ລາວ-ເບລາຣຸດສ໌ ຫາລືເພີ່ມທະວີການຮ່ວມມືດ້ານການຄ້າ-ອຸດສາຫະກຳປຸງແຕ່ງ ແລະ ການລົງທຶນ ຂອງປະເທດລາວ
ວັນທີ 23 ກຸມພາ 2023, ທ່ານ ມະໂນທອງ ວົງໄຊ ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ ແຫ່ງ ສປປ ລາວ (ອຄ) ໄດ້ຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ Uladzimir Baravikou, ເອກອັກຄະລັດຖະທູດ ແຫ່ງ ສ ເບລາຣຸດສ໌ ປະຈໍາ ສປປ ລາວ, ເນື່ອງໃນໂອກາດທີ່ໄດ້ມາດໍາລົງຕໍາແໜ່ງເປັນ ເອກອັກຄະລັດຖະທູດ ປະຈໍາ ສປປ ລາວ ຄົນໃໝ່.
ໃນໂອກາດພົບປະຄັ້ງນີ້, ທ່ານຮອງລັດຖະມົນຕີ ກະຊວງ ອຄ ໄດ້ສະແດງຄວາມຍິນດີຕ້ອນຮັບ ແລະ ຂອບໃຈ, ໂດຍສະເພາະລັດຖະບານ ແຫ່ງ ສ ເບລາຣຸດສ໌ ກໍຄືປະຊາຊົນ ແຫ່ງ ສ ເບລາຣຸດສ໌ ທີ່ໄດ້ໃຫ້ການສະໜັບສະໜູນ ແລະ ຮ່ວມມືກັບ ສປປ ລາວ. ເຖິງວ່າສະຖານທູດ ແຫ່ງ ສ ເບລາຣຸດສ໌ ຕັ້ງຢູ່ຮ່າໂນ້ຍ, ສສ ຫວຽດນາມ ແຕ່ການຮ່ວມມື ແລະ ມິດຕະພາບ ລະຫວ່າງ 2 ປະເທດ ພວມພັດທະນາຢ່າງຕັ້ງໜ້າ. ພ້ອມນີ້, ທັງສອງຝ່າຍໄດ້ປຶກສາຫາລື ກ່ຽວກັບການເພີ່ມທະວີການຮ່ວມມືດ້ານການຄ້າ, ອຸດສາຫະກຳປຸງແຕ່ງ ແລະ ການລົງທຶນ ຂອງປະເທດລາວ. ຊຶ່ງປະເທດ ສ ເບລາຣຸດສ໌ ສ່ວນໃຫຍ່ລົງທຶນໃສ່ຂະແໜງອຸດສາຫະກໍາຍານພາຫະນະ, ອຸປະກອນເຄື່ອງໃຊ້ໄຟຟ້າ, ຜະລິດຕະພັນເຄມີ, ເຄື່ອງຈັກກາຊວນສໍາລັບຍານພາຫະນະ, ລົດບັນທຸກທີ່ໃຊ້ນ້ຳມັນກາຊວນນ້ຳໜັກບັນທຸກເກີນ 5 ໂຕນ ແຕ່ບໍ່ເກີນ 20 ໂຕນ, ເຄື່ອງຈັກ ອື່ນໆ; ໄລຍະ 2019-2022: ຜະລິດຕະພັນການຢາ, ນໍ້າຕານ ແລະ ອື່ນໆ.
ໃນນີ້: ດ້ານມູນຄ່າການຄ້າ ລາວ-ເບລາຣຸສ໌ ໄລຍະແຕ່ປີ 2018 ຈົນເຖິງປັດຈຸບັນ ມູນຄ່າການນຳເຂົ້າ-ສົ່ງອອກ ລະຫວ່າງ ສອງປະເທດ ແມ່ນຍັງຈຳກັດເຖິງແມ່ນວ່າສອງຝ່າຍຈະຮ່ວມກັນເປີດເສລີຢ່າງກ້ວາງຂວາງ ໃນບັນດາຂອບການຮ່ວມມື ເນື່ອງຈາກວ່າສິນຄ້າທີ່ສອງປະເທດມີທ່າແຮງໃນການສົ່ງອອກ ສ່ວນໃຫຍ່ແມ່ນສິນຄ້າ ທີ່ສອງປະເທດບໍ່ມີຄວາມຕ້ອງການໃນການນຳເຂົ້າ ແລະ ການລົງທຶນຕ່າງປະເທດ ຂອງ ເບລາຣຸສ໌ ຢູ່ ລາວ ແມ່ນຍັງມີໜ້ອຍ. ປີ 2020, ມູນຄ່າການຄ້າສອງຝ່າຍແມ່ນ 994.761 ໂດລາສະຫະລັດ ເພີ່ມຂຶ້ນ 7.251,17% ເມື່ອທຽບໃສ່ປີ 2019 ແລະ ບໍ່ໄດ້ມີການສົ່ງອອກໄປເບລາຣຸດສ໌. ປີ 2021, ມູນຄ່າການຄ້າສອງຝ່າຍ ມີພຽງແຕ່ 9.072 ໂດລາສະຫະລັດ ແລະ ກໍບໍ່ໄດ້ມີການສົ່ງອອກສິນຄ້າໄປເບລາຣຸດສ໌ ແລະ ໃນປີ 2022 ສອງປະເທດ ບໍ່ໄດ້ມີການພົວພັນຊື້-ຂາຍ ສິນຄ້ານໍາກັນ ຊຶ່ງມັນສະແດງໃນຕົວເລກສະຖິຕິຂອງປີ 2022 ທີ່ບໍ່ມີມູນຄ່າການຄ້ານໍາກັນ.
ໂອກາດດຽວກັນ, ທ່ານ Uladzimir Baravikou ໄດ້ສະແດງຄວາມຮູ້ສຶກສົນໃຈ ຕໍ່ການພັດທະນາປະເທດ ຂອງ ສປປ ລາວ ແລະ ຈະໃຫ້ການສະໜັບສະໜູນການຮ່ວມມື ໃນວຽກງານຫລາຍດ້ານໃຫ້ແກ່ລາວ ໃນຕໍ່ໜ້າເພື່ອໃຫ້ເກີດຜົນປະໂຫຍດທີ່ດີ ໃຫ້ແກ່ສອງປະເທດ ແລະ ທັງສອງປະເທດຈະສືບຕໍ່ເປີດກວ້າງການສະໜັບສະໜູນ, ແລກປ່ຽນຂໍ້ມູນຂ່າວສານເຊິ່ງກັນ ແລະ ກັນ ແລະ ການຮ່ວມມືເພື່ອເສີມຂະຫຍາຍການຄ້າ ແລະ ການລົງທຶນໃຫ້ນັບມື້ນັບຂະຫຍາຍຕົວດີຂຶ້ນ.
