ລັດຖະບານ ສ.ເກົາຫຼີ ຊ່ວຍເຫຼືອລ້າສ້າງລະບົບບໍາບັດນໍ້າເປື້ອນ ແລະ ຂີ້ຕະເລດອາຈົມ ຢູ່ນະຄອນປາກເຊ ມູນຄ່າລວມ 6,78 ລ້ານໂດລາ
ທ່ານ ວັນສະແຫວງ ອຸດທະຈັກ ຮອງຫົວໜ້າກົມນ້ຳປະປາ ກະຊວງ ຍທຂ ລາຍງານ ເນື່ອງໃນໂອກາດວາງສີລາລືກໂຄງການກໍ່ສ້າງລະບົບບໍາບັດນໍ້າເປື້ອນແບບບໍ່ລວມສູນ ແລະ ບໍາບັດຂີ້ຕະເລດອາຈົມ ວັນທີ 22 ກຸມພາ 2023 ວ່າ: ໂຄງການດັ່ງກ່າວນີ້ ໄດ້ຮັບການຊ່ວຍເຫຼືອລ້າ ຈາກລັດຖະບານ ສ.ເກົາຫຼີ ໂດຍຜ່ານອົງການຮ່ວມມືສາກົນ KOICA, ມູນຄ່າທັງໝົດ 6,78 ລ້ານໂດລາສະຫະລັດ, ໄລຍະການຈັດຕັ້ງປະຕິບັດໂຄງການ ເລີ່ມແຕ່ປີ 2019 – 2023 (ໄລຍະເວລາທັງໝົດ 3 ປີ 9 ເດືອນ) ເພື່ອເສີມສ້າງຄວາມອາດສາມາດໃນການຄຸ້ມຄອງນໍ້າເປື້ອນ ແລະ ຂີ້ເຫຍື້ອ ສໍາລັບປັບປຸງສິ່ງແວດລ້ອມຕົວເມືອງ ທັງປັບປຸງຄວາມອາດສາມາດໃຫ້ແກ່ກົມນໍ້າປະປາ ກະຊວງ ຍທຂ, ອົງການຈັດຕັ້ງທີ່ກ່ຽວຂ້ອງ ຢູ່ນະຄອນຫຼວງວຽງຈັນ ແລະ ນະຄອນປາກເຊ ໃນການຄຸ້ມຄອງ ແລະ ພັດທະນາວຽກງານສຸຂາພິບານ ໃຫ້ກາຍເປັນຕົວເມືອງສີຂຽວ; ປັບປຸງການເຂົ້າເຖິງການບໍລິການເກັບມ້ຽນຂີ້ເຫຍື້ອ ແລະ ການຫັນເອົາຂີ້ເຫຍື້ອໃຫ້ກາຍເປັນທຸລະກິດ; ປັບປຸງການເຂົ້າເຖິງການບໍລິການ ແລະ ການຄຸ້ມຄອງວຽກງານສຸຂາພິບານ ໂດຍສະເພາະແມ່ນການບໍາບັດນໍ້າເປື້ອນ ເຊິ່ງວຽກກໍ່ສ້າງລະບົບບໍາບັດນໍ້າເປື້ອນ ແລະ ລະບົບບໍາບັດຂີ້ຕະເລດ ແມ່ນກິດຈະກໍາໜຶ່ງ ຂອງໂຄງການ ໂດຍແມ່ນ ສະຖາບັນເຕີບໂຕສີຂຽວ ສາກົນ ເປັນຜູ້ຈັດຕັ້ງປະຕິບັດ ເຊິ່ງກົມນໍ້າປະປາ ກະຊວງ ຍທຂ ເປັນຜູ້ຄຸ້ມຄອງ. ງົບປະມານສໍາລັບວຽກກໍ່ສ້າງລະບົບບໍາບັດນໍ້າເປື້ອນ ແລະ ລະບົບບໍາບັດຂີ້ຕະເລດ ຢູ່ນະຄອນປາກເຊ ມີມູນຄ່າ 1.048.524 ໂດລາສະຫະລັດ.
ຂອບເຂດ ແລະ ໜ້າວຽກ ຂອງໂຄງການປະກອບມີ 5 ບ້ານ ເຊິ່ງມີລະບົບບໍາບັດນໍ້າເປື້ອນແບບບໍ່ລວມສູນ 4 ຈຸດ ກວມເອົາປະຊາກອນ ໃນພື້ນທີ່ທັງໝົດ 9 ພັນກວ່າຄົນ ແລະ ມີໂຮງງານບໍາບັດຂີ້ຕະເລດ 1 ໂຮງງານ. ມີກໍ່ສ້າງລະບົບບໍາບັດນໍ້າເປື້ອນແບບບໍ່ລວມສູນ 4 ຈຸດ ຄື: ຈຸດບ້ານປາກເຊ - ບ້ານທົ່ງ; ຈຸດບ້ານໂພນກຸງ - ຮ່ອງຂະຍອມ; ຈຸດຕະຫຼາດດາວເຮືອງ ແລະ ຈຸດບ້ານພະບາດ, ມີຄວາມອາດສາມາດບໍາບັດນໍ້າເປື້ອນ 770 ແມັດກ້ອນ/ວັນ.
ສ່ວນຂອບເຂດວຽກລາຍລະອຽດ ມີການກໍ່ສ້າງ – ຕິດຕັ້ງລະບົບທໍ່, ອ່າງຕົກຕະກອນ, ອ່າງບໍາບັດແບບຈຸລິນຊີ, ອ່າງກັ່ນຕອງ, ອ່າງບໍາບັດດ້ວຍທັນຍາພືດ, ຕິດຕັ້ງປໍ້າດູດນໍ້າ ແລະ ລະບົບໄຟຟ້າ. ກໍ່ສ້າງໂຮງງານບໍາບັດຂີ້ຕະເລດ ປະກອບມີອ່າງຖອກອາຈົມ, ອ່າງບໍາບັດແບບຕາກແຫ້ງ, ອ່າງບໍາບັດດ້ວຍທັນຍາພືດ ແລະ ລະບົບໄຟຟ້າ ຢູ່ສະໜາມຂີ້ເຫຍື້ອ ຫຼັກ 17. ທັງນີ້ ກໍເພື່ອເຮັດໃຫ້ນໍ້າເປື້ອນໃນຕົວເມືອງ ແລະ ຊຸມຊົນ ໄດ້ຖືກບໍາບັດ 50% ໃນທົ່ວປະເທດ ໃນປີ 2030.
