເສດຖະກິດ-ສັງຄົມ ມີຄວາມໂປ່ງໃສເທື່ອລະກ້າວ.

ວຽກງານສະກັດກັ້ນ, ຕ້ານການສໍ້ລາດບັງຫຼວງ ແລະ ສືບສວນ-ສອບສວນ ໄດ້ເອົາໃຈໃສ່ຍົກລະດັບມາຕະຫຼອດ, ໂດຍໄດ້ນຳເອົາບັນດານິຕິກຳ ທີ່ໄດ້ສ້າງ ແລະປັບປຸງໃໝ່ ນໍາໄປຈັດຕັ້ງເຜີຍແຜ່ເຊື່ອມຊຶມ, ສຶກສາອົບຮົມໃຫ້ສະມາຊິກພັກ, ພະນັກງານ-ລັດຖະກອນ, ທະຫານ, ຕຳຫຼວດ ແລະປະຊາຊົນຢ່າງກວ້າງຂວາງ ຕໍ່ຜົນຮ້າຍ ແລະໄພອັນຕະລາຍຂອງການສໍ້ລາດບັງຫຼວງ ໄປພ້ອມກັນນັ້ນ ກໍ່ໄດ້ດໍາເນີນການສືບສວນ-ສອບສວນ ຄະດີທີ່ກ່ຽວຂ້ອງກັບການສໍ້ລາດບັງຫຼວງ ໄດ້ຫຼາຍເປົ້າໝາຍ. ຜ່ານການນໍາພາ-ຊີ້ນໍາວຽກງານດັ່ງກ່າວ ເຫັນວ່າ ຄະນະພັກ, ອົງການປົກຄອງ, ຄະນະກວດກາແຕ່ລະຂັ້ນ ແລະພົນລະເມືອງ ໄດ້ມີສ່ວນຮ່ວມຫຼາຍຂຶ້ນ, ເຫັນແຈ້ງຕໍ່ຜົນກະທົບທີ່ຮ້າຍແຮງຂອງການສໍ້ລາດບັງຫຼວງ ເຮັດໃຫ້ປະກົດການສໍ້ລາດບັງຫຼວງຫຼຸດໜ້ອຍຖອຍລົງເທື່ອລະກ້າວ.

ວຽກງານຄົ້ນຄວ້າແກ້ໄຂຄຳຮ້ອງ-ຄຳສະເໜີ ໄດ້ເປັນເຈົ້າການປະຕິບັດພາລະບົດບາດໜ້າທີ່ ແລະສິດຂອງຕົນ ເຊິ່ງຕະຫຼອດໄລຍະທີ່ຜ່ານມາໄດ້ມີຄວາມພະຍາຍາມຍົກລະດັບຄວາມສາມາດຂອງພະນັກງານວິຊາການ ໃນການຕິດຕາມກໍາຂໍ້ມູນຫຼັກຖານຈາກຄວາມເປັນຈິງ, ວິເຄາະໄຈ້ແຍກຕາມເຫດຜົນຢ່າງພາວະວິໄສ, ທັງສອດຄ່ອງກັບກົດລະບຽບພັກ ແລະກົດໝາຍຂອງລັດ. ດ້ານໜຶ່ງ ເຮັດໃຫ້ຜູ້ມາຮ້ອງຟ້ອງ, ຮ້ອງ ທຸກ ແລະ ສະເໜີ ສ່ວນຫຼາຍມີຄວາມພໍໃຈ; ອີກດ້ານໜຶ່ງ ເປັນການປະກອບສ່ວນສໍາຄັນໃນການສະກັດກັ້ນປະກົດການຫຍໍ້ທໍ້ພາຍໃນກົງຈັກການຈັດຕັ້ງ, ຖັນແຖວພະນັກງານຂອງພັກ ແລະລັດ ເຮັດໃຫ້ສັງຄົມໄດ້ຮັບການຄຸ້ມຄອງຕາມລະບຽບກົດໝາຍ ນັບມື້ເຂັ້ມແຂງ ແລະມີຄວາມສະຫງົບໂດຍພື້ນຖານ. ຄໍາຮ້ອງ-ຄໍາສະເໜີ ທີ່ພົ້ນເດັ່ນກວ່າໝູ່ແມ່ນຂໍ້ຂັດແຍ່ງກ່ຽວຂ້ອງກັບທີ່ດິນ, ເຮືອນ, ການດຳເນີນທຸລະກິດ, ຄວາມບໍ່ພໍໃຈຕໍ່ຂະບວນການສືບສວນ-ສອບສວນ ຫຼືຕໍ່ການປະຕິບັດຄຳຕັດສິນຂອງສານ, ພ້ອມທັງບັນຫາການລົງວິໄນຕໍ່ພະນັກງານ-ສະມາຊິກພັກ ແລະ ບັນຫາອື່ນໆ.

ວຽກງານຕິິດຕາມ, ກວດກາການຈັດຕັ້ງປະຕິບັດຜົນຂອງການກວດກາຢ່າງເປັນເຈົ້າການ ໂດຍໄດ້ກຳສະຖິຕິ, ຂໍ້ມູນ, ສຶກສາອົບຮົມ, ອະທິບາຍ, ຊີ້ແຈງ ແລະຊຸກຍູ້ເປົ້າໝາຍຖືກກວດກາ ທີ່ຢູ່ໃນຄວາມຮັບຜິດຊອບຂອງຕົນປະຕິບັດຜົນການກວດກາ-ແກ້ໄຂໃຫ້ຖືກຕ້ອງຕາມກົດໝາຍ ແລະລະບຽບການຕ່າງໆຢ່າງເຂັ້ມງວດ. ຜ່ານການຕິດຕາມ, ກວດກາການຈັດຕັ້ງປະຕິບັດຜົນການກວດກາ ໄດ້ຫຼາຍເປົ້າໝາຍ ແລະສາມາດເກັບກູ້ຄືນໄດ້ຫຼາຍສົມຄວນ.

ວຽກງານພົວພັນຕ່າງປະເທດ ໄດ້ມີການແລກປ່ຽນຜູ້ແທນການນໍາ ແລະຂັ້ນວິຊາການຢ່າງເປັນປົກກະຕິກັບ ສສ ຫວຽດນາມ;  ສປ ຈີນ,  ກຳປູເຈຍ, ລາຊະອານາຈັກໄທ ແລະປະເທດອື່ນໆ; ໄດ້ພົວພັນແລກປ່ຽນບົດຮຽນກ່ຽວກັບວຽກງານກວດກາລັດ, ສະກັດກັ້ນຕ້ານການສໍ້ລາດບັງຫຼວງກັບບັນດາປະເທດພາກພື້ນ ແລະສາກົນ. ຜ່ານການປະຕິບັດວຽກງານພົວພັນຕ່າງປະເທດ ໄດ້ເຮັດໃຫ້ບັນດາປະເທດເພື່ອນມິດ, ອົງການຈັດຕັ້ງສາກົນຮັບຮູ້ເຂົ້າໃຈທັດສະນະ, ນະໂຍບາຍຂອງພັກ ແລະ ສປປ ລາວ ກ່ຽວກັບການສະກັດກັ້ນ ແລະຕ້ານການສໍ້ລາດບັງຫຼວງ ທັງໄດ້ຮັບການສະໜັບສະໜູນຮ່ວມມື ແລະ ຍາດແຍ່ງເອົາການຊ່ວຍເຫຼືອທຶນຮອນ, ວັດຖຸໄດ້ຈໍານວນໜຶ່ງ.

ດ້ານການຈັດຕັ້ງ ແລະ ພະນັກງານກວດກາ ໄດ້ຮັບການປັບປຸງ ແລະ ເຕີບໃຫຍ່ຂຶ້ນຢ່າງບໍ່ຢຸດຢັ້ງ ມາຮອດປີ 2022 ນີ້ ໄດ້ມີກົງຈັກການຈັດຕັ້ງທີ່ເຮັດວຽກງານກວດກາຢູ່ທຸກຂັ້ນ-ທຸກຂະແໜງການ ແຕ່ສູນກາງລົງຮອດຂັ້ນເມືອງ; ມີພະນັກງານທີ່ສັງກົດໃນການຈັດຕັ້ງອົງການກວດກາ 4.697 ຄົນ, ຍິງ 1.532 ຄົນ; ພະນັກງານກວດກາດັ່ງກ່າວລ້ວນແຕ່ມີລະດັບການສຶກສາສາມັນຈົບມໍປາຍມີວິຊາສະເພາະດ້ານຕ່າງໆ ແຕ່ຊັ້ນສູງຈົນຮອດປະລິນຍາເອກ.

ເພື່ອສືບຕໍ່ຮັກສາມູນເຊື້ອ ແລະ ເສີມຂະຫຍາຍບົດບາດສໍາຄັນ ຂອງວຽກງານກວດກາ, ສະກັດກັ້ນ ແລະ ຕ້ານການສໍ້ລາດບັງຫຼວງ ໃນຊຸມປີຕໍ່ໜ້າ ຕ້ອງເອົາໃຈໃສ່ບາງດ້ານດັ່ງນີ້:

  1. ຄະນະພັກ, ອົງການປົກຄອງ ແລະ ຄະນະກວດກາແຕ່ລະຂັ້ນ ຕ້ອງເລີ່ມຈາກການຄົ້ນຄວ້າ, ກໍາແໜ້ນສະພາບຄວາມເປັນຈິງໃນຂົງເຂດວຽກງານກວດກາຂອງພັກ-ລັດ, ນຳເອົາຈຸດອ່ອນຄົງຄ້າງຜ່ານມາເປັນເປົ້າໝາຍຕົວຈິງເພື່ອແກ້ໄຂ, ເອົົາການເລັ່ງທວງຂອງສະພາບການ ເປັນຈຸດເລີ່ມຕົ້ນ ແລະ ແຮງດັນໃນການຕື່ນຕົວກ້າວຂຶ້ນ, ທັງເອົາການສ້າງຄວາມເຂົ້າໃຈເລິກເຊິ່ງ ເອກະພາບ ແລະ ຍົກສູງສະຕິຮັບຜິດຊອບຂອງຜູ້ເຮັດວຽກງານກວດກາເປັນເນື້ອໃນຕົ້ນຕໍໃນການເພີ່ມທະວີວຽກງານການເມືອງ-ແນວຄິດໃນຂົງເຂດວຽກງານກວດກາຂອງພັກ-ລັດ.

2.ໃນການເຄື່ອນໄຫວນຳພາ-ຊີ້ນຳຕໍ່ວຽກງານກວດກາ ຄະນະພັກແຕ່ລະຂັ້ນທັງຕ້ອງຖືສຳຄັນການນຳພາ-ຊີ້ນຳ ແລະປະຕິບັດການຕິດຕາມ ກວດກາປົກກະຕິແຕ່ຫົວທີ ເພື່ອສະກັດກັ້ນການກະທຳຜິດທັງຕ້ອງດຳເນີນການກວດກາຕາມຄຳສັ່ງຢ່າງວ່ອງໄວທັນການ ເມື່ອມີປະກົດການລະເມີດກົດລະບຽບພັກ ຫຼື ກົດໝາຍຂອງລັດ ທັງນີ້ກໍ່ເພື່ອຮັບປະກັນເຮັດໃຫ້ວຽກງານກວດກາດຳເນີນຢ່າງເປັນລະບົບ, ແຂງແຮງ ແລະ ແທດຕົວຈິງ.

  1. ເພີ່ມທະວີການນຳພາປັບປຸງການຈັດຕັ້ງຂອງຄະນະກວດກາ-ອົງການກວດກາແຕ່ລະຂັ້ນ, ແຕ່ລະຂະ ແໜງການ ໃນນັ້ນ ທັງຕ້ອງຮັບປະກັນດ້ານພາລະບົດບາດ, ກົນໄກເຄື່ອນໄຫວລະອຽດຮັດກຸມ, ກຳນົດການແກ້ໄຂວຽກຈຸດສຸມແຕ່ລະໄລຍະ ໃຫ້ແທດກັບສະພາບຕົວຈິງ ທັງດຳເນີນການກໍ່ສ້າງ-ບຳລຸງພະນັກງານຢ່າງເປັນລະບົບ, ສ້າງໃຫ້ໄດ້ຖັນແຖວພະນັກງານກວດກາທີ່ມີຄວາມຮູ້, ຄວາມຊຳນານໃນວຽກງານ, ມີຄຸນທາດການເມືອງທີ່ໜັກແໜ້ນ, ເຮັດວຽກດ້ວຍຄວາມມານະອົດທົນ, ຊື່ສັດ ແລະ ທ່ຽງຕົງ; ການປັບປຸງດ້ານການຈັດຕັ້ງ ແລະພະນັກງານຂອງຄະນະກວດກາ-ອົງການກວດກາແຕ່ລະຂັ້ນ, ແຕ່ລະບ່ອນຕ້ອງຕິດພັນກັບການເຄື່ອນໄຫວກໍ່ສ້າງໜ່ວຍພັກປອດໃສ, ເຂັ້ມແຂງ ແລະ  ໜັກແໜ້ນ.
  2. ຄະນະພັກ, ອົງການປົກຄອງ ແລະ ສະມາຊິກພັກ-ພະນັກງານຕ້ອງສ້າງບາດກ້າວບຸກທະລຸດ້ານຈິນຕະນາການ, ຄວາມຮັບຮູ້ ແລະຄວາມຮັບຜິດຊອບຕໍ່ຜົນໄດ້ຜົນເສຍຂອງວຽກງານກວດກາ, ຕາມທັດສະນະຂອງພັກທີ່ວ່າ: ”ບໍ່ມີການກວດກາ ກໍ່ໝາຍຄວາມວ່າບໍ່ມີການນຳພາ”.ທຸກການຈັດຕັ້ງ ແລະ ພະນັກງານຂອງພັກ ແລະ ລັດ ຕ້ອງໄດ້ຮັບການຄຸ້ມຄອງຢ່າງເປັນລະບົບ, ທຸກການກະທຳຜິດ ຕ້ອງມີການກວດກາ ແລະແກ້ໄຂຕາມກົດລະບຽບຂອງພັກ ຫຼື ກົດໝາຍຂອງລັດ, ການຈັດຕັ້ງ ຫຼື ຜູ້ນຳພາທີ່ມີໜ້າທີ່ແກ້ໄຂຕາມຜົນການກວດກາແຕ່ບໍ່ດຳເນີນການແກ້ໄຂ ຖືວ່າມີຄວາມຜິດ ແລະຕ້ອງມີການພິຈາລະນາທາງວິໄນຕໍ່ຄວາມຜິດດັ່ງກ່າວ.
  3. ປັບລະດັບການເຄື່ອນໄຫວຂອງຄະນະກວດກາ-ອົົງການກວດກາແຕ່ລະຂັ້ນໃຫ້ມີຄຸນນະພາບໃໝ່ ພາຍໃຕ້ການນຳພາ-ຊີ້ນຳທີ່ເປັນເອກະພາບ ແລະເຂັ້ມແຂງຂອງສູນກາງພັກ ແລະຄະນະພັກແຕ່ລະຂັ້ນ, ສ້າງການຫັນປ່ຽນອັນຈະແຈ້ງແຂງແຮງໃນການຕີຖອຍ ແລະສະກັດກັ້ນປະກົດການຫຍໍ້ທໍ້ພາຍໃນການຈັດຕັ້ງ ແລະຖັນແຖວສະມາຊິກພັກ-ພະນັກງານ ໂດຍສະເພາະແມ່ນ ການແກ້ໄຂບັນຫາການສວຍໃຊ້ໜ້າທີ່ ເພື່ອສໍ້ລາດບັງຫຼວງທຸກຮູບແບບຂອງພະນັກງານ ເຊິ່ງເປັນໜຶ່ງໃນບັນດາເປົ້າໝາຍໂດຍກົງຂອງວຽກງານກວດກາ ທີ່ຕ້ອງໄດ້ເອົາໃຈໃສ່ໃນຊຸມປີຕໍ່ໜ້າ.
  4. ແກ້ໄຂແບບແຜນວິທີເຮັດວຽກຂອງຄະນະກວດກາ ແລະພະນັກງານກວດກາບໍ່ວ່າຈະເປັນຮູບການ ຫຼືວິທີການກວດກາທີ່ບໍ່ທັນລະອຽດຮອບດ້ານ, ການກວດກາແກ່ຍາວ, ກຳຂໍ້ມູນຫຼັກຖານບໍ່ຊັດເຈນ, ການວິເຄາະວິໄຈບັນຫາບໍ່ເລິກເຊິ່ງ, ລັກສະນະຮ້ອນຮົນຟ້າວຟັ່ງ, ການສະຫຼຸບຕີລາຄາບໍ່ພາວະວິໄສ, ການລາຍງານຜົນຂອງການກວດກາໃຫ້ຂັ້ນເທິງຊັກຊ້າ ແລະ ອື່ນໆ… ເພື່ອຮັບປະກັນການຕົກລົງແກ້ໄຂຜົນການກວດກາຂອງຄະນະພັກ, ອົງການປົກຄອງແຕ່ລະຂັ້ນໃຫ້ທັນການ, ເຂັ້ມງວດ, ສັກສິດຕາມລະບຽບຂອງພັກ ແລະກົດໝາຍຂອງລັດ.
  5. ສ້າງເງື່ອນໄຂໃຫ້ທຸກການຈັດຕັ້ງ, ສະມາຊິກພັກ-ພະນັກງານ, ສື່ມວນຊົນ ແລະປະຊາຊົນເຂົ້າຮ່ວມໃນວຽກງານຕິດຕາມ, ກວດກາໂດຍສ້າງບັນດານິຕິກຳທີ່ຈຳເປັນ ເພື່ອຮັບປະກັນການເຂົ້າຮ່ວມຂອງທຸກພາກສ່ວນໃນສັງຄົມ ເຂົ້າໃນການຕິດຕາມ, ກວດກາແກ້ໄຂໃຫ້ໄດ້ບັນຫາຫຍໍ້ທໍ້, ສໍ້ລາດບັງຫຼວງທີ່ເປັນການກົດໜ່ວງຖ່ວງດຶງການພັດທະນາ, ສ້າງຄວາມເສື່ອມເສຍຕໍ່ບົດບາດການນຳພາຂອງພັກ ແລະ ການຄຸ້ມຄອງຂອງລັດ.
  6. ສູ້ຊົນເຮັດໃຫ້ວຽກງານຕິດຕາມ, ກວດກາມີການຫັນປ່ຽນໃໝ່, ເຮັດໃຫ້ວຽກງານຕິດຕາມ, ກວດກາປົກກະຕິດຳເນີນຢ່າງແຂງແຮງຢູ່ໃນທຸກຂັ້ນ, ທຸກຂະແໜງການຕາມຂອບເຂດສິດ, ຄວາມຮັບຜິດຊອບ, ເອົາການກວດກາ-ແກ້ໄຂເມື່ອມີການລະເມີດຢ່າງເຂັ້ມງວດ-ທັນການ ຖືກຕາມກົດລະບຽບພັກ-ກົດໝາຍຂອງລັດ. ກວດກາວຽກ ແລະຄວາມຮັບຜິດຊອບຕົວຈິງຂອງການຈັດຕັ້ງ ແລະບຸກຄົນ; ສົມທົບການກວດກາຂອງພັກກັບຂອງລັດ ແລະຂອງປະຊາຊົນໃຫ້ເໝາະສົມກົມກ່ຽວ.
  7. ຄະນະກວດກາ ແລະພະນັກງານກວດກາແຕ່ລະຂັ້ນຕ້ອງປະຕິບັດຂໍ້ແຂ່ງຂັນ “ ຮັກຊາດ ແລະພັດທະນາ” ໂດຍຕິດພັນກັບການປະຕິບັດວຽກງານຕົວຈິງ; ເອົາປະສິດທິຜົນການເຄື່ອນໄຫວວຽກງານຕົວຈິງ ເປັນປັດໃຈຕົ້ນຕໍໃນການພິຈາລະນາດ້ານຄວາມຮູ້-ຄວາມສາມາດ, ຄວາມຮັບຜິດຊອບ ແລະ ຊື່ສັດທ່ຽງຕົງ ຂອງພະນັກງານກວດກາ ເພື່ອ “ ສ້າງການຫັນປ່ຽນແຂງແຮງ ເລິກເຊິ່ງ ແລະຮອບດ້ານ ” ໃນວຽກງານກວດກາ.

ດັ່ງຄໍາຂວັນ “ກວດກາທົ່ວເຖິງ ເລິກເຊິ່ງ ໂປ່ງໃສ ແກ້ໄຂບັນຫາຖືກຕ້ອງ ເດັດຂາດ ທັນການ ແລະ ເປັນທໍາ”

- 5 - ວັນສ້າງຕັ້ງອົງການກວດກາພັກ-ລັດ ຄົບຮອບ 41 ປີ  (16 ກຸມພາ 1982- 16 ກຸມພາ 2023)
- 3 - ວັນສ້າງຕັ້ງອົງການກວດກາພັກ-ລັດ ຄົບຮອບ 41 ປີ  (16 ກຸມພາ 1982- 16 ກຸມພາ 2023)
- 4 - ວັນສ້າງຕັ້ງອົງການກວດກາພັກ-ລັດ ຄົບຮອບ 41 ປີ  (16 ກຸມພາ 1982- 16 ກຸມພາ 2023)