ເປີດເງື່ອນໄຂສັນຍາໃຫມ່ ແມນຢູ ຍື່ນໃຫ້ ເດ ເຄອາ ກ່ອນຮັບຄ່າຈ້າງຫລຸດລົງ

ເປີດສັນຍາໃຫມ່ທີ່ ແມນເຊສເຕີ ຢູໄນເຕັດ ຍື່ນໃຫ້ ດາບິດ ເດ ເຄອາ ເຜີຍມີເງື່ອນໄຂພິເສດທີ່ຕ້ອງເຮັດກ່ອນຮັບຄ່າເມື່ອຍເຕັມຈຳນວນ ເຖິງຈະຫລຸດລົງກວ່າເກົ່າ.

The Sun ສື່ຊື່ດັງຂອງອັງກິດລາຍງານວ່າ ແມນເຊສເຕີ ຢູໄນເຕັດ ທີມອັນດັບ 3 ພຣີເມຍລີກ ອັງກິດ ໄດ້ສະເໜີສັນຍາສະບັບໃຫມ່ຈຳນວນ 2 ປີ ໃຫ້ ດາບິດ ເດ ເຄອາ ຜູ້ຮັກສາປະຕູມື 1 ຂອງທີມແລ້ວ ຫລັງຈາກສັນຍາປັດຈຸບັນພວມຈະຫມົດລົງໃນເດືອນມິຖຸນານີ້.

ແນວໃດກໍຕາມ ແມນຢູ ໄດ້ຫລຸດຄ່າເມື່ອຍຂອງ ເດ ເຄອາ ລົງຈາກເກ່ົາອາທິດລະ 370,000 ປອນ ເຫລືອອາທິດລະ 250,000 ປອນ ແລະ ຍັງກຳນົດເງື່ອນໄຂອີກ ດ້ວຍວ່າ ຜູ້ຮັກສາປະຕູອາຍຸ 32 ປີ ຈະຕ້ອງໄດ້ອອກເລີ່ມຕົ້ນຢ່າງຫນ້ອຍເຄິ່ງຫນຶ່ງຂອງຈຳນວນນັດໃນລະດູການໜ້າ ເຊິ່ງຄາດວ່າຈະມີປະມານ 60 ນັດ ຈຶ່ງຈະໄດ້ຮັບເງິນຄ່າຈ້າງເຕັມຈຳນວນ.

ສຳລັບ ເດ ເຄອາ ຍ້າຍມາຈາກ ແອັດເລຕີໂກ ມາດຣິດ ຕັ້ງແຕ່ປີ 2011 ຢູ່ກັບແມນຢູ ມາດົນເກືອບ 12 ປີ ລົງຫລິ້ນໄປແລ້ວ 524 ນັດ ຊ່ວຍໃຫ້ທີມບໍ່ເສຍປະຕູ 181 ເກມ ເປັນສະຖິຕິສູງສຸດຂອງສະໂມສອນ ພາ ແມນເຊສເຕີ ຢູໄນເຕັດ ຄວ້າແຊ໊ມ 7 ໜ່ວຍ ປະກອບດ້ວຍ ພຣີເມຍລີກ, ຢູໂຣປາລີກ, ເອຟເອ ຄັບ ແລະ ລີກຄັບ ຢ່າງລະ 1 ສະໄຫມ ລວມເຖິງ ຄອມມູນິຕີ ຊິລ 3 ສະໄຫມ ແຕ່ຄັ້ງຫລ້າສຸດທີ່ໄດ້ຮັບການຕໍ່ສັນຍາຄືປີ 2019.